كۆمبوونا دەستەیا بلندا بنگەهێ لالش ب رێڤهچوو
تۆرا لالش یا راگەهاندنێ
كۆمبوونا دەستەیا بلندا بنگەهێ لالش یێ رەوشەنبیری و كۆمەلایەتی و گشت دەستەكێن رێڤەبەرێن تایی و نڤیسینگەهێن لالش ل سەرانسەری دەڤەرێن ئێزدیان، دوهی3ئادارێ،ب سەرپەرشتیا بەرێز “شێخ شامۆ”سەرۆكێ دەستەیا بلند،ل هۆلا بنگەهی ل دهۆكێ ب رێڤەچوو.
كۆمبوونێ دەستپێكر ب خۆلەكەك سەكنین ل سەر گیانێ جانگۆریێن كوردستانێ و سەرەوەرێ وان بارزانیێ نەمر،پاش بەرێز”شێخ شامۆ”سەرۆكێ دەستەیا بلندا بنگەهێ لالش پەیڤەك پێشكێشكر و تێدا ئاماژە دا رۆلێ بنگەهی دجڤاكێ ئێزدی دا دبیاڤێن جودا دا،داخواز ژ تایی و نڤیسینگەهێن دەستەیا بلند كر پتر پێكۆلێن خۆ بێخنە كار بۆ خزمەتكرنا خەلكێ مە د كاودانێن چێبووین ژ دەست ب سەرداگرتنا گرۆپێ داعش یێ تیرۆرستی بۆ سەر قەزا شنگال و دەڤەرا باشیك و بەحزانێ.
هەروەسا”شێخ شامۆ”ئاشكەراكر:”دەستەیا بلند 50دانە ژ پەرتۆكا دەركەفتی ژ دیوانا سەرۆكاتیا هەرێما كوردستانێ وەرگرتینە،كو ب ناڤ و نیشانێن(مەسعوود بارزانی…پێشمەرگە ل جهێ سەرۆكێ هەرێمێ)،یێن دشەش پشكان دا یێن پێكهاتی ژ گۆتار و دیدارێن دگەل سەرۆك مەسعوود بارزانی دماوێ سالا 2005هەتا 2014ێ دا”.
ل دووڤ دا،ژمارەكا بەرپرسێن تایی و نڤیسینگەهان راپۆرتێن خۆ یێن سالانە ل دۆر گرنگترین چالاكیێن خۆ یێن دسالا 2016ێ دا ئەنجامداین پێشكێشكرن،دگەل شرۆڤەكرنا پلان و بەرهەڤیێن خۆ بۆ ئەنجامدانا چالاكییان دسالا 2017ێ دا.
هەروەسا بەرێز”شەمۆ قاسم”بەرپرسێ لژنا رەوشەنبیری ل دەستەیا بلند راپۆرتا هەڤبەش یا لژنێن دەستەیا بلند(رەوشەنبیری،كارگێری،پەیوەندی،دارایی) ،دگەل گرنگترین چالاكییان دسالا بۆری دا پێشكێشكرن،ل پێرە راپۆرتەك ل سەر تۆرا لالش یا راگەهاندنێ ژ بال هەڤكار”خدر خەلات بەحزانی”ڤە هاتە خووندن،پاش راپۆرتێن سالا بۆری یێن تایێن دەستەیا بلند ژبال هەر ئێك ژ بەرێزان”خشو میرزا” بنگەهێ لالش تایێ شنگال و “عەنتەر كەلو” بنگەهێ لالش تایێ خانكێ و “دلگەش سەلیم” بنگەهێ لالش تایێ شاریا و “رەعەد تارق” بنگەهێ لالش تایێ بەحزانێ و “سلێمان فانو” بنگەهێ لالش تایێ سنوونێ ڤە هاتنە پێشكێشكرن.
پاشی راپۆرتێن تایی و نڤیسینگەهێن دەستەیا بلند ژ ئالیێ بەرێزان”خەلات ئلیاس” لالش باعەدرێ و “ئازاد موراد”لالش شێخان و “جومعە ئەلعەبدیكو”لالش باشیك و نڤیسینگەهێن(خەتارە،دۆغاتا،مەهەتێ،دهۆك،ئێسیا،هەولێر،پەرستگەها لالش) ل دۆر چالاكی و پلانێن پاشەرۆژێ هاتنە پێشكێشكرن.
دلایەكێ دی دا،سەرۆكێ دەستەیا بلند تێبینیێن خۆ دیاركرن ل سەر وان چالاكی و پلانێن هاتینە راگەهاندن،تەكەز كر كو دەستەیا بلند دێ وان راپۆرتان و پلانێن سالانە یێن بەرپرسێن تایی و نڤیسینگەها راگەهاندین گەنگەشەكت.
دیسان چەند پێشنیار بۆ سەرۆكێ دەستەیا بلند هاتنە پێشنیاركرن، ژوانا پاشئێخستنا كۆنگرێ هەلبژارتنا یێ دەستەیا بلند و تایان،ژبەر كاودانێن نۆكە تێدا و رەوشا دارایی و ئاكنجیبوونا زۆرینەیا كارمەندێن بنگەهی و ئەندامان دكەمپان دا كو ب زەحمەتە ئەندام و كارمەند دڤێ رەوشا نە سروشتی دا بێنە كۆمكرن،هەروەسا شێخی هزر ل سەر ئامادەبوویان پێشنیاركر كو ب رێككەفتنەكا كۆم دووپاتكرن كو یا فەرە كۆنگرێن هەلبژارتنان بۆ دەمەكێ نەدیار بێنە پاشئێخستن.
ژ ئالیەكێ دیڤە،ئاماژە هاتە دان كو یا پێتڤیە دەستەیێن كارگێری ئەندام و كارمەندێن خۆ یێن چووینە دەرڤەی وەلاتی و یێن نوو دیار بكن.
هەر روونشتنێن كۆمبوونێ دا،ژمارەكا كەنالێن كوردستانی دئامادەبوون بۆ دیتنا هەلویستێ دەستەیا بلند ژ روودانێن ل شنگالێ چێبووین،كو دگەل گێرانا كۆنگرەیی بوون،دپرێس كۆنفرانسەكی دا”شێخ شامۆ”پەیڤەك دڤی واری دا پێشكێشكر و بەرسڤ ل سەر ژمارەكا پرسیاران دا یێن ئاراستەی وی هاتینە كرن دا.
تُتاح هذه الصورة أيضا في: کوردی