ئێزدیاتی یا د گەشەکرنێ دا ل کوردستانا باشوور ب هەبوونا پارتی و سەرۆك بارزانی
مەهدی حەسەن 
ئێزدیاتی : وەک دینەکی دێرین کو بیروباوەرێن وی دزڤڕنە بەری چەند ھەزار سالا بەری زاینی ل کوردستانێ ژیاین، ئەڤ چەندە ژی درێ و رەسمێن جەژنێن مەدا و د بیروباوەر و رەوشت و تیتالێن مە یێن رۆژانە دا خویادبت ، چونکی پڕانیا ڤان رێ و رەسمێن نھۆ ئەم پێ رادبین دزڤڕنە بەری ھەزارەھا سالان کو ل جەم مللەتێن میسۆپۆتامیا د ھاتنە پەیڕەوکرن ،د درێژیا مێژوویا خۆدا ئێزدیاتی تووشی گەلەک هەڤڕکی و هەڕەشە و فرمانێن رەش بوویە، گوندێن وان یێن هاتینە وێرانکرن، مال و ملکێ وان یێ هاتیە تالانکرن ، کوشتن و گڕتن ژی هەر دەم بەهرا مە ئێزدیان بوویە ، تەناهی و ئارامی کێم دیتینە، شینوار و قوب و نیشانگەهێن خاسا هاتینە ئێوراندن ئەڤە هەموو یا ب سەرێ ئێزدیان هاتی نە ژبەر کو رۆژەکێ ژ رۆژان بو دەوروبەرێن خۆ جهێ مەتڕسیێ بووینە یان ژبەر گوننەهەکا ئێزدیان کری بەلکی ژبەر پێگیریا ئێزدیان ب بیر و باوەر و رێ و رەسمێن دینێ خۆ و قایل نەبووینە ل سەر گهۆرینا وان بیروباوەران و هەمی کارینێن خۆ، خۆ پاراستینە و سزایێ وێ پێگیری و پارستنا ژی فرمان بوون !لدیف بیروباوەر و فەلسەفا ئولا ئێزدیاتیێ ئێزدیاتی نامەکا ژ دەسپێکا ئافراندنا کنیاتی هەول دەت هەبیت و چرایێ ئێزدیاتیێ هەریێ گەش و گۆربیت هەتا رۆژەکێ مزگینیەک ژ بو ڤی مللەتی دهێت ژ نک خودێ تەعالا بەرامبەر خوراگری یا وان و درێژە ڤان بیروباوەرێن خو داین سەرەرای ئەو فەرمان و قرکرن و دژایەتیا ل سەر وان رێکا خو بەرنەدان کو خودێ ئێکە یێ بێ شریکە و ژبلی خودێ سجودەت ژ بو چ کەسی نەبرن، ئەڤا هاتیا سەرێ وان هات، دگەل هندێ ئێزدیاتی ئولەکا گرتی یە و کەسی قەبەل ناکەت و باوەری ب رێژا گەلەک و قەبارا مەزن نینە کو چەند زێدەبن دێ هند ئێزدیاتی پێ مەزن بیت و باش بیت، بەلکی بارەکی گرانە و هەر کەسێ ب هەلخەتێت ئێک جارێ دێ هێتە دەرئێخستن ، گەلەک مللەت و قەوم و مرۆڤ ژێ جودا بینە و هەر کەسەکی دەرکەفتی ژ ئولا ئێزدیاتیێ نابت ب زڤریت و لێبورینا ئولی ژی نینە، کەسێ مایی ژی گەلەک ژیانەکا سەخت و دژوار بوراندیا و هەردەم تووشی دەردەسەریێ و کارەساتان دبوون هەر بو زانین (٧٤) فرمان هاتینە سەرێ ڤی مللەتی ، بەلێ ژ بو پاراستنا ئێزدیاتیێ دروستە چ بیتە سەرێ مرۆڤی ئێزدی د ڤێت خوراگربیت، بەس یا گرنگ ئەوە چرایێ ئێزدیاتیێ هەر یێ گەش و گۆربیت، ئەم ئێزدی مللەتێ سوڕ و کەرامەتێین یێ ل وێ باوەریێ رۆژەکێ دێ (ئێزی) دا هربیت و هەقیا خودێ دێ کەفتە سەر عەردێ خودێ هەمی ئەڤ قەوم و مللەت وەکی برا دێ پێکڤەژین بێی فەرق و جودا، وەکی دیار ب درێژیا مێژوویێ ژی پەیرەوکەرێن ئێزدیاتیێ هەر دەم تووشی دەردەسەریێ و کارەساتان بینە ، بەلێ هەر گاڤ ئێزدیان خو ڕاگڕتن و ئۆلا خو پاراستن هەتا ئیرۆ ب ئەمانەت گەهشتینە ڤی سەردەمی نەخاسمە ل باشورێ کوردستانێ ئیزدی و ئێزدیاتی هەر مان و یێت گەشەکرنێ دا دەولەت سەرێ خەمخۆرێن ئێزدیاتیێ!
