تیكتۆك و یاریێن ئه‌لكترۆنى كارتێكرن ل سه‌ر قوتابیان دێ هه‌بت
بكارئینانا تیكتۆكى و یاریێن ئه‌لكترۆنى بوویه پشكه‌كا مه‌زن د ژیانا قوتابى یا رۆژانه دا،ب شێوه‌یه‌كێ گشتى كارتێكرنه‌كا ب هێز ل سه‌ر ده‌روون و هزرا قوتابى و ل سه‌ر هه‌موو قۆناغێن خووندنێ هه‌یه.
تۆرا لالش یا راگه‌هاندنێ /راپۆرت:ناسر شه‌هوانى
حه‌جى شه‌هاب،وه‌ك سه‌میانه‌كێ قوتابیان بۆ ده‌نگێ لالش گۆت:ب لێبورین ڤه دایك و باب زۆر ژ زارۆكێن خۆ د بێ ئاگه‌هن،ئه‌م دكارین بێژین خێزانێ رامانا خۆ یا ژ ده‌ست داى، ده‌یك و بابان ڤیان و رێزگرتن و به‌رپرسیاره‌تى و بریار و رێڤه‌برن و كۆنترۆلكرن د مالدا نه‌مایه،پشكا هه‌ره زۆر ژ زارۆكان د مالێ دا په‌رتۆك و خووندن و زانینا وان بوویه پوپجى و یاریێن ئنترنێتێ و خه‌ما وان یا ژ هه‌موویا مه‌زنتر موبایلا وان ژ جۆرێن موبایلێن هه‌ره باش و ب هێز بت و هێلا ئنترنێتێ 24 ده‌مژمێرا یا كارا بت و یا بله‌ز بت،شه‌ڤێ هه‌موویێ ل مال یان كافیێ یان ل سه‌ر جاده‌یه‌كێ یێ هشیاربت و ب رۆژێ یێ نڤستى بت ئێدى نه‌یا گرنگه ساخله‌میا وى یان ره‌وشت و په‌روه‌رده و فێركرنا وى یان ئاستێ خووندن و زانین و به‌رپرسیاره‌تیا وى چى لێ بێت.
هه‌ر ل دۆر ڤى بابه‌تى قوتابى بارزان نه‌زار،بۆ ده‌نگێ لالش دبێژت:بكارئینانا تیكتۆكى و یاریێن ئه‌لكترۆنى بوویه پشكه‌كا مه‌زن د ژیانا قوتابى یا رۆژانه دا و ب شێوه‌یه‌كێ گشتى كارتێكرنه‌كا ب هێز ل سه‌ر ده‌روون و هزرا قوتابى و ل سه‌ر هه‌موو قۆناغێن خووندنێ هه‌یه، هه‌روه‌سا ژینگه‌ها قوتابى تێكدایه و ئه‌ڤێ چه‌ندێ ژى كارتێكرنا خۆ هه‌بوویه كو قوتابى بێته پاشگوه هاڤێتن ژلایه‌نێ په‌روه‌رده‌یى ڤه.
سه‌باره‌ت كارتێكرنا سۆشیال میدیایێ ل سه‌ر قوتابیان،مامۆستا ده‌خیل خه‌له‌ف،بۆ ده‌نگێ لالش دیاركر،به‌ربه‌لاڤبوونا ئینترنێتى و سۆشیال میدیایێ و هه‌بوونا چه‌ندین یاریێن ئه‌لكترۆنى یێن زه‌ره‌رمه‌ند كارتێكرن ل خووندنا قوتابیان كریه،هه‌روه‌سا نه‌بوونا هشیاریێ ل نك قوتابى و هنده‌ك سه‌میانێن وان ڤه كو تاراده‌یه‌كى زارۆكێن خۆ پشتگوهـ ڤه هاڤێتینه و بۆ خووندنێ نابنه پالده‌ر بۆ زارۆكێن خۆ، داخوازێ ژ سه‌میانێن قوتابیان دكه‌م زارۆكێن خۆ بێ به‌هر نه‌كه‌ن ژ خووندن و فێربوونێ،دیسان دڤێت ببنه پاڵده‌ر بۆ زارۆكێن خۆ،ژلایه‌كێ دى ڤه مامۆستا ژى دڤێت ب دلسۆزى و ب به‌رپرسیارانه كاربكه‌ت و خۆ ماندى بكه‌ت ئه‌و ژى ژ پێخه‌مه‌ت پێگه‌هاندنا نفشه‌كێ ساخله‌م،چنكو یه دیار و به‌رچاڤه ل ڤان چه‌ند سالێن داویێ دا ئاستێ زانست و زانینێ به‌ره‌ف لاوازیێ ڤه چۆیه.
