29 سالیا دامەزراندنا بنگەهێ لالش ب چەندین چالاكیان هاتە ساخكرن
تۆرا لالش/دهۆك
درێورەسمەكێ دا ئیرۆ 12 ئەیارا 2022 ل هۆلا شێخ شامۆ و ب ئامادەبوونا د.عەلی تەتەر پارێزگارێ دهۆكێ و بەرپرسێن ئیداری و حزبی و كەسایەتیێن رەوشەنبیری و ئەكادیمی و و بەرپرس و ئەندامێن دەستەیا بلند و تایی و نڤیسینگەهان 29سالیا دامەزراندنا بنگەهێ لالش ب چەندین چالاكى و برگێن جودا هاتە ساخكرن.
ل بەراهیێ وەك رێزگرتنێ بۆ گیانێ پاكێ جانگۆریێن كوردستانێ ئامادەبوویی خۆلەكەكێ سەكنین،ل پێرا رێورەسمان دەستپێكرن و بەرێز حاكم بەرجەس،جێگرێ سەرۆكێ بنگەهێ لالش پەیڤەك پێشكێشكر و تێدا دیاركر كو بنگەهێ لالش بەرهەمێ بزاڤا رزگاریخوازا كوردی یە و پشتی سەرهلدانا كوردستانێ هاتە دامەزراندن،هەر ژ رۆژا دامەزراندنێ و هەتا ئیرۆ رۆژ بنگەهێ لالش رۆلەكێ كارا و بەرچاڤ ب خۆڤە دیتیە بۆ خزمەتكرنا جڤاكا ئێزدیان ب تایبەتی و كوردستانێ ب گشتی و دچەندین بواران دا رۆلێ خۆ دیتیە و دێ بەردەوام بن ل سەر كار و خەباتا خۆ و بدەستڤەئینانا دەستكەفتێن مەزن،گۆتژی لێ ب مخابنی ڤە ئەڤە ئێكەمین هەلكەفتە كو دوو ژ ستوونێن سەرەكی یێن بنگەهێ لالش و هەردوو دامەزرینەرێن بنگەهی بوون خودێ ژێ رازی شێخ شامۆ و پیر خدر سلێمان،ئەم سۆز و پەیمانا ددەنە وان كو ل سەر رێبازا وان یا پیرۆز بەردەوام بن.
لدووڤدا د.عەلی تەتەر پارێزگارێ دهۆكێ دپەیڤەكێ دا پیرۆزباهی ل كادر و كارمەندێن بنگەهێ لالش كر ب هەلكەفتا سالڤەگەرا دامەزراندنێ و بەحس ل رۆلێ بنگەهی کر بۆ خزمەتا جڤاکا ئێزدی و کەلتۆرێ پێکڤە ژیانێ ل کوردستانێ و دیاركر كو بنگەهێ لالش خزمەتەكا دوور و درێژ یا كری دبوارێ ئێزدیناسیێ و چەندین بیاڤێن دیتر دا و رۆلێ وی دڤان سالان دا بلند و كاریگەر دنرخینین و هیڤیدارن ل سەر وێ رێ دبەردەوام بن و بتر دیرۆكا ئێزدیان و دەڤەرێ بەرچاڤ بكن.
هەروەسا دسمینارەکا کورت دا هۆزانڤان ئەدیب چێلکی بەحس ل زەنگینیا کەلتۆرێ ئێزدیان و رۆلێ وان کر د پاراستنا رەسەناتیا زمانێ کوردی دا،دیسان ژلایێ شه‌مۆ قاسم ئەندامێ دەستەیا بلندا بنگەهی راپۆرتەك هاتە پێشکێشکرن لدۆر خزمەت و کەد و خەباتا بنگەهی دماوێ 29 سالێن ژیێ خۆدا.
هەر بڤێ هەلکەفتێ سەرەدانەك هاتە ئەنجامدان بۆ سەر گۆڕا هەردوو کەسایەتیێن ناڤدارێن ئێزدی و دامەزرێنەر و سەرۆکێن بنگەهێ لالش خودێ ژێ رازی (شێخ شامۆ و پێر خدر سلێمان) و گۆرا وان ب تاجە گولینە و پێشکێشکرنا پەیڤێن وەفاداریێ هاتە زیارەت کرن.
وەكو ئیرۆ 12ی ئەیارێ بنگەهێ لالش یێ رەوشەنبیری و كۆمەلایەتی،ل سەر كۆمەكا رەوشەنبیر و خەمخۆرێن ئێزدیاتیێ و ب پشتەڤانیا راستەوخۆ یا حكومەتا هەرێما كوردستانێ هاتە دامەزراندن و بەردەوامیێ ب كار و خزمەتا خۆ ددەت بۆ جڤاكا ئێزدیان و كوردستانێ.
