خیڤەتێن ئاوارێن كەمپا خانكێ دێ ئێنە گهۆرین
تۆرا لالش یا راگەهاندنێ
ئاوارێن كەمپا خانكێ ددەن دیاركرن كو خیڤەتێن وان دبێ سەروبەرن و هەموویا پێتڤی ب گهۆرینێ هەیە،ئەڤە چار سالن هندەك نەهاتینە گهۆرین،رێڤەبەرێ كەمپێ ژی ئاشكەراكر كو دەست ب گهۆرینا خیڤەتان دێ ئێتە كرن.
دڤی واری دا ئاوارە(شێخ عەلی)دیاركر،ئەم پەریشان بووینە دژیانا ئاوارەیێ دا و مە بەردەوام پێتڤی ب پێتڤیێن ژیانێ هەیە،خالا هەری گرنگ ئەوە خیڤەت هەموو بێنە گهۆرین ژبەركو هندەك خێزان هەنە شیانا كرینا نایلۆنی نینن هەتا كو خێزانا خۆ ژ با و بارانا بپارێزن و ل رۆژێن بارانان دا گەلەك پەریشان دبن.
ژلایەكێ دی ڤە ئاوارە(خدر ئلیاس)گۆت:ئاوارە پێتڤی ب هەموو تشتان هەیە ل چاڤ ڤێ رەوشا تێدا و ژیانا مە بەرەف خرابیێ دچە،ژبەركو خیڤەت دبێ سەروبەرن و هەموویا پێتڤی ب گهۆرینێ هەیە،ئەڤە چار سالن هندەك خیڤەت نەهاتینە گهۆرین لێ تشتەك ژ ئاوارەیان نایێ و نەخاسمە ژیانا خۆ دبنە سەر ل بن دا،نهۆ ژی پێتڤی ب گازا سپی هەیە و كارەب گەلەك یا خرابە و دەلیڤەیێن كاری ژی نەماینە و قەیرانا ئابووری ژی بسەر مەدا هاتیە.
رێڤەبەرێ كەمپا خانكێ(پیر عەلو)ئاشكەراكر،ئەڤ كەمپە یا ئێكی بوو ل سنوورێ پارێزگەها دهۆكێ بۆ ئاوارێن شنگالێ هاتیە دروستكرن،ل دەستپێكێ سەرووبەرێ وێ یێ خراب بوو،لێ نهۆ باشتربوویە و هەتا رادەیەكی ئاریشێن خەلكێ وێ هاتینە چارەسەركرن،مە دەست ب لێگەریانەكێ ل ناڤا كەمپێ دا كریە و چ خیڤەتا پێتڤی ب گهۆرینێ هەی هاتینە دەست نیشانكرن و دئەنجام دا نێزیكی(500)خیڤەتا هاتینە گهۆرین،لبەرە جارەكا دی ژی لێگەریانێ بكەین ئەگەر هاتوو هندەك خیڤەتێن دی پێتڤی گهۆرینێ هەبن،هەروەسا ئەم وەك كارگێریا كەمپێ ب سنگەكێ بەرفرەه داخواز و ئاریشەیێن خەلكێ وەردگرن و ئەو داخواز و ئاریشەیێن ل سنوورێ شیانێن مەدا ئەم چارەسەر دكن و دێ بەردەوام خزمەتا خەلكێ خۆ كن.
ل كەمپا خانكێ(3120)خیڤەت هەنە و(2844)سەروك خێزان تێدا ئاكنجینە و ژمارا گشتی یا ئاوارەیێن وێ دگەهتە (16240)كەسان،هەروەسا پێنج قوتابخانە ل كەمپێ هەنە و ب 10شفتان دەوام تێدا دئێتە كرن و دوو بنگەهێن ساخلەمیێ لێ هەنە بۆ خزمەتكرنا خەلكێ.
تُتاح هذه الصورة أيضا في: کوردی
