Keçeke Êzidî ya ji destê DAIŞê rizgar bûye dest bi jiyaneke nû kiriye

Navenda Nûçeyan (K24) – Keça Kurd a Êzidî Fayza Kemal ku li kampa Reşane ya li parêzgeha Duhokê dimîne, berî 3 salan di rojeke wek îro de ji destê DAIŞê hat rizgarkirin, jiyana xwe guhartiye û bi şahî bi malbata xwe re dijî.

Fayza Kemal du wêneyên xwe yên cuda belav kirin û nivîs: “Îro 24ê Îlonê, salvegera rizgarbûna min e. Cudahiya di navbera her du wêneyan de, tenê 3 sal in. Di vê heyamê de jiyana min hat guhartin û bi malbata xwe şa bûme. Niha bi azadiyane dijîm.”

Ev keça Êzidî ya ji destê DAIŞê rizgar bûye, niha bi rêxistineke mafên mirovan re xizmeta rizgarbûyên din ên destê DAIŞê dike û kar ji bo bidestanîna mafên wan dike.

Çekdarên DAIŞê di 3ê Tabaxa 2014an de êrîşî Şingalê û derdora wê kir û zêdetir ji 5 hezar Kurdên Êzidî kuştin, bi hezaran kes revandin, her wiha bi sedhezaran jî koçber bûn.

Li gor amarên Nivîsgeha Rizgarkirina Revandiyên Êzidî, 6417 kes ji aliyê DAIŞê hatibûn revandin û heta niha 3554 kes hatine rizgarkirin.

00CH