د ئێزدیاتیێ دا(غیرەت ژ ئیمانێ یە)
پیر خەلات ئەلیاس
هەتا ژ وە بێت خۆ بناسن وە عەمرەک یێ هەی و هوون هەتا هەتایێ ساخ نابن، مخابن ئەڤ وەخت و دەمە ژ عەمرێ وەیە و گەلەک کەسان و رێژەیا بتر ژ خەلکێ دەمێ خۆ یێ کریە دەمێ (بێ پوتەیێ و مچی ژێ) بەلێ ئیرۆ غیرەتا دینی ژ ئیمانێ یە و هەر کەسێ هاژی خودێ و رێیا ئۆلا خۆ هەبت دێ ل رێیا راست رێیا خودێ چت و گوهێ خۆ نادەتە نەزان و بێ غیرەتە و بێ پوتەیان و مچی ژێیان و هوون هەموو بەر پسیارێن رێیا ئۆلا خۆنە و غیرەت و ئیمانا وە شەهدەیە.
ژ ئەدەبێ دینێ مە ئێزدیان دبێژت:
شکەستیمە بەستنا من ب مالێت میرە
هەی هەسەدۆ ئی خادمێ پیرە
فەروارامە ب خەلکێ عیرف و زانا و ژیرە.
رامان ژڤێ سەبەقێ دبێژت: خلمەتا ب ئاقلی بکە دێ گەهیە راستیێ و مرازێ، لەوما بۆمە دایە دیارکرنە ژ قەولێ پیر هەسن دبێژت:
هەکە ل عەردا تە نەبت غیرەت
و دلێ تە نەشۆزت ب قەوم ملەت
ئاگر هەیە دێ ل تە بتە غەزەب.
گەلەک هەینە دل کەسەرن
خەوێت شەڤا ل خۆ د بڕن
سەر قەوم و ملەت ب هەگەرن
ئەو چو بازارا ناخەسەرن.
رامان ژ ڤان هەردوو سەبەقا دبێژت: مرۆڤێ بێ غیرەت دلێ وی ب کەسەکی ناشۆزت و نەگودارە و هەکە رۆژەکێ بتە هەق و حساب لسەر ڤان کەسێن بێ بەهر ژ غیرەتێ دێ بەرێ خۆ دەیێ کەسێ بێ غیرەت ئی دوورە ژ دیندارا خودێ و مللەتی ، لەوما دڤێت هوون خودان وەژدان بن و هوون ب غیرەت و ئیمان بن.
ژ ئەدەبێ دینێ مە ئێزدیان دبێژت:
خێر و شەر ل دنیایێ ب دەستێ وەنە
عەمەلێ مە میزانە
ل ڤێ دنیایێ ب مەرا گەریانە.
رامان ژڤێ سەبەقێ دبێژت:
یێ هەڤالێ رێیا خودێ و خێرێ بت دێ غیرەت لێگەرێت و دێ ب سەرکەڤت.
و یێ بێ پوتە و نەبتە هەڤالێ رێیا خودێ دێ روو رەش بت و دێ ب خەلکێ تەحل و بێ رەوشت بت.
ژ ئەدەبێ دینی دبێژت:
دبێژمە گەلی ئەزدایانە
خەلاتێت تاووسی مەلەک ب گەلەک رەنگانە
بەلێ غیرەتا دینی سەرێ هەمووانە.
هەر وەسا ژ بەیتا سوبێ دبێژت:
ئیمان ئەوە یا وە بری
هوون چاڤ نەدەنە خەلکێ موشەمری
دا تالیا وە رانەبت ب نەزانی و کفری.
رامان ژ ڤێ سەبەقێ دبێژت:
هوون لسەر ئۆل و باوەریا خۆ بن و گوهێ خۆ نەدەنە خەلکێ موشەمری ئانکو یێن بەرەدای و بێ پوتە دا ئوجاخا هوون تێ رابوین نەبتە ئاخ و نە ل شونا گولا ستریا بینن، بلا ل شونا گولا هون ئالقوت و ئاماسان هلینن.
تُتاح هذه الصورة أيضا في: کوردی