هه‌روه‌سا رێڤه‌به‌رێ ئاماده‌یا كه‌مپا ئێسان یا تێكه‌ل عیدۆ خدر بۆ ده‌نگێ لالش خویاكر، پێتڤیه ل سه‌ر خێزانا مرۆڤى زارۆكێن خۆ فێرى حه‌ز ژێكرنا خووندنێ و پاراستنا قوتابخانێ بكن،ده‌یك و باب چاڤدێریا زارۆكێن خۆ بكه‌ن داكو چ جاران نه‌كه‌ڤنه شاشیێن یاریێن ئه‌لكترۆنى،چنكو قوتابیێن ئه‌ڤى ده‌مى جیاوازن ژ سه‌رده‌مێ بۆرى و گه‌له‌ك جاران ئه‌م دبینین قوتابى ده‌مێ خۆ ل سه‌ر تیكتۆكى و یاریێن ئه‌لكترۆنى یێن زه‌ره‌رمه‌ند ده‌رباز دكن، ده‌مێ ده‌یك و باب زارۆكێن خۆ باش په‌روه‌رده نه‌كه‌ن هنده‌ك كه‌سێن بیانى دێ په‌روه‌ردا خۆ نیشا وان ده‌ن كو ب هیچ شێوه‌كى ل ئاستێ په‌روه‌ردا وان نینه،دڤێت بكارئینانا تۆرێن جڤاكى ل بن چاڤدێریا ده‌یك و بابا بت،چنكو ئه‌گه‌ر چاڤدێرى نه‌بت پشت ب راستى دێ كه‌ڤنه بن شه‌پۆلا خرابیێ و بێ ره‌وشتیێ و بێ رێزگرتنێ و دێ كه‌سایه‌تیه‌كا خراب و نه‌باش ژێ ده‌ركه‌ڤت و وه‌سا دێ جڤاك و ئاستێ خووندنێ به‌ره‌ف وێرانبوونێ چت.
ژلایه‌كێ دى ڤه چالاكڤان عه‌لى حسێن،بۆ ده‌نگێ لالش دیاركر،هه‌ر ژ ده‌ستپێكا به‌لاڤبوونا تیكتۆكى و یاریێن ئه‌لكترۆنى گه‌له‌ك ره‌وشه‌نبیران و بسپۆرێن په‌روه‌رده‌یى و جڤاكى ب ده‌نگه‌كێ بلند دكرنه هاوار و دگۆتن هشیارى بكارئینانا وان بن و هشیارى زارۆكێن خۆ بن، لێ رۆژ بۆ رۆژێ بكارهێنه‌رێن وان زێده‌تر لێ هاتن و قوربانیێن وێ زۆرتر لێ دبن،د نۆكه‌دا ده‌مێ ئه‌وێ چه‌ندێ یه ئه‌م ئه‌نجامێن تۆرێن جڤاكى ل سه‌ر ئاستێ په‌روه‌ردێ ببینین بڤى شێوه‌ى دێ باش بۆ مه رۆن بت كو سال بۆ سالێ ئاستێ قوتابیان لاوازتر دبت.
س.س
تُتاح هذه الصورة أيضا في: کوردی
