نێچیرڤان بارزانى كارێزمایێ ده‌وله‌مه‌ندكرنا دۆسه‌یا ئێزدیان
بیرهات هارون
ئۆمێده‌وارین ئه‌ڤ پشته‌ڤانى و بزاڤێن سه‌رۆكێ هه‌رێما كوردستانێ به‌رده‌وامیێ بكێشن و زێده‌تر لڤاندن ب دۆسه‌یا ئێزدیان بێته‌كرن
دره‌نگیێن شه‌ڤه‌كا گه‌رم و هوره‌بایه‌كێ تژى تۆزه،چاره‌نڤیسێ نه‌دیارێ ئێزدیان و یاخیبوون و هندابوونا رێ یه ل هه‌مبه‌رى خه‌لكێ شنگال و ژ ترسا درنده‌یێن داعش چ كه‌سه‌ك نزانته به‌رێ خۆ ب چ جۆرێ دلۆڤانیێ ببه‌ت،به‌حسا جینۆسایدا سالا 2014 دكه‌م كو وێرانى و قركرن و كۆمكۆژى و تالانكرن و ژناڤبرنا بیروباوه‌رێن پێكهاته‌یى و ئایینى ئه‌نجامێن وێ بوون،ئێزدیان رێیا چاره‌سه‌ریه‌كا بتنێ هه‌بوویه یان بكه‌ڤنه ده‌ستێ درنده‌یێن داعش و میتۆلۆژیا خۆیا ره‌سه‌ن و كه‌ڤنار هه‌موویێ بئێخنه ده‌ستێ تیرۆرستان یان پشتا خۆ بده‌نه چیایێ شنگال و ل به‌ندا چۆنا خۆبن بۆ وارێ شرین ئه‌وژى كوردستانا ره‌نگینه؟.
بۆ خۆشحالیا مه ئه‌وبوو دماوه‌یه‌كێ كێم دا هێزێن هه‌رێما كوردستانێ ب هه‌موو بزاڤ و شیانه‌كێ كه‌فتنه دخزمه‌تا تاكێ ئێزدى دا پشتى ئاواره‌بوونێ رێیا وان بوویه كوردستان،وان روودانان دلته‌نگى و بێ ئۆمێدیه‌كا ئێكجار خسته د دلێ هه‌زاران مالبات و خێزانێن مه‌دا،هه‌تا وێ رۆژا كو مه زانى ستێره‌كا گه‌ش بسه‌ر ئاسمانێ ئێزدیخانێ دا رژیا و سه‌رۆك نێچیرڤان بارزانى ل هاوارا دایك و ژن و مێر و زارۆكێن ئێزدى هات و بوو ئه‌گه‌رێ رزگاركرنا ب هه‌زاران ژ ئێزدیێن گرتیێن ده‌ستێ رێكخراوا درنده‌یا داعش،روودان ده‌ربازبوون و جینۆسایدكرن ب داوى هات،لێ هێشتا رۆلێ سه‌رۆكێ هه‌رێمێ ب داوى نه‌هاتیه تا داوى قۆناغ كو ئێك تاكێ ئێزدى ژى مابت د ده‌ستێ داعش دا رۆلێ كارێزمایێ ناڤبرى دێ به‌رده‌وام بت،ل ڤێده‌رێ ئه‌ركه‌ك ل سه‌ر ملێن منه وه‌ك نڤیسه‌ره‌كێ ئێزدى ب وژدان و دلسۆزى به‌حسا هه‌ول و بزاڤێن وێره‌ك و دلشاد یێن رێزدار نێچیرڤان بارزانى بكه‌م،ژبه‌ر وه‌فاداریا وى بۆ مه ئێزدیان كو ئه‌ڤه مه‌زنترین كارێ وى یێ مرۆڤایه‌تى و خێرخوازى بوو، هیڤى و ئۆمێده‌كا گه‌ش د دلێ هه‌زاران خێزانێن ئێزدیان كر و گرتى ب كه‌سوكارێن وان شادكرن كو ژمارا وان زێده‌ترى(3500)رزگاركریانه، د راستى دا و یا ژمن ڤه ئه‌ز وێ كه‌ڤاله‌كى د نه‌خشینم و ب جوانى هه‌لویستێن سه‌رۆكێ هه‌رێمێ ره‌نگا و ره‌نگ دكه‌م،دیمه‌نه‌كێ بێ وێنه و سه‌ره‌نجراكێشه ده‌مێ ب خۆشحالیڤه به‌حسا ئه‌ڤى كارێزمایى دكه‌م، نه‌ك هه‌ر ژبۆ دۆسه‌یا ئێزدیان به‌لكو بۆ ته‌ڤ هه‌رێما كوردستانێ و بزاڤێن سیاسى بوویه پره‌كا لێكتێگه‌هشتنێ و دروستكرنا وێ ته‌بایێ و ئێكگرتنا لایه‌نێن سیاسى كو ژمێژه‌یه گه‌لێ مه چاڤه‌رێ كه‌سایه‌تیه‌كێ وه‌سا یێ كارتێكه‌ره كو بكارت هه‌موو ته‌خان ل سه‌ر مێزگه‌ردا سه‌رۆكاتیا هه‌رێمێ كۆمڤه بكه‌ت.
