ئەندامەكێ بنگەهێ ڤەكۆلینێن ئێزدیناسیێ:
ئێدی ئێزدیناسی ل سەر بنەمایێن پسپۆری و ستانداردێن جیهانی دێ ئێتە ڤەكۆلینكرن و ناساندن
تۆرا لالش:
ئەندامەكێ بنگەهێ ڤەكۆلینێن ئێزدیناسیێ ل ئەلمانیا دیاركر كو ئەڤ بنگەه یێ ئەكادیمی و لێكۆلینا و ناڤدەولەتی و سەربەخۆیە،كار ل سەر لێكلۆلینان و پەروەردێ و بەلگەكرنا چاند دیرۆك و ئۆلا ئێزدیاتیێ و جڤاكێ ئێزدیان دكەت،خەباتێن لێكۆلینێ یێن خۆ ل سەر بنەما و ستاندارتێن زانستی و ئەكادیمی یێن نێڤدەولەتی ئەنجام ددەت،نەخاسمە پێشخستنا جڤاك و پاراستنا ناسنامەیا چاند و ئۆلییا ئێزدیان ل وەلاتێ وان و ل دەرڤەی وەلاتی،لەوما ب ڤێ پێنگاڤێ ئێزدیناسی دەربازی قۆناغەكا نوو یا وارێ نڤیساندنا ئەكادیمی و رۆژهەلاتناسیێ دا دبە،ژبەركو ئێزدیناسی و كەلتوورێ ئێزدییان ئێدی دێ ل سەر بنەمایێن پسپۆری و ستانداردێن زانستی یێن جیهانی بێتە ڤەكۆلینكرن،ناساندن و پاراستن.
د.قادر سەلیم شەمۆ،ئێك ژ دامەزرینەر و بنگەهێ ڤەكۆلینێن ئێزدیناسیێ ل ئەلمانیا بۆ رۆژناما دەنگێ لالش دیاركر،ئێزدی و ئۆل و ئێزدیاتی،ب تایبەتی پشتی جینۆسایدا سالا 2014 كو ژ ئالیێ دەولەتا ئیسلامی یا داعش ل دژی ئێزدیان هاتە ئەنجام دان، ژ نوو بالا جیهانێ كشاند و ڤێ یەكێ نەبوونا زانیاریان و ئاگاهیێ ل سەر جڤاكا ئێزدی و هەروەسا هەوجەداریا لێكۆلینێن ب سازی دەرخستە هۆلێ، دیسان ئەڤێ جینۆسایدێ رەوشا جڤاكا ئێزدیان ل وەلاتێ وان كوردستانێ و سەرانسەری جیهانێ گوهارت،لەورا مە دیت ئێدی دەمە كو ئێزدیناسیێ و جڤاكا ئێزدیان ل سەر نەخشەیا ئاكادەمیك یا ناڤنەتەوەی ب جیهانی بكەین،ئەو بوو ژ دەرئەنجامێ كەد و هنەرێ چەند سالی بنگەهێ ڤەكۆلینێن ئێزدیناسیێ د ئەیلولا سالا 2022دا ل وەلاتێ ئەلمانیا ژ ئالیێ پرۆفێسور د. سێباستیان مایسل، د. قادر سەلیم و سامی سەلیم ڤە ب فەرمی هاتە دامەزراندن،بنگەهێ ڤەكۆلینێن ئێزدیناسیێ، بنگەهەكێ ئەكادیمی و لێكۆلینا یێ ناڤدەولەتی و سەربەخۆیە،كار ل سەر لێكلۆلینان و پەروەردێ و بەلگەكرنا چاند دیرۆك و ئۆلا ئێزدیاتیێ و جڤاكێ ئێزدیان دكەت،خەباتێن لێكۆلینێ یێن خۆ ل سەر بنەما و ستاندارتێن زانستی و ئەكادیمی یێن نێڤدەولەتی ئەنجام ددەت، نەخاسمە پێشخستنا جڤاك و پاراستنا ناسنامەیا چاند و ئۆلییا ئێزدیان ل وەلاتێ وان و ل دەرڤەی وەلاتی ژ كار وخەباتێن سەرەكی یێن بنگەهێ ناڤهاتینە.
