دڤێت ئێزدیان پەیامەكا ئێكگرتی هەبت؟
خالد خدر 
ژ ئەنجامێ هێرشا درندەیێن داعش ل سەر ئێزدیان ،یا ئاشكەرایە كو جڤاكێ وان هاتە سەروبن كرن ئانكو قەوارەیێ وان ب رەهوریشال ڤە هاتە هەژاندن و ئاشتییا جڤاكی هاتە تێكدان ، ئەوژی ژبەر ڤێ هێرشا هەنێ كو ب هەزاران مرۆڤ هاتنە كوشتن و ب هەزاران ژن وكچ وزارۆك وزەلام هاتنە رەڤاندن ژلایێ (داعش)ڤەو كچێن ئێزدیان كرنە( سبایا )و فرۆتن ل بازارێن(نەخاسێ )و بێ رێزی و هەتكبەری لبەرامبەر وان هاتە كرن ، زێدەباری ئاوارەكرنا ب سەدان هەزاران ژ ئێزدیێن خەلكێ شنگالێ كو نهۆ ل كەمپان دا دژین و ژیانەكا سەخت ودژوار دەربازدكن ،ژبلی كۆچكرنا ب هەزاران بۆ وەلاتێن ئەوروپی و دئەنجامدا ب سەدان كەس بوونە قووربانیا رێیا كۆچبەریێ ب تایبەتی یێن خەنقین دئاڤێ دا.
ب كورت وكورمانجی هەر تشتەكێ هەڤدژی بەها و پرنسیبێن مافێ مرۆڤی دگەل ئێزدیان هاتە كرن ژلایێ داعشێ ڤە ، ژ ئەنجامێ وان كریارێن هاتینە سەرێ ئێزدیان ئەو تووشی ئازارێن سایكۆلۆژی و دوودلیێ كرن ، چنكو قەبارێ وێ چەندا هاتی ب سەرێ وان گەلەك یا مەزن بوو ، و كارتێكرنێن نەرینێن زۆر خراب ل پشت خۆ هێلان ،كو شینوارێن وان هەتا هەتایێ دێ مینن وبۆ گەلەك بەرەبابێن دی ، سەرەرایی ڤێ چەندێ هەموویێ ئەگەر ئەم بەراوەردییەكێ بكەین دناڤبەرا وێ چەندا ب سەرێ ئێزدیان هاتی و وێ خۆراگری و بەرخۆدانا دئێتە كرن ژلایێ ئێزدیان ڤە ژبۆ ژیانێ و هەبوونا خۆ و دووبارە سەلماندنا خۆ وەك جڤاكەكێ زیندی ، ژلایەكێ دیڤە ئێزدی تووشی گەلەك هەوێن دیێن هزری دبن وبەردەوام هندەك كەسێن رەگەزپەرست و تووندڕەو هەنە هێرشێ دكەنە سەر ئێزدیان ب رێیا پەرتۆك و كۆتار و ئالاڤێن دیێن راگەهاندنێ و ب تایبەتی ل سەر تۆرا پەیوەندیا جڤاكی فەیسبۆكێ ، ب مخابنیڤە هندەك جاران ئێزدی بخۆژی دكەڤنە داڤا وان كەسان ل دەمێ بەرسڤا وان ددەن ب هەمان شێواز ورەفتارێن وان ،ئەڤ بخۆ شاشییەكا مەزنە دڤێت ئێزدی خۆ ژێ دووربكەن و پتر ژیرانە بن و خۆ نەئێخنە داڤا وان ، چنكو دینێ مە ل هیچ دەمەكی نەگۆتییە مە هێرشێ بكەنە یێ بەرامبەری خۆ و مە چ جارا تشتێ نەیێ مە بخۆ نەبریە و خۆلێ نەكریە خودان ومە هیچ تێكستەكێ دینی نینە بەروڤاژی ڤێ چەندێ و ئەم ئێزدی هیچ كەسەكێ نە ئێزدی ناكەینە ئێزدی بەروڤاژی دینێن دی ئەڤە بخۆ خالەكە زۆر ئەرێنی یە وخالەكا بهێزە ژبۆ وەرگرتنا یێ دی و ئاڤاكرنا جڤاكەكی ساخلەم.
من بانگەوازیەك هەیە بۆ ئێزدیان بخۆ ژی كو دڤێت خۆ ژڤان هەڤركیێن راگەهاندنێ دوور بكن ب تایبەتی لسەر تۆرا جڤاكی،ل دەمێ كێماسییەك یان ژی زیانەك بگەهتە وان پێتڤییە پەنایێ ببنە بەر رێیێن یاسایی وفەرمی ژبۆ بەرگریكرنێ و داخوازا مافێ خۆ لبەرامبەر هەر كێشەكێ ،چنكو ئەم ژی هاوەلاتیێن ڤی وەلاتی نە و نە بیانی ونە خۆگرتینە وئەم خەلكێن ڤی وەلاتی نە و باشترین گرۆڤە كو پەرستگەها مەیا پیرۆز لالشا نوورانی ل ڤی ناڤ وەلاتی دایە و رەسەناتیا مە بۆ ڤی وەلاتی هیچ گۆمان ناكۆكی تێدا نینە، وبلا برایێن مەیێن دی ژی مەوەرگرن و دڤێت ئێزدیان پەیامەكا ئێكگرتی هەبت ل خۆشی ونەخۆشیا وبۆ هەر رەوشەكا نەچاڤەرێكری و نە هەر كەسەك بخۆ بۆچوونەكێ یان داخویانیەكێ ژلایێ خۆڤە بدەت ودڤێت ئێزدی پالپشتیێ بدەنە لێڤەگەرەكی ،چنكو نۆكە ئێزدی دقۆناغەكا هەستیار دا دەرباز دبن.
تُتاح هذه الصورة أيضا في: کوردی
