چارەنڤیسێ ئاوارەیێن شنگالێ بەرەف كوڤە؟
لەید حسێن
ئاوارەیێن شنگالێ دسەخترین رەوش دا ژیانا خۆ دەرباز دكن وهێشتا ژبەرمانا پـتـر سێ هەزار ژ كچ وخۆرت ودەیك وزارۆكێن ئێزدی دناڵینن،ژیانا وان هەر رۆژ ب زەحمەت تر وسەخت تر دبت،تونەبوون وكێمبوونا خزمەتكاریان دناڤ كەمپان دا ئاوارەیێن شنگالێ پتر دڵگرانكرینە و بێ هیڤی بووینە،چنكو گرێبەستا پتریا رێكخراوان ب داوی هاتیە.
ئیرۆ رۆژ ئاوارێن شنگالێ هەتا ژچالاكی وخۆلێن رێكخراوان بێ بەهربووینە ونەهاتنا كارەبا نشتیمانی ل دەمێن ئاوارە پێتڤی گەلەك رەوشا وان بزەحمەت تر لێكریە،ژبەركو پلێن گەرمێ بلندبووینە،دیسان ژئەگەرێ هەبوونا پتر ژهێزەكێ ل دەڤەرێن وان ئەو زووبزوو نكارن بزڤرنە دەڤەرێن خۆ ولپەی گۆتنا وان ئەگەر شنگال لسەر ڤێ رەوشێ بچت ئەو دەڤەر دێ بنە سێ بەش وكەس نكارە ژگوندەكی بچتە نك كەسوكارێن خۆ ل گوندەكێ دی ژبەركو هەتا نۆكە ب دەهان كەسێن بێ گونەه پشتی رزگاركرنا سنوونێ وشنگالێ ب دەستێ كەسێن نەنیاس ڤە هاتینە كوشتن ورەڤاندن وچارەنڤیسێ وان هێشتا دیارنینە وهەتا نۆكە وەكو پێتڤی چ خزمەتكاری بۆ وان دەڤەرێن هاتینە رزگاركرن نەهاتینە دابینكرن داكو ببتە رێكخۆشكەرەك بۆ ڤەگەرا وان ئاواران،بەلكو ب مخابنی ڤە ئەڤ حەموو ئەگەرێن بووینە رێگرلسەر ژیانكرنا خەلكێ شنگالێ چ دناڤ كەمپان دا یان گەر زڤرین ل دەڤەرێن وان،ژبەر ڤێ چەندێ ئێدی ئاوارەیێن شنگالێ بێ هیڤی بووینە،چنكو وەكو دیار حەموو ئاریشێن وان یێن هاتینە پشتگۆ هاڤێتن و ئەو دبێژن گەر هەروەسا بمینت تەڤایا تەمەنێ مە دێ ب دەردەسەریێ دەربازبت و ئێدی ئەم دێ مینا ئاوارە وبێ مال هەتا هەتایێ وهەڵبەت هەرئاوارەیەك پێتڤیە كو بۆخۆ ل كارەكی بگەرت ودەرفەتەكێ ببینت ژبۆ وێ چەندێ گەرچ نەبت دا ژیانا خۆ یا رۆژانە پێ ببە سەری لێ نۆكە ب دەهان كچ وخۆرتێن ئێزدی یێن كو كولیژ وپەیمانگەه ب داوی ئیناین بێكارن وژمارەكا كێم ژ وان رێكخراوێن كو ماین دكەمپان دا خەلكێ ژدەرڤەی كەمپێ ل نك خۆ دبەنە كاری و هەر ئەو گەنجێن هەژار بێكار دمینن وچ بۆ پاشەرۆژا خۆ بدەست نائێخن،ئەڤێ چەندێ ژی ئاوارەیێن شنگالێ یێن دناڤ كەمپان دا پتر بێ هیڤی كرینە ژ داینا مافێ وان وەكو هەر وەلاتیەكی.
ئەڤە حەموو دگەهینت كو رەوشا ئاوارەیێن شنگالێ بەرەف خرابیێ دچت و ئەو هەر دەم ل هیڤیا رێكخراوەكا خێرخوازنن داكو هاریكاری بۆ بێتەكرن، چنكو هێشتا گرتی ورزگاربوویێن ئێزدی وەكو پێتڤی نەهاتینە قەرەبووكرن و مافێ جانگۆریێن كارەساتێ نەهاتیە دان و حەموو قوربانیێن وان بتنێ ژدەست وان یێت چووین و هەستیكێن قوربانیان ئەوێن هەتا نۆكە دگۆڕێن بكۆم دا چ بۆ نەهاتیە كرن ،بتنێ ئەو لبەر گەرما هاڤینێ درزن ولبەر باران وسەرمایا زڤستانێ دچن وكەیسا ئێزدیان هێش ب جینۆساید نەهاتیە ناسكرن بەرەف نەمانێ ڤە دچت.
تُتاح هذه الصورة أيضا في: کوردی
