هۆزانڤان ئاراز عەلی:ئەشق بوو دەرگەهەك بچمە دناڤ هۆزانێ دە
دەنگێ لالش،هۆگر نەجیب
هۆزانڤان”ئاراز عەلی” خەلكێ كۆمەلگەها شاریا یە ژسالا2005ێ وەرە وهەتا نۆكە هۆزانان ل سەر شێوازێ ئازاد دنڤیست و د دیدارەكێ دە بۆ رۆژناما دەنگێ لالش راگەهاند”ئێكەم جارا من دەست ب نڤیسنا هۆزانێ كری ل سەر ئەڤینیا من و كچەكێ بوو كو ئەشقا من بوو بوو دەرگەهەك بچمە دناڤ هۆزانێ دا، هەروەسا هەتا نۆكە ژی لبن باندۆریا كارەساتا شنگالێ دە دژیم و گرنگە هۆزانڤان د رۆژانێن تەنگاڤ دا خودان هەلویست بت،ئاشكەرا دكت ژی د ئایندەیی دا دێ پەرتۆكەكێ چاپ كەم”.
ل دۆر دەستپێكا خۆ یا نڤیسینا هۆزانێ،هۆزانڤان”ئاراز عەلی”دیاركر:”ل سالا 2005ێ بۆ ئێكەم جار من دەست ب نڤیسنا هۆزانێ كریە ل سەر ئەڤینیا من و كچەكێ بوو و هۆزان بناڤێ(نەگونەه بوو) و ئانكو ئەشقا من بوو بوو دەرگەهەك بچمە دناڤ هۆزانێ دا،یێن دبێژن ئاشق دبنە هۆزانڤان راست دبێژن،ژبەركو ئەز بخۆ ئێك ژوانم و ئەڤینداران داخواز ژمن كریە چیرۆكێن وان بكەمە هۆزان و من كرینە هۆزان”.
سەبارەت چاوانیا نڤیسینا هۆزانێ”عەلی”گۆت:”بتنێ بوونێ گرنگ دبینم بۆ هۆزانڤانی،ژبەركو پتر دكارت هۆزانێ بنڤیست ئەز بخۆ ئێك ژوانم و ل سەر شێوازێ قوناغا(ئازاد) ب پەیڤێن روون و دیار كو هەموو تەخ و چینێن جڤاكی تێبگەهت و هۆزانێ ب زمانێ(كوردیا پەتین) و ب شەڤ دنڤیسم وپەیڤێن نهێنی بكارنائینم،ژبەركو ئازادیا ل كوردستانێ هەی تێرا من دكت یادلێ خۆ بكەمە هۆزان،هەروەسا ب هەموو شیانێن خۆ من خۆ ژ پەیڤێن بیانی دووركریە و ب پلەیا ئێك ل سەر ئەشقێ دنڤیسم دگەل یا سروشتێ وەلاتی و وەلاتی و دەیكێ”.
دبەردەوامیا ئاخفتنا خۆ دە گۆت:”دەمێ هۆزانێ دنڤیسم نیشا كەسانێن شارەزا د بیاڤێ هۆزانێ دكەم رەخنەیێن ئاڤەكەر یێن وان بەرچاڤ وەردگرم و مفایی ژێ دبینم پاشی بەلاڤدكەم،تارادەیەكێ بلند رەخنەیێن ل من هاتینە گرتن د ئاڤەكەربوون دەستخۆشێی ل وان دكەم و ب بۆچۆنا من هەكە رەخنە نەبت سەركەفتی نابم وجارەكێ هۆزانەك من نیشا كەسەكی كر ژ پێخەمەت رەخنەگرتنێ د هۆزانێ داوەسان ل من كر پەرێ هۆزان من ل سەر نڤیسی من دراند و هەكە من نیشا كەسەكێ دی دابا نەبتنێ خرابیێ بەلكو باشی دێ دیاركربا ،ئانكو نەهەر كەسێ رەخنێ بگرت رەخنەگرە”.
دەربارەی كارەساتا شنگالێ و فەرمانا(74)ێ یا ب سەر ئێزدیان دا هاتی ناڤهاتی دبێژت:”كارەساتێ تارادەیەكێ مەزن كارتێكرنا خۆ ل من كریە و وەكریە دەمێ نڤیسنا ئەشقێ بدەمە كارەساتێ و هەتا نۆكە ژی لبن باندۆریا كارەساتێ دا دژیم،ب بۆچۆنا من گرنگە هۆزانڤان د رۆژانێن تەنگاڤ دا خودان هەلویست بت و خودان هەلویست بوویمە ل سەر كارەساتێ”.
هەروەسا ل دۆر بەرهمێن خۆ یێن داهاتی هۆزانڤانی ئاشكەراكر:”من تێرا پەرتۆكەكێ هۆزان هەینە د ئایندەیی دا دێ چاپ كەم و دێ بمە خودان ئێكەم پەرتۆك،هیڤیخوازم ماندیبونا هەر هۆزانڤانەكی رێز لێ بێتەگرتن و ژیاننامە مە و كارێن مە ببنە ئەرشیف،دیسان د رۆژناما(دەنگێ لالش)و گۆڤارا (نور لالش) دە من هۆزانێن خۆ بەلاڤكرینە و د چەندین كۆرێن هۆزان خووندنێ دە پشكداریی كریە”.
تُتاح هذه الصورة أيضا في: کوردی
