بەرپرسێ پشكا پەیوەندیان ل بنگەهێ لالش:ڕەسەنایەتییا ئۆلا ئێزدیان ب ڕێیا ڤیستەڤالا لالش دێ ئێتە دیاركرن
تۆرا لالش/هۆگر نەجیب
فارس كتی،بەرپرسێ پشكا پەیوەندیان ل دەستەیا بلندا بنگەهێ لالش ڕاگەهاند؛فلكلۆر ناسناما هەر مللەتەكی یە، ئێزدی ئاینەكێ كەڤنارن لەوران ب رێكا ڤێ ڤیستەڤالێ دێ رەسانەیەتییا ئێزدیان ب برگێن جیاواز ئێتە دیاركرن.
بەرپرسێ پشكا پەیوەندیان ل دەستەیا بلندا بنگەهێ لالش بۆ(تۆرا لالش) گۆت:” ڤیستەڤالا لالش نەریتەكێ گرنگێ بنگەهێ لالشە و بنگەهێ لالش گەلەگ ڤیستەڤال گێراینە، لەوران ل رێكەفتی 6/7/2023ێ ڤیستەڤالا لالش ل ژێر دروشمێ (فلكلۆرێ مە ناڤ و نیشانێ رەسانەیەتییا مەیە) ژلایێ بنگەهێ لالش و ب سەرپەرشتییا رێزدار مەسرور بارزانی سەرۆكێ حكومەتا هەرێما كوردستانێ ل هۆلا كۆنفرانسان ب برگێن جۆراو جۆر دێ ئێتە گێران”.
زێدەتر گۆت:” لژنا مە كو لژنا پەیوەندیانە د ئامادەكاریێن ڤیستەڤالێ دە رۆلەكێ گرنگ دگێرت و پشكەكا كاران ستۆێ خۆڤە گرتینە، مێهڤانێن حكومی و سیاسی و كەسایەتیێن جودا جودا یێن ئێزدیان و دەوربەران هەم ل ناڤخۆیا وەلاتی و ژ دەرڤەی وەلاتی و كەسایەتیێن ئەكادیمی یێن بەحسێ دیرۆكا ئێزدیان دكەن ژلایێ لژنا مەڤە هاتینە داخواز كرن”.
رۆنكر ژی بنگەهێ لالش پتری ژ هەزار كەسان بۆ ڤیستەڤالێ هاتینە داخوازكرینە، و ترومبێلێن كرێ مینا كۆستەر و رەفە ژلایێ لژنا پەیوەندییان دگەل لژنیّن دی یێن دەستەیا بلندا بنگەهێ لالش بۆ وان هاتینە بەرهەڤ كرن كو ل رۆژا ڤیستەڤالێ بێ بەرامبەر دێ ژ كەمپان و دەڤەرێن ئێزدیان وان گەهیننە هۆلا كۆنفرانسان ل پارێزگەها دهۆكێ.
