ڕۆلێ گەنجان د پێشڤەبرنا شنگالێ دا
عەلی شەمۆ
ئەگەر بزڤرینە مێژوویا وەلاتێن جیهانێ بێگۆمان هەموو دەما و د هەموو گوهۆرینان و بریارێن چارەنڤیساز دا،ب شێوەیەكێ گشتی چینا گەنجان ئەڤجا چ كور بت یان كچ ڕۆلەكێ هەرە بهێزتر و مەزنتر هەیە و بووینە ئەگەرێ گوهۆرینێن مەزن د هەر بیاڤەكی و چارەنڤیسازەكی د ژیانا وەلاتان دا،بەلێ ئەگەر ئەم ل مێژوویا دوهی بۆ ژیانا ئیرۆ بزڤرین دیسان ب هەمان شێوە دێ بینین گەنج دقارن ببنە خودان بریار بۆ نڤیساندنا چارەنڤیسان بۆ هەلبژارتنا ژیانەكا پێشكەفتی و بهێزتر،ئەگەر ئیرۆ ئەم بەرێ خۆ بدەینە گەنجێن وەلاتێ خۆ و ب تایبەتی گەنجێن شنگالێ دێ بۆمە ئەو راستیە دیار بت یا د مێژوویێ دا دیار بووی كو ئەوژی گەنج هێزا پێشكەفتن و پێشڤەبرنا ژیانا هەر وەلاتەكی یە د هەر بوارەكی دا، یا روون و ئاشكەرایە دەما مرۆڤ دبێژت دبنە ئەگەرێن دیاركرنا چارەنڤیسێن جڤاكی و هەموو تاكەكەسێن وەلاتی بەرەف پێشكەفتن و گەشەكرنا ژیانا وەلاتی.
ئەگەر ئیرۆ بەرێ خۆ بدەینە ڕۆلێ گەنجان ل دەڤەرا شنگالێ و بێگۆمان ب شێوەكی گەلەك روون و بەرچاڤ دێ بینین مەزنترین ڕۆل ڕۆلێ گەنجانە ب تایبەتی ژی پشتی كۆمكووژیا ل3/8/2014 هاتیە سەرێ شنگالێ كو ب شێوەكی زۆر یێ هۆڤـ و درندانە هەموو جۆرێن تاوانان بەرامبەر خەلكێ شنگالێ هاتنەكرن و ژمارەیەكا مەزن یا خەلكی ب درندەترین شێوە هاتنە كوشتن د گۆڕێن ب كۆم دا هاتنە ڤەشارتن و هندەكێن دیژی كرین و فرۆتن ب وان هاتە كرن، و یێن ماین بوونە ئاوارە و پەنابەر،بەلێ ل ڕۆژێن جەنگ و شەراندا گەنجان ب روح و خوونا خۆ بەرەڤانی ژ ئاخا خۆ كر ئەوژی ژ پێخەمەت پاراستن و ژدەست نەدانا ئاخا وەلاتێ خۆ و هەروەسا ڕۆژ ب ڕۆژێ هەولدان ژیانێ ل شنگالێ بزڤرینن و زڤراندن، بەلێ ئیرۆ و پشتی دەربازبوونا 8 ساڵان ژ كۆمكووژیا شنگالێ ئەگەر ئەم بەرێ خۆ بدەینە ڕۆلێ گەنجان دێ بینین گەنج بووینە هێزا بەردەوامی دانا ژیانا شنگالێ كو ب سەدان ژ وان نۆكە ل پەیمانگەهـ و كولیژان دخوونن و ب هەزاران ژی ل چەند سالێن دەربازبووی دا دەرچووینە و گەلەك ژ وان سەرەرای ژیانا ئاوارەیێ و ئێش و ئازارێن فەرمانێ كارینە ل پشكێن جودا جودا ل سەر ئاستێ زانینگەهێن خۆ یان ژی ل سەر ئاستێ پارێزگەهێن تێدا خووندین ببنە دەرچوویێن ئێكەمین.
هەروەسا ئیرۆ ل شنگالێ ب سەدان وێ دگەل ڕێكخراوێن مرۆڤایەتی و خێرخوازی یێن جیهانی و لۆكال كاردكەن و خزمەتا شنگالێ دكەن، دهەمان دەم دا ب دەهان گەنجان كاریە ئەو بخۆ ڕێكخراوان دامەزرینن و ببنە سەرۆكێن ڕێكخراوان و ب دەهان گەنجان ل نك خۆ ب دامەزرینن و دەلیڤێن كاری بۆ وان پەیدابكەن،هەروەسا ل پتریا گوند و كۆمەلگەهێن شنگالێ رابووینە ب ڤەكرنا سەنتەرێن خۆبەخش ئەوژی ژبۆ خزمەتكرنا گوند و كۆمەلگەهێن خۆ، دیسان رابووینە ب پاقژكرن و ئاڤەدانكرنا وان گوندان ئەوژی بۆ پێشوازیكرنا خەلكێ ژ ئاوارەیێ دزڤرنە سەر وار و مولكێن خۆ ڤە،گەنجێن شنگالێ كارینە د گەلەك بوارێن دیژی دا پێشبكەڤن ب تایبەت دبوارێ راگەهاندن و میدیایێ دا كارینە چەندین ئاژانس و كەنالێن میدیایی دامەزرینن و دروست بكەن و ڕۆلەكێ مەزن هەبووینە دگەهاندنا ئێش و ئازارێن خەلكێ خۆدا بۆ جیهانا ژ دەرڤە و وەلاتێن خودان ماف،دیسان كارینە چەندین پرۆژێن مەزن و مفادار دبوارێن جودا جودا دا دروست بكەن و ڤەكەن بۆ خزمەتكرنا خەلكێ شنگالێ مینا كۆمەلگەهێن پزیشكی، كارگەهێن خوارن و ڤەخوارنێ، یاریگەهێن زارۆكان، هۆلێن شەهیانان، پاركێن تەرفیهی….هتد.
هەروەسا ل ئالیێ پەروەردێ و ساخلەمیێ ژی ب سەدان گەنج نۆكە ل شنگالێ ب خۆبەخشانە خزمەتا خەلكێ خۆ دكەن، هەرچەندە ڕۆلێ حكومەتا عێراقێ ب راستی ڕۆلەكێ گەلەك یێ كێم و لاوازە د پشتەڤانیكرنا گەنجێن وەلاتی خۆ و ب تایبەتی یێن شنگالێ دا، لێ سەرەرای ڤێ چەندێ ژی گەنجێن شنگالێ بخۆ رابووینە سەر لنگان و خزمەتا كوردستانێ و شنگالا خۆ دكەن و هیڤیەكن بۆ شنگالێ، لەوما فەرە ب وژدان و سەر بلندی و ب شانازی ڤە بێژین گەنجێن كوردستانا مەزن و شنگالا عەزیز هیڤی و پاشەرۆژا گەش یا ئاخ و وەلاتێ مەنە.
تُتاح هذه الصورة أيضا في: کوردی