چێ د بیت جهێ پرسیارێ بت ل نک هندەک کەسا و ئێزدیان ژی ئەڤ گۆتن و مانشێتی من نڤیسی ؟ ژبەرکو راستە پێلەکا خراب ل سەر ئێزدیان دا هات ل ڤان سالێن بوری و هەتا نها ژی برینا مە گەلەک کویرە و خەلک پێ دئیشێت ل ڤی دەمێ تەکنەلوژیێ و پێشکەفتنێ و لەزاتیێ و مافێن مرۆڤی فرمانەک ل سەر ئێزدیان رابت هەولا ڤێ ئولا کەڤنار بهێتە دان و ئێزدی و ئێزدیاتی ب گشتی ب کەڤن مەترسیێ، هەقێ مرۆڤێ ئێزدی یە ژی هێدی باوەری ب ڤان دەولەت و حزب و کەسا نەهێت و نەرازیبوونا خوژی دیار کەن، بەلێ نابیت بێ ئومێدبین و دورکەڤین ژ چڤاکی و هندەک راستیا رەش کەین، ئێزدیا بەری هەر کەسی ل ڤێ فرمانێ خوڕاگرتن و بەرسنگێ داعش گڕتن وەک جانگۆری خۆ دان ناسین بەرەڤانی ژ ئێزدیاتیێ کرن و چیایێ شنگالێ و مەزارگەهێ شەرفەدین پاراستن نەهێلان چەکدارێن داعش ب گەهنێ، لێ فرمان یە دژوار بو ئارمانجا عەربا و خوفرۆش و دەولەتا بناڤ ئیسلامیا داعش قرکرنا ئێزدیاتیێ بو ، پیلانەکا مەزن بو ژ هەر چار کنارا ڤە شنگال دورپێچ کرن باشیک و بەحزان داگیرکرن هێرشی هەمی جیهێن ئێزدیان کرن ، لێ شوکر بو خودێ پیلانا وان ب سەرێ وان دا شکەست و ئێزدی و ئێزدیاتی ژ دەستێ وان رزگار بوون، دەولەت سەرێ مللەتێ کورد و بارزانی وجانگۆریێن ئێزدی خو ل ئێزدیاتیێ کرنە خودان و بەرسنگێ داعش گڕتن و شنگال ژی ل سەر دەستێ پێشمەرگەهێ قارەمان رزگارکرن، هەر چەندە ل ڤێ فرمانێ زەرەر و زیانەکا مەزن گەهتا ئێزدیان و ئێزدیاتی کەفتە د مەترسیێ دا و هەر ئێزدیەکی هزرا چولکرنا ئێزیدخانێ کرن و بتریا وان گەهشتن ئەورپا و تەرت و بەلا بوون و خەلکێ شنگالێ پێکڤە دەربەدەر بوون و جهـ و وارێ خو هێلان هاتن کوردستانێ و بەشەک ل ناڤ تورکا و هندەک چونا رۆژئاڤا ، لێ پشکا هەرە مەزن هاتن باژێرێ دهوکێ ئەڤە (١٠) سالا دناڤ کەمپا دا د ژین و هەمی پێداویستیێن وان ژ لایێ حکومەتێ ڤە د هینە دابینکرن لدیف ڕاسپاردێن جەنابێ سەرۆک بارزانی گرنگیەکا گەلەک ب هەر شنگالیەکی ئاوارە د هێتە دان ئەڤێن ل کوردستانێ د ژین چ ل کەمپا چ ل ناڤا کاڤلاندا چ دناڤ باژیر و مالێن کوردا دا رێزەکا بلند ل وان دهێتە گرتن وتا ڤی ساتە وەختی چ ئاریشە و گرفتێن چڤاکی نەبینە بەلکی وەک برا دگەل خەلکێ کوردستانێ دژین، وەکی دیار ژی نها هندەک یێ ڤەدگەرێن بو شنگالێ و هندەک نازڤرنا د خازن رەوش ئارام و تەنا بیت ل شنگالێ و ئەو هێزێن نە شەرعی و خو سەپاندی ل سەر شنگالێ دەرکەڤن و رێکەفتنا هەولێر و بەغدا جیبەجی بیت ئەڤێن مایی ژی ڤەگەرێن ، مەبەستا من ل ڤێ نڤیسینێ دا وەک چڤاک و ژیان مە ئێزدیان گەلەک ئێش و ئازار دیتی نە قەدەرا ئێزدیاتیێ ئەڤە بیە، ب راستی ژی ئێزدیاتی بارەکی گرانە کوشتن و گرتن و فەرمان و تالان یێ د رێکا ئێزدیاتیێ دا ، بەلێ وەک بیر و باوەر و ئاین و ئێزدیاتی سەرەرایی ئەڤ زوڵم و زۆرداری و فرمانا هاتی سەرێ مە ئێزدیاتی یا د گەشەکرنێ دا و ئێزدیاتی سەرکەفت ل سەر دوژمن و نەیار و پیلانێن داعش وەکی دیار ل ڤان خالا :
١- ئارمانجا داعش و عەرەبێن شوفینی نەهێلانا ئێزدیاتیێ و ئێزدیان بوون ، لێ بەرۆڤاژی ئێزدیاتی هەر ما ب سایەی سەرێ سەرۆک بارزانی و گەلێ کوردستانێ و خوراگریا ئێزدیان .
٢- ل ڤێ فرمانێ دربا هەرە مەزن ب ئێزدیان کەفت، بەلێ ئێزدی ژ مرنێ و کوشتنێ و فرمانا نەترسیاین و گرنگ بو ئێزدیان هەبوونا ئێزدیاتیێ بیە وەک دیار ژی ئێزدی ل دنیایێ هەمیێ بەلاف بوون ل ڤێ فرمانێ و هاتینە ناسین و بتر سرنج راکێشا خەلکێ راکێشایە بو ئێزدیاتیێ ، و د رێکا ڤێ فرمانێ دا ئێزدی ل جیهانێ هەمیێ بەلافبینە و پەیاما ئێزدیاتیێ گەهاندینا دەولەتا و دنیایێ کا چ زوڵم ل ئێزدیاتیێ هاتیە کرن ، بەلکی بەرۆڤاژی داعش د ڤێ تاوانا دەرهەقی ئێزدیان شکەستن خار و هەر جهەکی لێ هاتن گرتن و کوشتن و هەتا نها ژی جهـ لێ نینە داعش لێ ڤەحەوین .
٣- ئەڤێ فرمانێ گەلەک دەنگ ڤەدا هەتا نەتەوەیێن ئێکگرتی و چڤاتا ئاسایشا نەتەوەیی و ئێکەتیا ئەورپا و دەولەتیێن ئەورپی و عەرەبی و پاپای و جامعە ئەزهر و کەنیسە و مەزاهبێن سنی و شیعی پالپشتیا خو دەربرین ژ بو ئێزدیان گەلەک دەولەت و پەرلەمانێن ئەورپی ئەڤ تاوانا دەرهەقی ئێزدیان ئەنجامدای ب جینوساید دان ناسین .
٤-ئێزدی ل جیهان هەمیێ بەلاف بوون هیدی قرکرنا وان نەما و هەر گاڤەکا مەترسی ل سەر هەبیت دێ گازی و هاوارێن وان گەهن دنیایێ هەمیێ .