دەربارەی دامەزراندنا بنگەهێ ناڤبری ئاشكەراكر،هەولێن دامەزراندنا بنگەهی ڤەدگەرێت بۆ ئادارا سالا 2017 دەمێ من پرۆژەیێ خۆ یێ پشتی دكتۆرایێ(postDoctoral – پۆستدۆكتۆرایێ) دەربارەی جینۆسایدا ئێزدیا ل زانینگەها مونشن ل ئەلمانیا د نڤیسی د وی دەمیدا كار هاتەكرن بۆ ئاڤاكرنا ئەڤی بنگەهی، بەرنامەیێ وی هاتە پێشكێشكرن بۆ ئەنستیتویا رۆژهەلاتا نێزیك و ناڤین ل زانكۆیا مونشن و پەسەندا دەستپێكی بۆ دامەزراندنا سازییەكا وەها ژ بۆ ڤەكۆلینێن ئێزدیناسیێ سەر ب زانینگەها ناڤهاتی ڤە هاتە وەرگرتن،لێ پەیدابوونا نەخۆشییا كۆرۆنا و دەركەفتنا هندەك ئاستەنگیێن دی بوونە ئەگەر ئەڤ كارێ یێ ل دۆر ئێزدیناسیێ ل زانینگەها ناڤبری نەئێتە ئافراندن، لێ هەولێن مە د بەردەوامبوون ئەوژی بۆ بدەستڤەئینانا ڤێ ئارمانجێ، ل رۆژا 18/4/2021،مە پەیوەندی ب پرۆفێسور د.سێباستیان مایسل ل زانینگەها لایپزیگ ل ئەلمانیا كر، پشتی دانوستاندنێ و پێكگوهاستنا بیر و بۆچۆنان، پرۆفێسور مایسل نەبتنێ دلخۆشییا خۆ ژ بۆ ڤی پرۆژەیی دەربری بەلكو دوپاتكر كو بنگەهێ ڤەكۆلینێن ئێزدیناسیێ دێ پێنگاڤەكا بنگەهین بت و دێ بەرێ بنیاتێ بت ژ بۆ ئافراندنا سازییەكا زانستی و بەرفرەهتر ئانكو پشكا ڤەكۆلینێن ئێزدیناسیێ سەر ب زانینگەهەكا باوەرپێكری ل ئەلمانیا پشتی كار و كەدا بتر ژ سال و نیڤێ ب هەڤرا، ل ئەیلولا 2022مە هەردووا و دگەل مە دا بەرێز سامی سەلیم كو قوتابیێ ماستەرێ یە ل زانینگەها بەرلین، ب فەرمی دامەزراندنا بنگەهێ ڤەكۆلینێن ئێزدیناسیێ راگەهاند و دگەلدا مالپەرەكێ ئەنتەرنێتی یە ب تایبەت ل ژێرناڤ و نیشانێ(www.yezidistudiescenter.org)ئافراند، نۆكە ئەڤ بنگەهە ل قۆناغا خۆ یا دەستپێكێیە،لێ هنەرەك باش دئێتە كرن ژبۆ جێبەجێكرنا پلان و ئارمانجێن وی.
