هۆنەرێ شێوەكاری پەیامەكا تایبەت هەیە بۆ گەهاندنا نەخۆشیێن ئێزدییان
تۆرا لالش یا راگەهاندنێ
شێوەكارێ ئێزدی”خدر قوال ئسماعیل” نۆكە ل وەلاتێ سوید ئاكنجیە،د دیدارەكێ دا بۆ رۆژناما دەنگێ لالش راگەهاند:”هۆنەرێ شێوەكاری پەیامەكا تایبەت هەیە بۆ گەهاندنا دەردەسەری و نەخۆشیێن نۆكە ئێزدی تێرا دەرباز دبن وئەو تاوانێن ب سەری هاتین،دیسان دگەل برایێ خۆ هەول ددەین ب شێوەیەكێ گشتی قەبارێ كارەساتا ئێزدیان ل شنگالێ نیشا وەلاتێن رۆژئاڤا بدەین،تەكەز كر هەرسال ب هەلكەفتا سالڤەگەرا كارەساتێ پێشانگەها ڤەدكەین و تابلۆیێن نوو نمایشدكەین”.
ل دۆر دەستپێكا كارێ خۆ یێ شێوەكاری”خدر قوال ئسماعیل”دیاركر:”دەمێ ل قۆناغا سەرەتایی من حەز ل سەر هەبوو ول قۆناغا ناڤنجی پشكداری دپێشانگەهێن سالانە دە دكر،لێ دەمێ چوویمە كولیژا ئادابێ ل بەغدایێ حەزا من پترلێ هات ول دەمێ ڤالا دچوومە جیێ وێنەكێشانێ ل كولیژێ داكو شیانێن من باشتر لێ بێن ول وێدەر گەهشتمە (د.خالد الجادر) سەرپەرشتێ وێنەكێشانێ وسەرۆكێ سەندیكا هۆنەرمەندێن ئەرەب و سەرۆكێ هۆنەرمەندێن عێراقێ بوو،مادا دیرۆكا هۆنەری ل ئەكادمییا هۆنەرێن جوان دگۆت گەلەك زانیاری هەبوون كەسەك ژهەژی بوو ب مامۆستایێ نمونەیی دهاتە ناسین ومە پشكداری دپێشانگەهێن كولیژێ یێن سالانە دا دكر،زێدەباری پێشانگەهێن تایبەت یێن شیان هەبان،ل سالا 1970ێ پێشانگەها من یا تایبەت ل كولیژا زانستی هاتە ڤەكرن”.
سەبارەت تابلۆیێن خۆ یێن هۆنەری”ئسماعیل”دبێژت:”دڤێت مرۆڤ راهێنانێ ل سەر هەموو رەنگا بكت یێن زەیتی وئاڤی وخیچكێشان وباستیل وئەكریل،ژبەركو هەر ئێكی تامەك تایبەت هەیە،دەربارەی قوتابخانا گەلەك هەینە ب تایبەتی یێن نوخواز ئەز سەر ب خواندگەها (انتباعی) ڤە مە”.
دەربارەی هۆنەرێ شێوەكاری یێ ئێزدییا و نیشاندانا قەبارێ كارەساتا ئێزدیان ل شنگالێ،ناڤهاتی گۆت:”پشتی كارەساتا شنگالێ ب شێوەیەكێ تایبەت هۆنەرێ شێوەكاری یێ ئێزدییا بەر ب ئاستەكێ باش چوو وهۆنەرمەندێن ئێزدی كاری نەخۆشی و وان كاودانێن ب سەرێ ئێزدییا هاتین بكەنە وێنە دتابلۆیێن خۆ دە ول سەر ئاستێ نێڤ دەولەتی بەلاڤ كن،ل ئەلمانیا هۆنەرمەند(مسافر قاسم) و(قاسم شەرقی)پێشانگەهێن تایبەت ل دۆر رەوشا ئێزدییا ڤەكرن و ل فەرەنسا ژی هۆنەرمەند (خدردحام) چەندین پێشانگەه ل سەر نەخۆشیێن ئێزدییا ڤەكرن وهۆنەرمەند (عامر رەسام)ژی چەندین پێشانگەهێن تایبەت ب ئێزدییا ڤەكرن و هۆنەرمەند(كەمال حەراقی) چەندین تابلۆ ل سەر ڤێ چەندێ نیشانداینە،دیسان ئەز و برایێ خۆ (سەلام قەوال) سالانە ل بیرئانینا رۆژا كارەساتێ پێشانگەهەكا هەڤپشك ل وەلاتێ سوید ودانمارك ڤەدكەین ودراڤێ فرۆتنا وان بۆ ئێتیمێن شنگال ڤرێدكەین ومە هەولدایە ب شێوەیەكێ گشتی قەبارێ ڤێ كارەساتێ نیشا وەلاتێن رۆژئاڤا بدەین”.
هەروەسا ژ ئالیێ ڤەكرنا پێشانگەهان ڤە شێوەكاری دیاركر:”دەمێ قوتابی ل قۆناغا سیێ ل كولیژا ئادابێ ل زانكۆیا بەغدا من پێشانگەه ڤەكرینە ودەمێ بوویمە مامۆستا من بسپۆریا خۆ پیادە نەكر سەبارەت وانەگۆتنا پەروەردا هۆنەری ل ناڤنجییا بعاج و ل سوید من پێشانگەهێن تایبەت ڤەكرینە”.
دلایێ رۆلێ هۆنەرێ شێوەكاری بۆ گەهاندنا ئازارێن ئێزدییا بۆ جیهانێ راگەهاند:”هەموو شێوێن هۆنەری رۆلەكێ سەرەكی هەیە سەبارەت گەهاندنا نەخۆشی وئێش وئازارێن مللەتێن زەرەرمەندو بن دەست ، هۆنەرێ شێوەكاری پەیامەكا تایبەت هەیە بۆ گەهاندنا دەردەسەری و نەخۆشییا ب تایبەتی كاودانێن نۆكە ئێزدی تێرا دەرباز دبن وئەو تاوانێن ب سەری هاتین، پترییا تابلۆیێن هۆنەری ل سەر ئازادیێ نە یاكو مافێ هەر مرۆڤەكی یە سەر ئەردی وئازادی مرۆڤاتیێ پەیدادكت یاكو ئارمانجا هەر مرۆڤەكی ب مەرجەكی سڤكاتی پێ نێتە كرن”.
دیسان ل سەر كارێن خۆ یێن نوو دازانین،هەرسال ب هەلكەفتا سالڤەگەرا كارەساتا رەش ئەم پێشانگەها ڤەدكەین و تابلۆیێن نوو نمایشدكەین و ئەم ئیرۆ پێتڤی بەرەبابەكی پێگەهاندی و رەوشەنبیرێن بهایێ هۆنەری بزانت پووتێ ب هەموو بیاڤێن زانستی بدەت نەك بتنێ باوەرنامەكێ بدەستخۆڤە بینت،چنكو گەلەك كەس یێن هەین نەخوندەوارن،لێ شیانێن شرۆڤەكرن و رەخنا تابلۆیا هەیە ول سەر ئاستێ زانستی دهەلسەنگینن.
تُتاح هذه الصورة أيضا في: کوردی