بدیتنا من ئەڤ چەند خالێن من بەحس کرین د بەرژەوەندیا ئێزدیان دا بوون کو هێدی کەس جورئەتێ نادەت خو جارەکا دی هەولا قرکرن و فەرمانا ئێزدیان بدەن ژبەر کو ئەڤا هاتی سەرێ داعش دێ بتە سەربۆرەک بو هەر گرۆپ و لایەنەکی دژی ئێزدیان راوەستێن دێ نەمانا وان بیت ، دڤیا ب زانین ئەڤ رەوش چاوا ژ بو ئێزدیان هاتە پێش و ئێزدی ژ ڤێ فرمانێ قورتال بین و ئێزدیاتی کەفتە د گەشەکرنێ دا ، ب راستی سەیرە ل ٧٣ فەرمانێن بوری کەسی خو ل ئێزدیان نەکریا خودان هەر گوند و باژێرەکی ئێزدیان کەفتیتە بەر تالانەکا فرمانا نەڤەگەریا یە و کەسی خو ل مە نەکریە خودان ژ بو جارا ئێکێ یە حکومەتەک و مللەتەک خو ل ئێزدیان بکەت خودان و بەرسنگێ داعش بگریت و داستانا تومارکەت و ان بکوژت و بگریت و دیلکەت و دادگەهبکەت و ریسوابکەت دناڤ جەرگێ ئیسلامێ و ڤان عەرەبێن شوفینی دا! منێکەکا ژ بو ئێزدیاتیێ ئەڤە هاتیە کرن چو دەم و بەدیلا نەبیە و دڤیە خو خشیم نەکەین، حکومەت مەکتەبا ڤەکەت ژ بو کرینا ئەو کچ و خوشکێن مە یێن کەتین دەستێ داعش رزگار بکەن و رادەستی دەیک و بابێن وان ب کەن و بێژن ئێزدیاتیا خو ب کەن ، ئەڤە نە ژ بۆشاتیەکێ هاتیە ئەڤە کەسەک مەزن و کاریگەر ل پشت ڤێ چەندێ بیە ئەو ژی سەرۆک بارزانی بیە سۆز و پەیمان داین پشتەڤانێ ئێزدیاتیێ و ئێزدیان بیت و تولا ئێزدیان ڤەکەت ژ داعش و سۆزا خو ب جیهـ ئینا و ب دروستاهی ژی خو ل ئێزدیاتیێ کرە خودان و ئێزدیاتی پاراست و ل سەر بانگاوازیا سەرۆکێ خوشتڤی خەلکێ کوردستانێ دەرگەهێن خو و مزگەفت ڤەکرن و رێزەکا مەزن ل ئێزدیان هاتە گڕتن ل ڤێ فرمانێ، ئەگەر وەسا ژی نەبت وەکی هندەک ژ نەیار و دوژمنا بەحس دکەن دڵنیا بن دا ئێزدیاتی بەرف ئاقارەکی رەش و تاری ڤە چو با و ئەڤا نها هەی نە دبوو و ئێزدیاتی ژ کوکا خو دا هێتە هلقاندن، ئێزدیاتی باوەریەکا پیرۆزە دڤێت مرۆڤێ ئێزدی درێژەیێ پێ بدەت ل بن هەر فشارەکێ بن هەگەر هندی تبلێن دەستی بن دڤیا ئەو کەس نەهێلن چرایێ ئێزدیاتیێ ڤەمرێت هەتا رۆژەکا گەش ل سەر ڤی مللەتی بهێت ژبەر کو د باوەریا مەدا هەر دێ رۆژەکێ ئێزی دا هر بیت و هێدی ئەڤ زولم و زۆرداری هەو ل مللەتی د هێتە کرن دێ ئێزدی سەرفراز بن ئەف جور وجەفایا مرۆڤێ ئێزدی کێشاین ڤان سال و بەدیلا دێ ب دوماهیک هێت و زوڵم و زۆرداری دێ ل سەر عەردێ خودێ رابیت ، ژبەر هندێ مرۆڤێ ئێزدی هلگرێن ڤێ ناما خودێ ناسینێ و سەر رێا شیخادی و تاووسی مەلک د چن و هەر ژ ئەزل دا ئێزدیاتی چاوا هەبیە هاتیە پەیڕەوکرن و نەهاتیە گهۆرین و تەحمولا هەمی دەردەسەریا کریە و خوش خۆشی و لەڤزەتێن ژیانێ قوتکرین پێخمەت ئێزدیاتیێ و ئاخرەتێ و رێکا خودێ،
