ژ به‌ر ڤى ئه‌گه‌رى گه‌نج تووشى ئێشێن دلى دبن
نوش نيوز:
تایبەتمەندێ نشتەرگەریێن سینگ و دل و دەمارێن خوینێ ل دھۆکێ دیارکر کو ل پارێزگەھا دھۆکێ نوشدارێن دلی رێيا دەمارێن د ناڤ سینگێ مرۆڤێ دا ڤەدگوھێزن. دەمێ کەسەک تووشی ئێشا دلی دبیت د حالەتێ نشتەرگەریێ دا ئەو دەمارێن تەنگ یان یێن گرتی چارەسەر دکەن.
د. ئاشور یوحه‌نا، تایبەتمەندێ نشتەگەریێن سینگ و دل و دەمارێن خوینێ بۆ (نۆش نیوز) ئاشكه‌را كر كو چاندنا دەمارێن خوینێ ل دھۆکێ وەکو دەولەتێن پێشکەفتی دھێتە ئەنجامدان، “رێژا سەرکەفتنێ ژی گەلەک يا باشە”.
ئاماژە دا وێ چەندێ ژی کو هه‌كه دەمارێن خوینێ د تەنگ یان د گرتى بن خوینا نه‌خۆشى ب ره‌نگەکێ دروست ناگەھيتە زه‌بله‌كێن دلی و بێھنا نەخۆشى تەنگ دبیت و سینگێ وێ دئێشيت بۆ دەمەکى، “چو ئەگەرێن دەست نيشانکری ژى نینن، به‌لێ ھندەک تشت ھەنە ڤێ نەخۆشی زێدە دکەن وەکو کێشانا جگاران”.
د. ئاشور یوحه‌نا ئاشکرا کر کو ئێشا شەکری و فشارا خوینێ و کولسترول و کێم ئه‌نجامدانا وەرزشێ ئەگەرن كو وەلاتی تووشی ئێشا دلی ببن، “بەری نوکە کەسێن سەر 50 سالیێ دا تووشی ڤێ نەخۆشيێ دبوون، به‌لێ نوکە ئەم یێ دبینن نه‌خۆشێن مە پتر گەنجن، سینگی وان دئێشيت و بێھنا وان تەنگ دبیت ب تایبەتی د حالەتێ ب رێڤەچوونێ دا، پتر بێھن تەنگى بۆ وان دروست دبیت”.
زێدەتر گۆت: “دەمێ دەمار تەنگ دبیت ب دەرمان و بالونێ ناهێته ڤه‌كرن، بەلکو دەمێ دھێتە گرتن یان تەنگ دبیت پێدڤیە نشتەرگەریا چاندنا ده‌ماران بۆ بهێته کرن”.
دا زانين ژى كو ئەو دەمارێن د ناڤ سینگى دا ئەو ب رێيا وان ڤەدگوھێزن و دداننە سەر دلی و گۆت: “ئەو خوینێ ب ره‌نگه‌كێ دروست ڤەگودھێزن، ب رێژەکا باش سەرکەفتنێ دئینيت. ل دھۆکێ زۆر حالەت ھەنە كو زارۆ پێدڤی نشتەرگەریا دلی بن، ئەڤە ڤەدگەریت بۆ کێم ئه‌نجامدانا وەرزشێ و خوارنا نەيا ساخلەم و گەلەک ئەگەرێن دى ھەنە پێدڤیە ڤەکۆلینەک ل دھۆک بھێتە کرن دا كو ئەگەرێن تووشبوونا وەلاتیان ب ڤان نەخۆشیان بھێنە دەست نێشانکرن”.
د. ئاشور خۆیا ژی کر کو ل دھۆکێ چاندنا دەماران دھێتە کرن و زۆر حالەت ھەنە و ئەو کێماسیين بەرێ ھەموو نەماینە، چونکو ئامیرێن پێشکەفتی یێن ھاتینە دابینکرن بۆ نشتەگەریێن چاندنا ده‌مارێن دلێ، بەری نوکە ھەتا حه‌ف دەمژمێران نەخۆش د نشتەرگەريێ دا دما، “به‌لێ نوکە کێمتر دمینيت و رێژا سەرکەفتنی ژی پترە ژ جاران”.
تُتاح هذه الصورة أيضا في: کوردی
