Serok Barzanî: Spasiya wan aliyan dikim ku li ser sozên xwe man

Hewlêr (Rûdaw) – Serok Mesûd Barzanî di peyamekê de pîrozbahî li Serokê Parlamentoya Iraqê û herdu cîgirên wî kir û ragihand, “ev pêngav destpêkekî pir baş e bo rastkirina proseya siyasî û bingehek e jî ji bo damezrandina paşerojeke geş û seqamgîr û xurttirkirina demokrasî û hevbeşiyê di Iraqê de.”

Serok Mesûd Barzanî dibêje, “Hilbijartina Serokê Parlamentoya Iraqê û herdu cîgirên wî pêngavekî giring bû di proseya siyasî ya Iraqê de, bi vê boneyê jî pîrozbahiyê li birêzan Mihemed Helbûsî Serokê Parlamentoyê û Hakim Zamilî û Şaxewan Ebdullah dikim.

Pîrozbahiyê li hemû endamên parlamentoyê û dengderan û hemwelatiyan dikim. Ev pêngav destpêkekî pir baş e bo rastkirina proseya siyasî û bingehek e jî ji bo damezrandina paşerojeke geş û seqamgîr û xurttirkirina demokrasî û hevbeşiyê di Iraqê de.”

Di berdewamiya peyama xwe de, Serok Barzanî spasiya wan aliyên siyasî dike ku “pabendî sozên xwe bûn û bûne sedema serkeftina proseyê” û dibêje, “tekez ev pêngava îro ya Parlamentoya Iraqê dibe derfetek ji bo bidestxistina yekrêzî û vekirina rûpeleke nû û derbasbûna astengiyan û jihevtênegihîştinan.”

Serok Barzanî destnîşan dike, “proseya hilbijartina desteya serokatiya parlamentoya Iraqê, dibe deriyek ji bo çêbûna baweriyê di navbera pêkhateyan û bihêzbûna dewleta dezgehî.”