كورتە چیرۆك
مێزەرا سۆر
ئیسماعیل هاجانی 
وێ‌َ رۆژێ پشتی وە حەفتیكا وی دای هوین گەلەك وەستای بوون،مێڤانێن وە ڤەرەڤی بوون، تنێ خووشك و برا و هند خوارزا و برازا ل مالا وە مابوون،خویشكا وە یا مەزن سندۆقا وی یا شین ئینا نیڤا ژۆرێ و ڤەكر و تەژی چاڤان رۆندك بوون ودبن لێڤان ڤە تم تمەك وەك پێگۆتنێ كر چاڤێن هەوە هەموویان ب دلۆپ خستن زەرفەك ئینا دەرێ پوشیەكا قەرەقۆشی، گولیفكێن زیڤی پێڤە دهەژیان، ئینادەر و بەرێ خۆ ب نك تەڤە ئینا و گۆت كاكو ئەڤێ چ لێ بكم؟ تەب زمانێ جەستەی بەرسڤدا وی كرە دبن كەفشێ خۆ ڤە. خویشكا تە یا ناڤێ دەستی خۆ درێژكرە سندۆقێ، زەرفەكی كاغەز ژ رەنگێ ئاخێ ڤەكر، تەژی تشتێن بچوك تێدا بوون،داقوتا خزێمەكا مورك شین و جۆتەك گوهاركێن حەیدەری،پاتەكی بچوك گرێكا وێ ڤەكرن،كۆمەك شویژن و بشویژن كل و كلچیڤێن سپحانی،زێدەباری بستكێن گورە و كولاڤ چنینێ،ژنكا تەلێڤێن خۆ شوركربوون، هەردوو دەستێن خۆ دا بوون بن كەفشێن خۆ،خۆ ب سەرچ ڤەنەدبر،هەروەك بێژت دەیكا هەوەیە ما من چ ماف لێ دچت،جارەكا دی خویشكا تە یا مەزن دەستێ خۆ درێژكرە دبنێ سندۆقا شین دا،شەیەك هریێ و هەپكەكی تەڤن رستنێ ئینانەدەر،ژ نشكا ڤە هێرشكەك هاتە خویشكا تە و گۆت.. وەی دایێ، خوەزیكێن وێ رۆژێ،مێزەرەكا سۆر ژ بنێ سندۆقێ ئینادەر توو جحونی چاڤێن تە ب نەخشێن وی یێن چارگۆشەكەتن خانەك سۆری تاری و خانەك پرتەقالیێ باڤزەر و پەروازێن هەموو خانان ب چەند تایێن شینەكی سەر تەبەسیڤە،هەر خانەكی ژ خانێن، ڤی مێزەرێ، دیرۆكەك و چیرۆكەكا خۆ هەیە،هاتەبیرا تە، دەمێ توو شەش سالی، ئەڤ مێزەرە دانانەسەر سندوریكا باپیری لسەر ملێن زەلامان بای گولیفكێن وی هەژاندن، بەرەو گۆرستانا گوندی دبرن،دناڤ وی دەنگ و دوری گری و پێگۆتنێ دا،پیرە ژنەكێ دگۆت هەی تلزێرینێ یا تە ئەڤ مێزەرە رستی ئەو ژنكێن لدوف جنازەی د هاتن مرنا باپیری و خەما وی ژبیركرن هندی سالۆخەتێن جوانیا مێزەرا سۆر دكرن،چاڤێن تە ژ خانەكا مێزەرێ دەربازبوونە خانەكا دی،زڤستان بوو برایێ تەی بچوك د لاندكێ دا ژ سەرمادا د گری،دەیكا تە مێزەرا سۆر ب لاندكێ دادا و گۆتە تە برایێ خۆ ب هەژینە، ئەزێ كارێ شیڤێ كم،هەی دونیا چاڤێن تە ژ خانەكا دی دەربازبوون، حنگێنا دەهول و زرنایە ل حەوشا وە گۆڤەند چم وچم دچت، ژ نشكاڤە دەنگێ تەڤەنگا خۆش هات،ئەو مرۆڤێن ل حەوشا هەوە تێك شلقیان،گۆتن بەربووكی هاتن بووك ئینانە بن پالیێ، توو كریە دكۆشا بووكێ دا،چاڤێن تە ب گولیفكێن مێزەراسۆر كەتن، ب چالیچەپكان و قونخشكیێ تە خۆ نێزیكی مێزەرێ كر و گولیفكێن وی یێن حەفت رەنگی كرنە د دەڤێ خۆ دا،بێی توو یان كەسەك دی باخڤت چاڤێن تە ژ وی خانی چۆنە خانەكا دی،هەی مالا دنیایێ وێ شەڤێ قرالێ ئەسمانی دگەل قرالێ بەغدا ل كوردێن رەبەن تۆرە ب بوو ل بانیا شلدێ لسەر سنوورێ توركیا باران و گژلۆك و بەفرێ سوند خوار بوون حەتا سوبێ ڤەنەكن،خەلك پەریشان، بێ نڤین و بێ ستارە، تنێ وە ئەڤ مێزەرە هەبوو هەر ئێكی ژ وە گوژیەكی وی گرت و هەتا سپێدێ هوون پاراستن،دڤێ بێ دەنگیا وە دا دەنگەكی ژنكانی گۆت كاكو بلا بۆ خێرا وی ئەم ببن مزگەفتێ؟ تە ئێكسەر گۆت نە .دێ ب دیوارێ هنداڤی سەرێ خۆ ڤەكم هەر مالكەكا ڤێ مێزەرێ، خۆشتڤیەكی دئینت بیرا من.
تُتاح هذه الصورة أيضا في: کوردی
