بنگه‌هێ لالش تايێ سنوونێ: گرۆپێن چه‌كدار دڤێن ئێزدیان جاره‌كا دى تووشى مالوێرانیێ بكن
باسنيوز:
خه‌لكێ شنگال ژ ره‌فتارێن خراب یێن په‌كه‌كێ بیزاربووینه, ئه‌ڤه ده‌مێ چه‌ند رۆژایه خه‌لك خۆپێشاندانا دكه‌ن بۆ دابینكرنا ته‌ناهێ ل شنگال.
ئلیاس ناسۆ، مه‌زنێ هوزا شه‌ركا ل قه‌زا شنگال بۆ (باسنیوز) دیاركر: “خه‌لكێ ئێزدى ژ ره‌فتارێن په‌كه‌كێ گه‌له‌ك بیزار بووینه، چونكو ئه‌و بووینه ئه‌گه‌ر ژیان ناڤ شنگالدا نه‌مینت، خه‌لك نه‌شێن هیچ كاره‌كێ بکەن، گه‌له‌ك خێزان دووباره ژ شنگال ئاواره بوون، نوكه خه‌لك بێئومید بوویه بۆ زڤرینا شنگال، گه‌له‌ك جاران مه داخواز كریه په‌كه‌كه شنگال چوول بكه‌ت، مخابن هه‌تا نوكه ناڤ شنگالدا ماینه و به‌رژه‌وه‌ندیا خۆ پارێزن و ئاگه‌ه ژ خرابیا ره‌وشا خه‌لكێ شنگال نینه”.
خه‌یرۆ قاسم، ئاواره‌كێ قه‌زا شنگالى یه ل كه‌مپا شاریا ئاكنجییه، بۆ (باسنیوز) دیاركر: “خه‌لك زۆر دلگران بووینه ژ ره‌فتارێن خراب یێن شنگال رووده‌ن ژلایێ په‌كه‌كى ڤه نوكه ره‌وشا شنگال وه‌سا مه‌ترسیدار بوویه ژیان ناڤ شنگال دا نه‌مایه، كه‌س نه‌شیت زارۆكێن خۆ ببه‌ته شنگال، چونكو گرۆپێن چه‌كدار بتنێ بۆ پاراستنا به‌رژوه‌ندیێن خۆ كار دكه‌ن وان گرۆپان دڤیت جاره‌كا دێ ئێزدیان تووشى جینوسایدێ بكه‌ن، ئه‌ڤه مه‌ره‌ما گرۆپێن چه‌كدار ماینه ناڤ شنگال دا یان چ شولى وان ب شنگال هه‌یه ده‌ستان ژ ئاخا شنگال به‌رناده‌ن و رێزى ل خه‌لكێ لیقه‌ومایێ شنگال ناگرن”.
د. سلێمان فانو، به‌رپرسێ بنگه‌هێ لالش ل ناحیا سنوونێ سه‌ر قه‌زا شنگال ڤه بۆ (باسنیوز) راگه‌هاندكو: “بۆ گرۆپێن چه‌كدار خه‌م نینه چ بسه‌رێ خه‌لكێ شنگال بهیت بتنێ بۆ گرۆپین چه‌كدار یا گرنگه ناڤ شنگال دا بمینت وناكوكیان چێ كه‌ن و نه‌هێلن خه‌لك بزڤرته سه‌ر جهێن خۆ، نوكه ره‌وشا شنگال باش نینه و خه‌لكێ شنگال نه‌چار بوویه خۆپێشاندانا دژى گرۆپێن چه‌كدار بکەن، لێ مخابن گرۆپین چه‌كدار گوهداریا داخوازیێن خه‌لكێ شنگال ناكه‌ن، چونكو ئه‌و گرۆپ نه بۆ خزمه‌تا ئێزدییان هاتینه ناڤ شنگال دا بتنێ وان دڤیت ئێزدیان جاره‌كا دێ تووشى مالۆیرانیى بكه‌ن”.
هه‌رمان میرزا به‌گ وه‌كیلى میرى ئێزدیان بۆ (باسنیوز) دیار كر: “روودانیێن ڤێ دووماهی یێن شنگال ئه‌م زۆر دلگران كرینه ژبه‌ركو خه‌لكێ مه تووشى زیانه‌كا دێ بوویه، دڤیت ئه‌م چاره‌سه‌ریه‌كێ بۆ ره‌وشا شنگال ببینن و گرۆپێن چه‌كدار نه دگه‌ل ئێزدیاتیى و كوردایه‌تیى دانه كو هنده‌ك عه‌ره‌ب یێن ئیناینه ناڤ خۆدا و چه‌كدار كرینه، ئه‌ڤه نه به‌رژوه‌ندیا خه‌لكێ شنگال دایه، وان دڤیت ده‌ڤه‌رێن مه پتر داگیر بكه‌ن”.
ئاماژه دا وى چه‌ندى ژى كو: “ئه‌م گه‌له‌ك دلگرانن ژ خرابیا ره‌وشا شنگال داخوازى دكه‌ین ملله‌تى مه نه‌بیته قوربانى، چونكو ره‌وشا خه‌لكێ باش نینه و داخوازى دكه‌ین چاڤێ مرۆڤایه‌تى ته‌ماشایێ خه‌لكێ مه بكه‌ن و ده‌ستبه‌ردارێ شه‌ر و ئالۆزیان بن، گه‌نجێن مه ده‌ستان ژ گرۆپێن چه‌كدار به‌رده‌ن “.
نایف سه‌یدۆ, قایمقامێ قه‌زا شنگال ب وه‌كاله‌ت و رێڤه‌به‌رێ ناحیا سنوونێ بۆ (باسنیوز) راگه‌هاندكو: “خه‌لكێ شنگال ده‌ست خۆپێشاندانا كرینه بۆ ده‌رئێخستنا گرۆپێن چه‌كدار ژناڤ شنگال ئه‌م دگه‌ل خه‌لكێ خۆ داینه مه دڤیت گرۆپێن چه‌كدار شنگال چوول بكه‌ن و سوپایێ عێراقى پاراستنا سنۆرى شنگال دگه‌ل رۆژئاڤایێ كوردستانێ بكه‌ت و ئێدى ته‌قه نه‌هێته كرن ناڤ مالێن خه‌لكێ دا بتنێ خه‌لكێ شنگال ته‌ناهیى دڤیت ئه‌ڤه ژى مافێ خه‌لكێ لیقه‌ومایێ شنگاله و پێدڤیه حكومه‌تا عێراقى رژدى كار بكه‌ت بۆ دابینكرنا ته‌ناهیى ل شنگال”.
ئاشكه‌را كركو: “ل هه‌لبژارتنین په‌رله‌مانێ عێراقى خه‌لكێ شنگال ب ده‌نگێن خۆ ئه‌و گرۆپ سزا دان و ده‌نگ نه‌دانه گرۆپێن نه‌شه‌رعیێ، پێدڤى بوو ئه‌و گرۆپ رێزى ل بریارا خه‌لكێ بگرن و شنگال چوول بكه‌ن، نوكه ژى خه‌لك خۆپێشاندانان دكه‌ت دبیژته وان گرۆپان شنگال چوول بكه‌ن”.
نایف سه‌یدۆ گۆتژى: “عه‌یبه بۆ حكومه‌ته‌كێ خۆدان سیادە بیت و نه‌شیت پاراستنا خه‌لكێ خۆ بكه‌ت، سیاده‌تا عێراقى هاتییه بنپێكرن ل شنگال، پێدڤیه به‌غدا بێده‌نگ نه‌مینت و سیاده‌تا عێراقى بپارێزت، نوكه خه‌لكێ شنگال خۆپێشاندانا دكه‌ن بتنێ یێ داخوازا دابینكرنا ته‌ناهى ژ عێراقى دكه‌ن”.
