“بیرەوەریا رێککەفتنا ١١ی ئادارێ”
ئدريس زۆزانى 
ب هەلکەفتا بیرەوەریا رێککەفتنا ١١ی ئادارێ یا کو (٥٢) ساڵێن پری خەبات و تێکۆشان بسەردا دەربازبووین و بوویە ئیك ژ دەستکەفتێن هەرە گرنگێن کو ئەڤرۆ گەلێ کوردستانێ شانازیەکا مەزن بێ دکەت، ئەڤ رێککەفتنا دیرۆکی بەرهەمێ خوینا هەزاران شەهیدێن رێکا ئازادیێ و قوربانیێن رێبازا پیرۆز و رەنج و خەباتا پارێزەرێن گەل و ئاخا پیرۆز پێشمەرگەهێن چاڤنەترس و خۆراگری و بەرخۆدانا شێرەکورێن پارتی و بارزانی و هێز و شیانا فیداکارێن ناڤێ پیرۆزێ کوردستانێ بوویە.
رێککەفتنا ١١ی ئاداری یا کو لساڵا ١٩٧٠ دناڤبەرا سەرکردایەتیا شۆرەشا ئیلوونا مەزن ب سەرپەرشتیا ناسناما مللەتێ کورد بارزانیێ نەمر و حکومەتا عیراقێ یا وی سەردەمی دە هاتیە ئیمزاکرن و بوو پینگاڤەکا پێشکەفتی دقوناغێن سەرکەفتنا دۆزا گەلێ کوردستانێ دە و وەکو دەستکەفتەکی مێژوویی ژبۆ تەڤایا مللەتێ کورد هاتیە خویاکرن و ناساندن.
نایێتە ڤەشارتن ئەو خەبات و بەرخۆدانا گەلێ کورد ل درێژیا دیرۆکێ دکر و ئەو قوربانیێن مەزن پێشکێش دکرن هەموو پێخەمەتی گەهشتنا مافێ رەوایێ ڤی مللەتی و ئارمانجێن وی یێن نەتەوەیی بوویە و ئەو هەموو هەولێن دهاتنە دان ژبۆ بدەستڤە ئینانا ئەڤان جۆرە دەستکەفتێن مێژوویی بوویە.
بێگومان ئەڤ ئازادیا ئەڤرۆ گەلێ کوردستانێ تێدە دەربازدبیت ئەنجامێن ئەڤێ رێککەفتنا دیرۆکی بووینە یا کو بوویە دەستپێکا رێكخوشکرنەػا سەرەکی ژبۆ چارەسەریا دۆزا رەوا یا گەلێ کوردستانێ دگەل رژێما ئیراقێ یا وی سەردەمی و پێخەمەت بنبرکرنا زولم و زۆرداریا ل درێژیا دیرۆکێ لسەر خەلکێ کوردستانێ دهاتە کرن.
هەروەها رێککەفتنا ١١ی ئادارێ ژبۆ مللەتێ کورد بوویە دەستپێکا پەیدابوونا ژیانەکا ئارام و بنەمایەکی موکوم پێخەمەت رێزگرتن ل مافێ گەلێ کوردستانێ بیتە گرتن ب رێکا دانوستاندنێن زەلال و ڤەکری دوور ژ هەبوونا هزروبیرێن رەگەزپەرسی و دوبەرەکیێ و زۆرداریێ ل سەرانسەری ئیراقێ.
هەر ئەنجامێن رێککەفتنا ١١ی ئادارێ پیرۆز کو لسەر دەستێ بارزانیێ باب هاتیە بەستن و بەردەوامیا سیاسەتا حەکیمانە یا رێبەرێ گەلێ کورد جەنابێ (سەرۆك بارزانی) و رۆلێ ب هێز یێ سەرکردایەتیا پارتیا مە بووینە ئەڤرۆ گەلێ کوردستاتێ پێنگاڤێن بلەز ژبۆ گەهشتنا قوناغێن داوی یێن راگەهاندنا دەولەتەکا سەربەخۆ و ئازاد ل ژێر سیبەرا ئالایێ پیرۆز دهاڤێژتن و مللەتێ کورد بەرەف گەهاندنا مافێ خۆ یێ رەوا ڤە دچیت.
هەزاران سلاڤ لسەر گیانێ باقژێ تەڤایا شەهیدێن کوردستانێ و سەرکاروانێ شەهیدان بابێ روحی یێ نەتەوا گەلێ کورد بارزانیێ نەمر و کاك ئیدریسێ هەدەم ساخ وسەروەری بۆ پێشمەرگەهێن وەلات پارێز و قەهرەمان.
تُتاح هذه الصورة أيضا في: کوردی
