دەم ناسین ل چلێ هاڤینێ
حەیدەر عەرەبۆ یوسڤانی
مللەتێ ئێزدی هەر وەكی هەموو مللەتێن جیهانێ سالێ دكن چار وەرز و دوازدە هەیڤ و(366)رۆژ، وەك تێتە زانین ل پێ ئەو نیشانێن بۆ سەقا (كەش و هەوا ) هاتینە دیاركرن ، چلێ زڤستانێ و چلێ هاڤینێ بەرامبەر ئێكن و دهەڤدژن د سەقایێ خۆدا،ئانكو سەقایێ زڤستانێ سارە و سەقایێ هاڤینێ گەرمە،بۆ زانین ل دەستپێكا چلێ زڤستانێ رۆژ درێژ دبن و شەڤ كورت دبن و ل دەستپێكا چلێ هاڤینێ رۆژ كورت دبن و شەڤ درێژ دبن،وەكی بۆ مە ژ ڤێ گۆتنێ ژی دیار دبت ( سێزدەێ خزیرانێ رۆژ بەرێ خۆ ددەتە زڤستانێ ، و سێزدەێ كانوونێ رۆژ بەرێ خۆ ددەتە هاڤینێ)،ل وەرزێ هاڤینێ و پشتی دەه رۆژ ژ هەیڤا خزیرانێ دچن و دبتە سەرێ چلێ هاڤینێ ، ئانكو (11)ی خزیرانێ (یا رۆژهەلاتی ) بەرامبەر (24) ی خزیرانێ ( یا زایینی ) ، سەرێ چلێ هاڤینێ یە ،ل (2)ی تەباخێ (یا زایینی ) بەرامبەر (20)ی تیرمەهێ (یا رۆژهەلاتی) چلە ب داوی دئێتن و حسابدارێن ئێزدیا هۆسا دایە دیاركرن كو چلێ هاڤینێ داویا یا خێر و بەرەكەتا چلێ زڤستانێ رژیایە سەر روویێ ئەردێ ،ئەو بەرهەمێ خەلك بخۆ هەڤ و دوو ددەن یێ هەردوو چلایە،ل دەمناسینێ دا هندی هاڤینە گەرماتی یا وێ وا دكۆكا چلێ هاڤینێ دایە و ئەڤ چلە گەرمترین رۆژن دناڤ دەمێت سالێ دا،لەوما ژی ئەڤ چل رۆژە ب پیرۆزترین رۆژ ل نك مللەتێ ئێزدی هاتنە دیاركرن ، و ژ كەڤلۆژانكێ سەرمایێ دەردكەڤت و ب ئازادی كارێ خۆ دكن ، راستە كەلەژانا هاڤینا دژوار بسەر جوانی و رندیا بەهارێ دا دئێت و ل شینكاتیێ دكەتە بەهی ،لێ بەرامبەری هندێ بەرهەمێ رێنجبەرا دئینتە پێش و خۆشیەكێ بۆ خەلكێ پەیدا دكت ،وەكی جۆرێن دەخلودانی و بەرهەمێ چەم و ڕەزا و هەموو جۆرێن فێقی و زەرزەواتی و حسابدارێن ئێزدیا ل چلێ هاڤینێ حسابا سەرما و گەرم و بەفر و بارانا سالێ دكن،بۆ هندێ حسابەك وا هەی دەربارەی هاتنا بارانا ئەو ژی ئەوە حسابدار دێ چل بەرێت بەعزیبەرا ل بەستیەكی دانت ل چلێ هاڤینێ و هەر رۆژ دێ بەرەكی ژێ راكەت و هەكە ئەو بەرە بنێ وی نیمیێ گرتبوو دێ ئەو رۆژ ل بەرامبەر ل چلێ زڤستانێ دێ یە كێم باران بت و هەكە ئەو بەر بنێ وی خوناڤ گرتبت و دلۆپێت ئاڤێ پێڤە هەبن نیشانە ئەو رۆژ ل چلێ زڤستانێ دێ باران بت، بڤێ رێ حسابداران زانین دێ باران ل كێ رۆژێ ژ چلێ زڤستانێ بارت، پشتی چلە ب داوی دئێت دێ بتە چەژنا چلێ هاڤینێ ل نك ئێزدیا و ئەڤێ جەژنێ ل پەرستگەها پیرۆزا لالش دكن و ل حسابێ ئێزدیا دا هاتیە گۆتن،دەمێ چلێ هاڤینێ داوی دئێت،چلێ پشتی چلە هەیە ئەڤ چل رۆژنە دگەرمن،چلێ پشتی چلەی ژ (21) ی تیرمەهێ دەست پێ دكت هەتا (1)ی ئیلونێ ب داوی دئێت ل حسابا رۆژهەلاتی،بەلێ حسابا رۆژئاڤا ژ (3) ی تەباخێ هەتا (14) ئیلونێ یە.
تُتاح هذه الصورة أيضا في: کوردی
