به‌ربژارا ئێزدی: دێ كار كه‌م پتر خزمه‌تگوزارى بگه‌هنه ده‌ڤه‌رێن ئێزدیان
تۆرا لالش
وشیان خدیدا اومو، به‌ربژارا كوردێن ئێزدى بۆ په‌رله‌مانێ كوردستانێ، د هه‌ڤپه‌یڤینه‌كێ دا بۆ تۆرا لالش یا راگه‌هاندنێ دا دیاركرن: رژدی ل سه‌ر گرنگیا به‌شداریا ئێزدیان د پرۆسه‌یا سیاسى دا كر.
به‌ربژارێ گۆت: ئه‌گه‌ر بهێمه هه‌لبژارتن، دێ بۆ پاراستنا مافێن ئێزدیان و باشتركرنا ره‌وشا وان یا ئابوورى و جڤاكى ل هه‌رێما كوردستانێ كار كه‌م، له‌وران ژی په‌یاما من ژ ده‌نگده‌رێن ئێزدى ئه‌وه د رۆژا هه‌لبژارتنان دا به‌شدار ببن و ده‌نگێ خۆ بده‌ن دا ده‌نگێ ئێزدییان ل په‌رله‌مانێ كوردستانێ ب گه‌هینم.
دیار ژی كر، ژماره من 48ــه ل سه‌ر لیستا 190 یا پارتى دیموكراتی كوردستان بۆ په‌رله‌مانێ كوردستانێ، وه‌كى كارێ په‌رله‌مانى، كارێ سه‌ره‌كى دارشتن و ده‌رئێخستنا قانوونایه و گه‌له‌ك قانوون ژ په‌رله‌مانێ كوردستانێ ده‌رچوویینه و گرنگى ب ئێزدیان هاتیه دان، لێ كێماسى تێدا هه‌نه، دێ كار بۆ نه‌هێلانا ڤان كێماسیان كه‌ین، دوووباره داخوازێ ژ ده‌نگده‌رێن ئێزدى دكه‌م ل رۆژا 20/10/2024ێ هه‌رنه سه‌ر سندۆقێن ده‌نگدانێ و ده‌نگ ب لیستا 190 بده‌ن.
ئه‌م دێ كار كه‌ین بۆ گه‌ره‌نتیكرنا مافێن ئێزدیان و ژیانه‌كا به‌خته‌وه‌ر، ئاینده‌كێ گه‌ش، یه‌كسانى، پێكڤه‌ژیان، دادپه‌روه‌رى و سه‌روه‌ریا قانوونێ.
وشیان خدیدا هه‌روه‌سا ئاماژه ب وێ چه‌ندێ كر كو ئێزدیان ژ خولا ئێكێ یا په‌رله‌مانێ كوردستانێ جهێ خۆ هه‌بوویه، لێ هێشتا پێدڤیه كار بهێته كرن بۆ ب ده‌ستڤه‌ئینانا مافێن وان ب رێكا په‌رله‌مانى و ده‌رئێخستنا قانوونان.
ل داویێ، وێ گۆت ئه‌م دێ كار كه‌ین دا ده‌ڤه‌رێن ئێزدیان بكه‌ڤنه د ناڤ پلانێن ستراتیژى دا بۆ گه‌شه‌پێدانا ئابوورى و زێده‌كرنا خزمه‌تگوزاریان ل ده‌ڤه‌رێن وان ل سنوورێ پارێزگه‌ها دهۆكێ.
هه‌روه‌سا، وێ سۆز دا كو دێ كار كه‌ت بۆ باشتركرنا ژیانا پێشمه‌رگه‌یان و خێزانێن شه‌هیدان، و دێ هه‌وڵ ده‌ن بۆ ناساندنا كه‌یسا جینۆسایدا ئێزدیان ل سه‌ر ئاستێ جیهانێ.
تُتاح هذه الصورة أيضا في: کوردی
