لالش و 30 سالێن خەباتەكا بێ راوەستیان
صباح سمیر
قۆناغەكا زۆر گرنگ و زەحمەت بوون سەردەمێن سالێن پشتی سەرهلدانا1991ێ وی دەمی مە تێتە بیر كو ئەم هەموو تێهنیێ وێ ئازادیێ بووین یا مللەتێ مە دنالی،ژ ئەنجامێ زولم و زۆرداریێ ئەگەر مللەتێ كوردێ موسلمان ژبەر زولما نەتەوەیی زولم دیتبت مە ئێزدیان دووجاری وان زولما نەتەوەیی و ئۆلی و دیرۆكی دیتیە ، قۆناغا دەستپێكا دامەزڕاندنا بنگەهێ لالش قۆناغەكا زۆر گرنگ بوو،ژبەركو دەرفەتەكا باش هاتبوو پێش وەكو هەموو مللەتێن و نەتەوەیێن دی ژی بزاڤەكا ڕەوشەنبیری ل دەڤەرێ هاتبوو پێش و ب تایبەتی ئەو دەمە دەمەكێ زێرین بوو بۆ ئێزدیان ژبەركو قۆناغا بەری سالێن نۆتان دا قۆناغەكا ب زەحمەت بوو و ئێزدیان قوربانیەكا دیرۆكی یا مەزن بۆ دایە ژلایێ دیرۆكی ڤە.
كەد و خەباتا لالشێ ل سەردەمێ ساڵێن دامەزراندنێ بزاڤەكا ئێكجار زۆر بوو بۆ جڤاكا ئێزدیان و جڤاكا كوردستانێ،سەردەمەكێ بهێزێ ئاڤاكرنا پەیوەندیێن باش بوون دگەل جڤاكا دەڤەرێ ژ پێخەمەت ڕاستڤەكرنا وان نڤیسەرێن شۆفێنی ب شێوازەكی توند خوەستبوون جڤاكا مە و دیرۆكا وان ب شاشی ل قەلەم دابوون و ئەڤ چەندە ژی هەتا نهۆ ژی ژلایێ گەلەك ژ نڤیسەرێن توندرەو و دوژمنێ جڤاكا ئێزدیان ددۆمینە،قۆناغا ئیرۆ دئێتە خواستن ژ بنگەهێ لالش چەند پێنگاڤێن بلەز و پێتڤی ئەنجام بدەت و ب تایبەتی سازیێن میدیایی یێن بنگەهێ لالش دبوارێ ڕاگەهاندنێ دا و ب تایبەتی ل سۆشیال میدیایێ و میدیا ئەلیكترۆنی بزاڤێن خوە خورتربكەن،چنكو میدیا سۆشیالێ ئیرۆ ئێكە ژ بهێزترین میدیایێن جهیانی د ڤەگوهاستنا بوویەرێن گرنگ دا و ب تایبەتی ل سەر وان بزاڤێن ل دژی جڤاكا ئێزدیان ڕەنگڤەدانێن خراب هەین وەك بەرسڤەكا ئەكادیمی و ڕاستڤەكرنا وان شاشیان.
خالەكا دن یا بهێز فەرە بنگەهێ لالش خوە ل دروستكرن و كۆمكرن و دیكیۆمێنتكرنا جینۆسایدا ئێزدیان بكەتە خودان و وان بەلگەیێن گرنگ تێدا كۆم بكەت وەك وان مۆزەخانەیێن كۆمكوژیێن جیهانی یێن كو مللەتێن وان تێدا هاتنە جینۆسایدكرن وێ ببن بەلگەیێن زیندی ژبۆ دیرۆكێ،هەردیسان زۆر ب فەر دبینم كو پەیوەندیێن بنگەهی بەرفرەهتر لێ بێن ل سەر ئاستێ كوردستانێ و عێراقێ، هەردیسا ژ هەبوونا گەلەك دەنگێن توندرەویێ ل دژی جڤاكا ئێزدیان،فەر دبینم بنگەهێ لالش ل قۆناغا داهاتی پرۆژەكی بەرفرەهـ ڕابگەهینت ژ بۆ ناساندنا ئێزدیان و ئێزدیناسیێ بۆ باژێرێن دی ل سەر ئاستێ كوردستانێ و عێراقێ.
تُتاح هذه الصورة أيضا في: کوردی
