رزگاركرنا كچ وژن و زارۆكێن گرتیێن ئێزدیان؟
خالد خدر 
چەكدارێن رێكخراوا تیرۆرستییا داعش ل 3ی تەباخا سالا 2014 ، ب هەزارا خەلكێ مە یێ ئێزدی كوشتن و سەرژێكرن و هەروەسا ب هەزارا رەڤاندن ب تایبەتی كچ و ژن و زارۆك ، ئەڤ چەندا هاتی سەرێ جڤاكا ئێزدی ژلایێ داعش ڤەل شنگالێ مەزنترین تاوان بوو دڤی سەردەمێ نهۆ دا ، كو هەولا ژناڤبرنا نەژادێ ئێزدیان هاتە كرن هەر كار وكریارەكا دوور ژ بەها ونرخێ مرۆڤایەتیێ ل دژی ئێزدیێن شنگالێ هاتە كرن ژلایێ پیسترین و دڕندەترین رێكخراوا تیرۆرستی لسەر ئاستێ جیهانێ تا نهۆ.
جهێ دلخۆشیێ یە كو ژمارەك ژ وی خەلكێ رەڤاندی هاتنە رزگار كرن ژبن دەستێن چەكدارێن دەولەتا ئیسلامی و ب رێكێن جودا جودا ژبۆ ڤێ چەندێ و رزگاركرنا وان بتایبەتی كچ و ژنێت رەڤاندی ، حكومەتا هەرێما كوردستانێ هاریكاریێن بێ سنۆر پێشكێش كرینە ژ پێخەمەتی رزگاركرنا وان ژ بن دەستێت هۆڤێن تیرۆرستێن داعش بتایبەتی نڤیسینگەها رێزدار (نێچیرڤان بارزانی ) سەرۆكێ حكومەتا هەرێما كوردستانێ كوژلایێ مینەڤی و دارایی ڤە هیچ درێغی نەكرینە بۆ هاریكاریا كچ وژنێت رەڤاندی و رزگاركرنا وان و پشتی رزگاركرنێ ژی یا پێدڤی بۆ وان هاتیە كرن ژ لایێ جهێن پەیوەندار یێن سەرب حكومەتا هەرێما كوردستانێ ڤە ، كو دڤی بیاڤی دا گەلەك ژوان رزگاربوویان هاتینە رەوانە كرن بۆ ژدەرڤەی وەلاتی و گەلەكێن دی چارەسەریا دەروونی و نۆژداری ل كوردستانێ و ژدەرڤەی وەلاتی ژی بۆ هاتیە كرن ، ئەڤ چەندە هەمی جهێ سۆپاسی و رێزگرتنێ یە كو كارەكی پیرۆزە و دهەمان دەمدا ئەركەكی نەتەوەی و مرۆڤایەتی یە لسەر شانێت حكومەتا هەرێمێ كو دڤێت هەر كارەكی پێدڤی بیت بۆ ڤان رزگاربوویێن ژ بن دەستێ تیرۆرستێن داعش بهێتە كرن ولدیڤ شیانا . بەلێ جهێ داخێ یە كو تا نهۆ ژماەكا مەزن یا كچ و ژن و زارۆكێن ئێزیان هێشتا یێن ماین لبن دەستێن دڕندەیێن تیرۆرستێن داعش و ل هیڤیا وێ چەندێ نە بهێنە رزگاركرن و جارەكا دی بزڤرەنە ڤە ناڤ كەس وكار و مالباتێن خۆ ، وتشتێ جهێ مەترسیێ دڤی دەربارەیی دا ئەوە كو پتریا وان كچ وژنێن رەڤاندیێن ئێزدی هاتینە رەوانە كرن بۆ وەلاتێن دەوروبەر ب تایبەتی بۆ سووریا و پایتەختا داعشێ باژێرێ رەققە و بتایبەتی پشتی دەستپێك كرنا ئۆپەراسیۆنا ئازاد كرنا پارێزگەها نەینەوا ، كو تا نهۆ چارەنڤیسێ ب هەزاران ژ وان رەڤاندیێن ئێزدی نەیێ دیارە بەلكو د مەترسییا ژ دەست دانا هەتا هەتایی دانە.
تشتەكێ دی یێ ب مەترسیتر دەربارەیی رەڤاندیێن ئێزدی ، ئەوژی بابەتێ زارۆكێن رەڤاندیێن لبن دەستێن داعش ، كو ئەو زارۆكە ژلایێ داعشێ ڤە بتایبەتی یێن سنێلە هاتینە پەروەردە كرن و راهێنان ب هزر و رێبازا داعش یا قرێژی و گەماری ، چارەنڤیسێ وان زارۆكان ژی د مەترسیێ و بەرزەبوونێ دایە ، هیڤیدارین ب زوترین و ب لەزترین دەم ئەو كچ و ژن وزارۆكێن رەڤاندیێن ئێزدیان بهێنە رزگاركرن ژبن دەستێن رێكخراوا تیرۆرستی ، ئەڤجا داخوازێ ژ هەمی خێرخواز و مرۆڤ دۆستێن جیهانێ وهەمی رێكخراوێن مافێ مرۆڤی و یێن نێڤ دەولەتی و نێڤ نەتەوەی دكەین كو هەمی هەول وشییانێن خۆ بدەنە كاری و تەرخان بكەن ژبۆ رزگاركرنا رەڤاندیێن ئێزدیان و بتایبەتی حكومەتێن هەرێمێ و عیراقا فیدرال چنكو ئەركێ وان یێ مرۆڤایەتی و نیشتمانی یە بەرامبەری وان.
تُتاح هذه الصورة أيضا في: کوردی