دێ ئێینە سەر بابەتێ خو و گەشەکرنا ئێزدیاتیێ ل باشورێ کوردستانێ ، مە ب خۆشحالی ڤە و بدرێژاهی بەحسێ ئێزدیاتیێ کر و ئەو قوناغێن ئێزدیاتی تێرا دەرباس بی بەحسێ فرمانا و کەمپا و بەلنگازیا ئێزدیان کر تراژیدیەکا پر ئێش و ژان و قرکرن و کوشتن و وێرانکرنە ل گەلەک دەم و بەدیلا ژن و کچێن ئێزدیان هاتینە فرۆتن و رەڤاندن هەر چ بێژی هاتیە سەرێ ڤی مللەتی ، بەلێ وەکی مە گۆتی ئارمانجا مرۆڤێ ئێزدی نە خۆشی و لەفزەتا سەر ڤی عەردی یە، بەلکی پەیڕەوکرن و هەبوونا ئێزدیاتیێ بیە دگەل گەشەکرنا چرایێ خاسا و ناڤێ شیخادی و تاووسی مەلک، ئەرێ ئەڤە هەیە یا مە گۆتی نها ل کوردستانێ یان نە؟ بەلێ ب وجدان بلا هەر کەس دەستێ خو دانێت سەر سنگێ خو و ڕاستیا خودێ بێژت ئێزدیاتی وەک ئۆل ل چ ئاستی دایە هەگەر ئێزدیەکی دلشۆز ژ بو ئێزدیاتیێ بەرێ خو ب دەت ئێزدیاتیێ کا چاوا د بینت بەلێ نە ب چاڤەکی بەخیلی و دوژمناتی و ژ بو بەرژەوەندیا حزبەکی یان گرۆپەکی بێ بەختیێ ب کەت و ئەڤ ئێزدیاتی یا هەی ب چاڤەکی کورە بەرێ خو ب دەت ئێزدیخانێ و لالش و خاس و قەلندەرێن ئێزدیا کا چاوا رۆژ بو رۆژێ د خەمللن و تواف و خێر و رێ و رەسمێن ئێزدیاتیێ د هێنە گێران تاووس و بابا شێخ و قەوال و عید و عەرەفاتا چاوا دبینن ؟ کا ئەڤا هەی ل کیژ جهی و وەلاتی و دنیایێ هەیە ل کوردستانێ نەبیت، باوەر بکەن ئەڤا نها ل کوردستانێ ل ژێر دەسهەلاتا بارزانی هەی ل سەر دەمێ شیخادی و مەلک شێخسن و خاس و قەلەندەرێن شیخادی نەبیە و دڤیا خو ئەغلیش نەکەین ئارمانجێن ئێزدیاتیێ وەسا دخازن ئێزدیاتی وەکی هەی ژبەر کو دڵنیاین ئێزدیاتی یا د گەشەکرنێ دا و د قوناغەکا زێرین دا دژیت، خوزکا هەتا ئەم هەینە وەسا بۆمە بچتە سەری..
ئەڤە ژی هندەک ژ دەستکەفت و مافێن ئێزدیاتیێ ل هەرێما کوردستانێ کو مرۆڤێ ئێزدی پێ سەربلندە :
*ـ پەیرەوکرنا بیروباوەرێن ئێزدیاتیێ و رەوشت و تیتالێن مە یێن رۆژانە.
*ـ ساخکرنا هەلکەفت و عید و رێ و رەسمێن ل پەرستگەها لالش و هەر گۆند و باژیرەکی ئێزدیان دهێنە گیران ب ئازادانە .
*ـ ئەو رێز و حورمەتا ژ لایێ حکۆمەتا هەرێما کوردستانێ ڤە ل ئێزدیاتیێ د هێتەکرن، و ل زانایێن ئولا ئێزدیان وچڤاکێ کوردستانی و کەسایەتیێن ئاینی ل زانایێن ئاینی و چڤاتا روحانی و ل ئێزدخانێ دهیتە گرتن جهێ سەربلندیێ یە ژ بۆ مرۆڤێ ئێزدی .
*ـ دانا موچەیی زانایێن ئولی و مجێور و خلمەتکار و فەقرا و کۆچەکا ژ لایێ حکومەتا هەرێما کوردستانێ ڤە ل چ دەم و بەدیلا ئەڤ رێزگرتن نەبیە ئەو رێزا د گرن کارەک پیرۆزە دڤیا شانازیێ پێ ب کەین .
*ـ ئێزدیاتی یا بیە مژارەک ل سەر شاشەیێن تلفزیونێن کوردستانی کو ل هەمی هەلکەفت و چەژنا د هێنە راگەهاندن و پیرۆزکرن و ب سەدان بەرنامە و دیدار و کونفراس د هێنە گێران و بەلافکرن چ ل سەر رادیویا و چ سەر لاپەرێن گوڤار و رۆژنامە کو هیدی ئێزدیاتی فەشارتی نەمایە وەکی بەرێ.
