ئاوارێن شنگالێ ل بەندا رزگاركرنا دەڤەرێن خۆنە
رەحمان حەلۆ
كۆمەلگەها سیبا شێخ خدرێ ئێكە ژ كۆمەلگەهێن دەڤەرا گرعزێر یا گرێدایی ب قەزا شنگالێ ڤە، ل سالا (1975) هاتە ئاڤاكرن ب دوراتییا (28)كلم دكەفتە ل ئالیێ رۆژئاڤایێ باژێری، ب دوورترین خالا سنووریا هەرێما كوردستانێ دئێتە ناسین، ل 14 تەباخێ سالا (2007)ێ سیباشێخ خدر تووشی كریارەكا تیرۆرستی یا مەزن بوو كو دوو ترومبێلێن بارهەلگر تێدا هاتنە پەقاندن و ژمارەكا زۆرا خەلكێ سڤیل بوونە قوربانی و زەرەرەكە مەزن گەهشتە خانیێن وێ و هەتا نۆكە ژی چارەنڤیسێ هندەك قوربانیێن ڤێ كارەساتێ دیار نینە.
پشتی ڤێ كارەساتێ پێشمەرگەی رۆلەكێ گرنگ هەبوو ئانكو ئارامییا ڤێ كۆمەلگەهێ 100% هاتبوو پاراستن ژلایێ پێشمەرگەی ڤە ،ژێدەرێ سەرەكیێ ژیانا خەلكێ سیبایێ ژ دوو تشتان پێك دئێت ئەو ژی جۆتیاری وپێشمەرگاتی و سەربازی بوون، ژمارەكا بەرچاڤ یا رەوشەنبیران و مامۆستایان و خووندەڤان و چالاكڤان و هۆنەرمەندان تێدا هەبوون ، ژبەر جوگرافیا وێ كۆ دكەفتە ناڤ گوندێن عەرەب نشین دا ئێكەم دەڤەر بوو ل فەرمانا شنگالێ كو بوو ئارمانجا تیرۆرستێن داعشێ ل 3تەباخێ سالا (2014)ێ و ب درێژاهیا 6 دەمژمێران شەرەكێ دژوار ل دژی داعشێ كرن و گەلەك خورتان د چەپەرێن پێشیێ دا جانێ خۆ دان و نێزیكی 200 كەسان ب دیل هاتنە گرتن ژلایێ دوژمنێ هەموو مرۆڤان ڤە ، هندەك ژ ئێخسیران هاتنە رزگاركرن ژلایێ پێشمەرگەی ڤە و هندەكێن دی هەتا نۆكە دبێ سەروشوینن،وەكو هەموو دەڤەرێن دی یێن هاتینە داگیركرن ژلایێ داعش ڤە خەلكێ وێ ژی ئاوارەی هەرێما كوردستانێ بوون زێدەتری دوو سالانە خەلك دناڤ كەمپێن ئاوارەبوونێ دا ژیانێ دبۆرینن ،خەلكێ سیبایێ ل هیڤی و بەندا مزگینیا رزگاركرنا وێ نە ل سەر دەستێ هێزێن پێشمەرگەیێ قارەمان،دا جارەكی دی ڤەگەرنە سەر وارێ خۆ.
تُتاح هذه الصورة أيضا في: کوردی
