كۆمكوژیا ئێزدیێن شنگال پشتی چار سالان هێشتا بەردەوامە
لەیت حسێن 
ل رۆژا (3)ی تەباخا(2014)ێ رێكخراوا تیرۆرستی یا داعشێ هێرشی دەڤەرا شنگالێ كر و ب هەزاران كەسێن سڤیل و بێ گونەه یێن ئێزدی بوونە قوربانی چ ژ كوشتن و گرتنێ یان ژی ئاوارەبوون و پەنابەریێ بۆ ژدەرڤەی وەلات،سال بۆ سالێ پشتی وێ كۆمكوژیێ رەوشا خەلكێ ئێزدی خرابتر لێ دئێت.
وەكو یا دیار چ چارە و دەرمان ل برینا وان نەهاتینە كرن ژبەركو هەتا نهۆ ژی زێدەتر ژ سێ هەزار كچ و ژن و زارۆكێن ئێزدی ل زیندانێن تاری یێن رێكخراوا تیرۆرستیا داعش داینە و چارەنڤیسێ وان دیارنینە،هەروەسا ژی زێدەهیا خەلكێ شنگالێ هەتا نهۆ ئاوارەنە و ل كەمپان دا دژین و ژ ساناهیترین خزمەتكاریێن ژیانێ دبێ بەهرن و ئەو خەلكێ ڤەگەریایە جیێن خۆ ژی ب ئەگەرێ نەبوونا ئارامیەكا دروست دلگرانن،و حالێ وان ژی ژبەر نەبوونا خزمەتكاریان یێ باش نینە و جیێن وان ژی هەتا نهۆ نەهاتینە ئاڤەدانكرن،ل دەڤەرێن باشوورێ چیایێ شنگالێ ژی رەوش یەكجار نە یا باشە و چ كەس هۆسا نكارت ڤەگەرتە جیێن خۆ ڤە،ژبەركو ئەڤە ماوێ سالەكێ زێدەترە ئەو دەڤەر ژ دەستێ داعش هاتینە رزگاركرن لێ هەتا نهۆ ژی ژ مین و تەقەمەنیان نەهاتینە پاقژكرن و ژ ئالیەك دن ڤە ژبلی وێ یەكێ كو ل پێشیا كۆمكوژیا ئێزدیان نێزیكی سەد هەزار كەسی ئێزدی كۆچبەری وەلاتێن بیانی ببوو،نهۆ هێدی هێدی رێژا كۆچبەریێ یا ئێزدیان تا رادەیەكی زێدەتر دبت،و زۆر ب مخابنی ڤە ژی ئەم دبێژن ئەڤ چار سال دەربازبوون لێ هەتا نهۆ چ چارە ل برینا ئێزدیان نەبوویە.
هەروەسا هەتا نهۆ ژی ئەڤ كۆمكوژیا ئێزدیێن شنگالێ یا بەردەوامە ژبەركو براستی نە چ ئاریشەیێن ئێزدیان چارەبووینە و نەژی گرتیێن وان هەموو هاتینە رزگاركرن ونەژی كۆمكوژیا وان ب جینۆساید هاتیە ناساندن و نەژی جیێن وان بدروستی هاتینە ئارامكرن و ئاڤەدانكرن و نەژی رێخۆشكەرەك پەیدابوویە،داكو ئاوارێن ئێزدی ڤەگەرنە جیێن خۆ و نەژی ئەو جی و ئالیێن بووینە ئەگەرا ڤێ كۆمكوژیێ هاتینە سزادان،لەوما ژی براستی ئەڤە خالەكا رەشە لسەر روویێ هەموو جیهانێ و مرۆڤایەتیێ.
تُتاح هذه الصورة أيضا في: کوردی
