دەولەتا كوردی دێ ل سەر دەستێ سەرۆك مسعود بارزانی ئێتە دامەزراندن
خالد خدر 
نێزیكی سێ سالایە رێكخراوا تیرۆرستییا داعش شەری دكت ل عێراقێ و د ئەنجام دا زیانێن مەزن یێن مادی و گیانی گەهاندی نە پێكهاتەیێن عێراقێ ، هەروەسا رووبەرەكێ مەزن ژ ئاخا عێراقێ داگیر كر بوو ، ب هیمەتا هێزێن پێشمەرگەیێن قارەمان و هێزێن دی یێن لەشكەرێ عێراقێ پتریا وان دەڤەرێن ژلایێ داعش ڤە هاتینە كۆنترۆلكرن جارەكا دی هاتنە ئازاد كرن و زڤرینە ڤە.
ئەڤە پارێزگەها موسل گەلەك نەمایە دێ ئێتە ئازاد كرن دگەل دەڤەرێن دی یێن ماین ، هێزێن پێشمەرگەیی رۆلەكێ ئێكجار مەزن گێرا ل شەرێ دژی تیرۆرستێن داعش ،ب تایبەتی ل پارێزگەها نەینەوا و ل دەڤەرێن كوردستانی یێن سەرب پارێزگەها ناڤهاتی ڤە ، كو پێشمەرگەیی سەركەفتنێن مەزن تۆماركرن ل دژی دڕندەیێن داعش ، كو هەموو جیهان پێ دیدەڤانە و هێژمەكاری وان سەركەفتنێن بێ وێنەیە یێن كو هێزێن پێشمەرگێ كوردستانێ تۆماركرین ، گەلەك نەمایە هەموو دەڤەرێن كوردستانی دێ ب تەمامی ئێنە ئازاد كرن و سنورێ كوردستانێ دێ ئێتە دەینان ب فەرمی هەر چەندە سنور هاتیە دەینان بەریا نۆكە ئانكو پێشمەرگەیێ قارەمان ئەو ب خوونا خۆ دەینایە ، دەولەتبوونا كوردستانێ ژی نێزیكە و دێ خەونا ب سەدێن سالا ئێتە بجهئینان ل سەر دەستێ سەرۆك (مسعوود بارزانی ) دەولەتا كوردی دێ ئێتە دامەزراندن و راگەهاندن ، ئەو مافەكی گەلێ كوردە یێ هەری رەوا كو هەتا نۆكە هیچ مللەتەك ب قەبارێ كوردا نەمایە بێ دەولەت ل سەر روویێ زەمینێ ، ( دەولەتا كوردی خەونا ب ملیۆنایە ژ كوردان ، خەونا ب سەدێن هەزار قوربانیا ، خەونا شێخ عبدالسلام بارزانی یە ، خەونا پیرانی یە ، خەونا بارزانێی نەمرە ، خەونا هەشت هەزار بارزانیا یە ، خەونا ب سەدان هەزار ئەنفال كریا یە ، خەونا ب هەزارا شەهید و قووربانیێن كارەساتا 3ی تەباخێ ل شنگالێ یە ، دەولەتبوون خەونا وان گەنجێن كورد یێن وەریسێ سیدارا دژمنا ماچكرین ، خەونا وان گەنجێن رژێما بەعسا گۆربەگۆر ب ساخی بن ئاخ كرین ، خەونا سروودا ئەی رەقیبە ، خەونا ئالایێ رەنگینێ كوردستانێ ).
دۆزا گەلێ كوردستانێ قۆناغێن گرنگ دەربازكرینە وگەهشتیە ئاستەكی زۆر باش ، ب تایبەتی دڤی ماوێ داوی دا كو رووەكی گەش بخۆڤە گرتییە و گرنگییەكا باش ب هەرێما كوردستانێ تێتە كرن ، نەخاسمە دوارێ دوبلوماسی دا ، و ئەڤ كەسایەتیێن سەرەدانا هەرێما كوردستانێ دكن ل سەر ئاستێ سەرۆك و سەرۆك وەزیرێن وەلاتێن دۆست ئەڤە ژلایەكی ڤە ،ژلایەكی دی ڤە سەرەدانێن شاندێن جۆراوجۆرێن هەرێما كوردستانێ بۆ وەلاتێن جیهانێ ، كو ل ڤێ داویێ سەرۆك (مسعوود بارزانی ) سەرۆكێ هەرێما كوردستانێ بەشداری كری یە ل كۆربەندێ داڤۆس یێ ئابووری ل وەلاتێ سوێسرا ، تێتە زانیین كو كۆربەندێ داڤۆس كۆربەندەكێ ئابووری جیهانی یە ل ئاستێن بلند بەشداری ڤی كۆربەندی دبن ،هەروەسا گرنگییا خۆ یا جیهانی هەیە و بەشداریا جەنابێ سەرۆك بارزانی مفایەكێ زۆر باش دێ گەهینتە هەرێما كوردستانێ كو دیدار و كۆمبوونێن گرنگ دێ ئێنە ئەنجامدان دگەل سەرۆك و كاربدەستێن وەلاتێن زلهێز و مەزن و خودان سەنگ و ب تایبەتی یێن ئابووری.
تُتاح هذه الصورة أيضا في: کوردی
