تۆرا لالش
سه‌رۆكێ حكومه‌تا هه‌رێما كوردستانێ داخواز ژ حكومه‌تا ئیراقێ كر هه‌مبه‌رى ئه‌وا ب سه‌رێ ئێزدییان هاتى خۆ ب به‌رپرسیار ببینیت و وان قه‌ره‌بوو بكه‌ت.
مه‌سروور بارزانى، سه‌رۆكێ حكومه‌تا هه‌رێما كوردستانێ په‌یامه‌ك د یادا جینۆسایدا شنگالێ دا به‌لاڤكر و راگه‌هاند، د سالیا دا داگیركرنا شنگال و جینۆسایدكرنا خوشك و برایێن ئێزدى دا ژ ئالییێ تیرۆرستێن داعشێ ڤه ب رێز وێ یادا شه‌هیدێن وێ كۆمكوژییا تیرۆرستێن داعشێ كو برینه‌كا كویر و ده‌رماننه‌كرى یه د دیرۆكا گه‌لێ كوردستانێ و مرۆڤایه‌تییێ ب گشتى دا ل بیر دئینین.
هه‌روه‌سا ئاشكراكر، د یادا ڤێ كاره‌ساتێ دا پێدڤییه ب رێز ڤه یادا گیانفیداى و قوربانیدانا پێشمه‌رگێن قه‌هره‌مانێن كوردستانێ بكه‌ن كو ب سه‌ركردایه‌تییا سه‌رۆك بارزانى شنگال و ره‌خودۆرێن وێ ئازاد كرن و هه‌وره‌سا سوپاسییا هه‌لویستێ جوامێرانه یێ خه‌لكێ كوردستانێ ب گشتى و پارێزگه‌ها دهۆكێ و ده‌ڤه‌را به‌هدینان ب تایبه‌ت كر كو د هه‌وارا وان چوون و هاریكارییا خویشك و برایێن خۆ یێن ئێزدى كرن.
سه‌رۆكێ حكومه‌تا هه‌رێمێ گۆت: حكومه‌ت به‌رده‌وامه بۆ رزگاركرن و كاركرن بۆ ئازادكرن و ڤه‌گه‌ڕاندنا هه‌مى وان ره‌ڤاندیێن كو تا نوكه نه‌هاتینه ئازادكرن و دیتن و دیاركرنا چاره‌نڤیسێ بێسه‌روشوینان و هه‌روه‌سا درێژه دان ب پشته‌ڤانییا دارایى یا رزگاربوویان و هاریكاریكرنا وان خویشك و برایێن ئێزدى و ئه‌وێن دى یێن ژبه‌ر نه‌ئاسایبوونا ره‌وشا شنگال و ره‌خودۆران هێشتا د ناڤا كه‌مپان دا دژین و نه‌شیاین ڤه‌گه‌ڕنه ناوچه‌یێن خۆ.
مه‌سروور بارزانى زێده‌تر دبێژیت: ئه‌و دوپات دكه‌ن كو دڤێت حكومه‌تا فیدرال ئه‌رك و به‌رپرسایه‌تییا خۆ بجهـ بینیت و خویشك و برایێن ئێزدى قه‌ره‌بوو بكه‌ت و هاریكارییا ئاواره‌یان بكه‌ت و رێ خۆشكه‌ت بۆ وێ یه‌كی ب سه‌ربلندى ڤه‌گه‌ڕنه ده‌ڤه‌رێن خۆ، ئه‌و ژى ب رێیا بجهئینانا رێككه‌فتنا شنگال و چوونا هێزێن چه‌كدار و میلیشیایێن ل ده‌ڤه‌رێ و ڤه‌گه‌ڕاندنا ئاشتى و ئاساییشێ بۆ ناوچێ كو ب لێبۆرین ڤه ب ئه‌گه‌را بجهنه‌ئینانا رێككه‌فتنا شنگالێ ئه‌و ره‌وشا نه‌خواستى ب سه‌ر شنگالێ دا هاتییه سه‌پاندن و شنگال نه‌هاتییه ئاڤه‌دانكرن و خزمه‌تكاریێن پێدڤى ژى پێشكێشى خه‌لكێ ده‌ڤه‌رێ نه‌هاتینه كرن.
مه‌سروو بارزانى، سه‌رۆكێ حكومه‌تا هه‌رێما كوردستانێ ل دوماهییا په‌یاما خۆ ژى سلاڤ بۆ گیانێ شه‌هیدێن شنگال و هه‌مى شه‌هیدێن كوردستانێ هه‌بوون.
تُتاح هذه الصورة أيضا في: کوردی