*ـ دڤیا ب زانین هەر مالەکا کوردستانی رۆژ نینە ئاگەهـ ل سەر ئولا ئێزدیاتیێ نەبیت و هەر گاڤ بەرز و پیرۆز بەحسێ ئێزدیاییێ د هیتە کرن ئەڤەژی دەستکەفتەکا ل ڤی ساتە وەختی راگەهاندن وەسا بەحسێ بیرو و باوەرێن ئێزدیاتیێ ب کەن و بێژن ئێزدی مللەتەک خودێ ناسە و ئاشتیخوازن خودان دیرۆک و ئەسلێ کوردانن.
*ـ خووندنا بابەتێ ئێزدياتيێ ل ھەر دوازدە پۆلا دەرئێخستين بو قوتابێن ئێزدى ل قوتابخانێن بتریا قوتابیێن وان ئێزدی هاتن ڤەکرن ل قوناغێن ( سەرەتای و ناڤنجی و ئامادەیی) و پەروەردەکرنا ئێزدیاتیێ ل کوردستانێ مەزنترین دەستکەفتا ژ بو ئێزدیاتیێ ئیرۆ رۆژ قوتابیێن مە ل قوتابخانا ئێزدیاتیێ دخوونن .
*ـ ئاڤاکرن و نوژەنکرنا قوب و هلێلێن ئێزدیان چ ژ لایێ حکومەتێ ڤە چ خەلک ئاڤاکەن ئەڤ چەندە مەزنترین دەستکەفتێن ئێزدیاتیێ نە دەمێ هەر گوند و باژارەکی بچیێ تو بینە مەزارگەهێن ئێزدیان یێت هێنە نوژەنکرن و خەملاندن و ب شێوەکی مودێرن و هلێلێن کەسک و سۆر و زەر نیشانا ئێزدیاتیێ داناین سەر و رۆژانە خەلک قەستا ڤان مەزارا د کەن ئەڤە نیشانێن گەشەکرنێ .
*ـ دامەزراندن و بەرپرساتیا مرۆڤێ ئێزدی ل دام و دەزگەهێن میری و حزبی و پەرلەمانی و دادگەهێن کوردستانێ .
*ـ بنگەهێ لالش ئەو خزمەتا ئولى يا لالش دکەت وبەرسنگێ نەيارێن ئێزدياتيى گرتين و ئەو قەول قەسيدە وديروكا ئێزدياتيێ يا راستەقينە دايە زانين وھەمى ديكومينت كرين و سەدا پەرتوك ل سەر ھزر و بيرێن ئێزدياتێ بەلافكرين و ڤەكولين دروستكرين و گۆڤار و مالپەرێن تورێن كومەلايەتى بیە وەک دەزگەهەکی مەزن ژ بو ئێزدیاتیێ ل جیهانێ ب دەت ناسین ،
*ـ عید و عەرەفات و سەرسالا ئێزدیان ل هەرێما کوردستانێ ببنە بهێنڤەدان ژ لایێ حکومەتا هەرێما کوردستانێ ب فەرمی ل هەمی دام و دەزگەها .
دڤیا ب زانین کوردستان وارگەهێ پێکڤەژیانێ یە و عەردەک ل دنیایێ نینە مرۆڤێ ئێزدی ب وار و جهێ خو ب زانن کوردستان نەبیت جهێ لالش و خاس و مەزارگەهێن ئێزدیاتیێ لێ ئەوژی کوردستانا وەلاتێ باب و باپیرێن مەیە، من ڤیا ڤێ گۆتارا خو ب گۆتنەکا جەنابێ سەرۆک بارزان ب دوماهیک بینم جەنابێ وی د بێژتە لێژنا شێورداریا کاروبارێن ئێزدیان:
گەنجێن ئیزدیان هایدار بکن و بلا وسا پەروەردە بکن کو ل کوردستانێ و جیهانێ نە بترسن کو ئیزدینە و نە کو شەرم ژی بکن پەیرەوکارێ ئیزدیاتیێ نە ئانکو بلا ئاینێ خوە یێ پیرۆز و پاقێژ نیشانی خەلکەکی بیانی بدن بیێ شەرم بکن یان ژی بترسن…
تُتاح هذه الصورة أيضا في: کوردی