ژ روویێ یاسایى ژى پێشچاڤ دكه‌م كو سه‌رۆكێ هه‌رێمێ بوویه ئه‌گه‌ره‌كێ سه‌ره‌كى د زه‌نگینكرنا تاوانێن دژى ئێزدیان دا،ل په‌ى سیسته‌مێ رۆما و دادگه‌ها تاوانێن نێڤ ده‌وله‌تى ل لاهاى،پشتى هه‌ر كۆمكۆژى و جینۆسایده‌كێ، گرنگرترین بزاڤ بۆ لڤاندنا دۆسه‌یان هه‌بوونا وان به‌لگه‌یێن به‌رده‌سته كو ئه‌ڤ دادگه‌ها ناڤبرى دانپێدانێ پێ بكه‌ت وه‌ك تاوانه‌كا نێڤ ده‌وله‌تى،ئانكو دامه‌زراندنا ده‌سته‌یا بلندا جینۆسایدێ و رێڤه‌به‌ریا كۆمكرنا به‌لگه و زانیاریان ل باژێرێ دهۆك و نڤیسینگه‌ها رزگاركرنا گرتیێن ئێزدى یێن كه‌فتینه د ده‌ستێ داعش دا ژلایێ به‌رێز نێچیرڤان بارزانى ڤه،باشترین و ب هێزترین جۆرێ به‌لگه‌یان بوون ژ روویێ یاسایى ڤه و بۆ ئۆرگانێن نێڤ ده‌وله‌تى و تیما یونیتاد ئه‌وا ل په‌ى بریارا(2379)یا جڤاتا یاسایا نێڤ ده‌وله‌تى هاتیه عێراقێ و هه‌رێما كوردستانێ و كاردكه‌ت بۆ بده‌ستڤه‌ئینانا به‌لگه‌یان ل سه‌ر وان تاوانێن داعش د ده‌رهه‌ڤ ئاین و پێكهاته‌یاندا كرین.
بێگۆمان ده‌مێ ئه‌م به‌حسا هه‌لویسته‌كێ وه‌سا مه‌رده‌مێرانه دكه‌ین،وه‌ك ئێزدى بتر شانازیێ بخۆدكه‌ین، ژبه‌ركو هه‌ر ب رێیا به‌رێز سه‌رۆكێ هه‌رێمێ بوو كو ئیرۆ ژنه‌كا ئێزدى ببته بالیۆزا نه‌ته‌وه‌یێن ئێكگرتى ل ئه‌مریكا كو د ده‌مێن سه‌خت دا ب رێیا نڤیسینگه‌ها وى یا تایبه‌ت هاتبوو رزگاركرن داكو بكارت هه‌تا ئیرۆ رۆژ هه‌موو ده‌رده‌سه‌ریێن ئێزدیان نیشانى هه‌موو جیهانێ بده‌ت،چ پێنه‌ڤێت ئه‌ڤه ژى ژ به‌لگه‌یێن هه‌رى ب هێزبوو ژبۆ ده‌وله‌مه‌ندكرنا ڤێ دۆسه‌یا ئێزدیان و ئۆمێده‌وارین ئه‌ڤ پشته‌ڤانى و بزاڤێن سه‌رۆكێ هه‌رێما كوردستانێ رێزدار نێچیرڤان بارزانى به‌رده‌وامیێ بكێشن و زێده‌تر لڤاندن ب دۆسه‌یا ئێزدیان بێته‌كرن ئه‌و ژى ل سه‌ر ئاستێ نێڤ ده‌وله‌تى و ب تایبه‌ت بزاڤێن دامه‌زراندنا دادگه‌هه‌كا نێڤ ده‌وله‌تى یا تایبه‌ت ب دادگه‌هكرنا تاوانبارێن داعش ڤه و هه‌ر چه‌كداره‌كێ ده‌ستێ وان د جینۆسایدا ئێزدیاندا هه‌ى ب سزایێ خۆ یێ یاسایى بگه‌هن،زێده‌بارى هندێ مه هیڤى ژ حكومه‌تا هه‌رێما كوردستانێ هه‌یه وه‌ك جاران ب ئه‌ركێ خۆ یێ مرۆڤایه‌تى و یاسایى رابن د ده‌رهه‌ق دۆسه‌یا ئێزدیان و خزمه‌تكرنا واندا.
س.س
تُتاح هذه الصورة أيضا في: کوردی
