Qaymeqamê Duhokê: Îsal plan hatiye kirin ku bayê 30 milyar dînaran proje bên bicîhanîn

BasNews – Qaymeqamê qeza navendî ya Duhokê ragehand, îsal plan hatiye danîn ku bayê 30 milyar dînaran proje bên bicîhanîn.
Qaymeqamê qeza navendî ya Duhokê Cehwer Elî Ezîz ji BasNewsê re ragehand: ‘’Di berdewamiya cîhbicîh kirina projeyên xizmetguzariyê de, parêzgeha Duhokê îsal ango 2023yê jî planên wê yên pir baş hatine danîn û ji aliyê saziyên ser bi îdareya Duhokê ve hejmarek proje hatine pêşneyar kirin. Wek çêkirina rê û kanalên av a pîs û projeya elektrîk, av û perwerde û tenduristî di nav wê planê de cîh digrin. Giringiyekî zêde ji bo çêkirina rêyan jî hatiye dayîn.’’
Herwaha got: ‘’Îsal me pêşneyar kiriye bayê 30 milyar dînaran proje bên cîhbicîh kirin. Dibe ku ji vê rêjeyê jî zêdetir be û dibe kêmtir jî be, lê em li benda rezamendiya hikûmetê ne.’’