د.قادر سەلیم ئەو چەندە ژی دیاركر،ل گۆرەی دیتنا مە، دامەزراندنا ڤی بنگەهی پێنگاڤەكا گرنگە د دیرۆكا ڤەكۆلینێن ئێزدیناسیێ دا، و بنەمایەكە ژ بۆ ئاڤاكرنا پشكا ڤەكۆلینێن ئێزدیناسیێ سەر ب زانینگەهەكا ناڤدارا دونیایێ ڤە ل ئەلمانیا،لەوما ب ڤێ پێنگاڤێ ئێزدیناسی دەربازی قۆناغەكا نوو یا وارێ نڤیساندنا ئەكادیمی و رۆژهەلاتناسیێ دا دبە،ژبەركو ئێزدیناسی و كەلتۆرێ ئێزدیان ئێدی دێ ل سەر بنەمایێن پسپۆری و ستانداردێن زانستی یێن جیهانی بهێتە ڤەكۆلینكرن، ناساندن و پاراستن،وەكو ئاماژە پێ هاتیە دان، ئێك ژ ئارمانجێن هەرە گرنگ یێن بنگەهێ ڤەكۆلینێن ئێزدیناسیێ خورتكرنا قادا ئەكادیمی و زێدەكرنا پێشكێشیێن لێكۆلینكرنا جڤاكی یە،پلانا مەژی ئاڤاكرنا سازیەكا گرێدایی زانینگەهەكا پەژراندییە كو دێ خزمەتا د پلانا مەدا پێشكێشە بۆ تەخا ئەكادیمی كو یێن د خوازن د بوارێ ئێزدیاتیێ و ئێزدیناسیێ كار بكەن و ل ڤر چەند چالاكیێن پلانكری هەینە،ئەو ژی ئامادەكرن و پێشخستنا پرۆگرامەكێ ژبۆ مۆدول/ دەرس یان خوەندنا ئێزدیاتیێ و ئێزدیناسیێ،هاندان و پشتەڤانیكرنا خوەندەكارێن دكتۆرایێ ژ بۆ نڤیساندنا تەزێن خوە ل دۆر ئێزدیناسیێ،رێكخستنا دبستانا هاڤینێ ل سەر ئێزدیناسیێ،وەشاندنا پەرتۆكا سالانە ل سەر ئێزدیاتیێ وئێزدیان،ل دارخستنا كۆنفرانسەكی سالانە د وارێ ئێزدیناسیێ دا،پێشكێشكرنا دەرفەتان د پێشخستنا فاكولتەیێ دا،كاركرن بۆ پەڤگوهەرتنا مامۆستا و خوەندەكاران دناڤبەرا ئەلمانیا و وەلاتێ واندا،پێكئانینا پرۆژەیێن لێكۆلینێ، و لێكۆلینكرن ل سەر مژارێن گرێدایی ئێزدیاتیێ و گەلێ ئێزدی،ژبۆ پرۆژەیێن لێكۆلینێیێن ناڤنەتەوەی یێن دەربارەی ئێزدیناسیێ، لێگەریان و تەرخانكرنا ئالیكاریێن دارایی.
ل دۆر بەرنامەیێن پێشكێش دكەن د.قادر سەلیم گۆت:بنگەهێ ڤەكۆلینێن ئێزدیناسیێ بەرنامەیێن پەروەردەیی،چاندی و یێن دن پێشكێشی جڤاكێن ئێزدیان و ب تایبەتی تەخێن بێ هێز و بێ دەرفەت دكەت، ژ وانا كار دكەت ژ بۆ دابینكرنا دەلیڤەیێن پەروەردە و فێركرنێ ژبۆ تەخێن جودا جودا یێن جڤاكی،زێدەكرنا زانین و تێگەهشتنا چاند و ئۆلا ئێزدیاتیێ،پشتگیریا پرۆژەیێن پێشكەفتنێ یێن پێشەنگیا جڤاكی،پێشخستن وموكومكرنا تێگەهێ گیانێ لێبۆرینێ و بهەڤرە ژیانا ئۆلی و چاندی،ئاڤاكرنا ناڤەندێن پەروەردە و پێشخستنا جڤاكی ل هەرێمێن ئێزدیان،چێكرنا و وركشۆپا ل سەر مژارێن پەروەردێ و پیشەیی و یێن دن یێن ئەكادیمی،سازكرنا سمینار و وركشۆپا ژبۆ لێكۆلینا ئێزدیاتی و گەلێ ئێزدی،دابینكرنا سەفەربەریا خوەندنێ دناڤبەرا جڤاكێن ئێزدیان دە،بەلاڤكرنا ئاگاهیان و ڤەكۆلینان ل سەر چاند و ئۆلا ئێزدیاتیێ.
تُتاح هذه الصورة أيضا في: کوردی
