كرین وفرۆتن مینا سەردەمێن كەڤن ب كچ و ژنێن ئێزدی كرن
خالد خدر
د درێژاهیا دیرۆكێ دا ئێزدی تووشی گەلەك مەرگەسات وهێرشێت درندانە بووینە لسەر دەستێ جیران وهەڤ سنوورێن خۆ ب تایبەتی ژئالیێ ئیمبراتۆریەتێن فارسی وئومەوی وعەباسی وئوسمانی ڤە وپشكا شێری بۆ ئیمبراتۆریەتا ئوسمانی بوو ژوان فەرمانێت هاتینە سەرێ ئێزدیان،تشتێ سەرەنج راكێش وجیێ سەرسۆرمانێ ! ئەوە هەموو لبن ناڤێ ئایینی بوون وپتریا هەول وبزاڤێت وان فەرمان وهێرشا ئەو بوون كو ئایینێ ئێزدیان بگهۆرن وپاشی وان ژناسناما وان كەڤل كن ونەهێلن ، مخابنی ل بۆرینا چەرخان ئێزدیان گەلەك ئێش وئازار كێشان وگەلەك دەمان وەسا لێ دهاتن بەرەف نەمانێ وهەرسكرنێ دچۆن بەلێ ڤیان وگرێدانا وان یا مكوم دگەل بیروباوەرێت وان یێن رەسەن و دێرین دبوونە هێز و ووزە بۆ بەرخودان و بەرگریێ ل دژی داگیركرن وهێرشێن دوژمنی،چ جارا نەدخەیال وباوەرا مە دا بوو كو دیسان جارەكا دی ئێزدی دێ تووشی فەرمان وهێرشێن ژڤی جۆری بن.
ل چەرخێ بیست وئێكێ ودكۆپیتكا زانین و زانست وپێشڤەچۆنێ دا، لسەردەمێ ماف وئازادیێن مرۆڤی ولژێر سیبەرا رێكخراو وكۆمەلەیێن نێڤ نەتەوەی یێن تایبەت ب ماف وئازادیێن مرۆڤی ڤە ، وهەبوونا نەتەوەیێن ئێكگرتی وهێزێن ئازادیخوازێن ل هەموو جیهانێ ،ئەو بوو ل(3/8/2014)ێ چەكدارێن هۆڤانەیێن تیرۆرستێن داعش هێرشەكا بەرفرەه وبێ وێنە ئینانە سەر ئێزدیێن دەڤەرا شنگال یا سەرب پارێزگەها مووسل ڤە كو بەریا هنگی مووسل وتلەعفەر ژی داگیركربوون و دەستهەلاتا خۆ ل وان دەڤەران زالكربوون،درندەیێن داعش رەفتار وهەلسوكەوتێن نەمرۆڤایەتی ئەنجام دان ل دژی خەلكێ سڤیل وبێ گونەهی ئێزدیێن دەڤەرا شنگال،ب هەزارا مرۆڤ كوشتن و ب هەزارا رەڤاندن وگرتن و ب تایبەتی ژن وزارۆك و كچ وژن كرنە جاریە و كەنیزە و ل بازارێن ـ نەخاسی !ـ كرین وفرۆتن پێ كرن ب شێوازەكی هۆڤانە مینا سەردەمێن كەڤن،ل دەمێ مرۆڤ دكرنە كۆلە وكرین وفرۆتن پێ دهاتە كر.
ژبلی ڤێ چەنداهەنێ بسەدان هەزار ژخەلكێ شنگال ئاوارەكرن وقەستا چیایێ شنگال كرن و بسەدان ل چیایی دا مرن ژ سەدەما برسێ وگەرمێ و ژبێ ئاڤیێ،ژێرخانەیا ئابووری وكۆمەلایەتی یا دەڤەرا شنگالێ هاتە ژناڤبرن ژئالیێ تیرۆرستێن داعش ڤە وپشتی هنگی ئاوارەی هەرێما كوردستانێ بوون نهۆ ژیانەكا سەخت ودژوار دناڤ كەمپان دا دبۆرینن وتشتێ ژ هەموویێ كامباختر پشتی نەمانا داعش و ئازادكرنا شنگال ژبن كۆنترۆلا وان دەڤەرا شنگالێ تووشی هندەك پرسگرێك وكێشەیێن دی بوویە وەك خۆسەپاندنا هێزێن چەكدارێن سەرب پەكەكێ ڤە كو وان هێزان گەلەك گرفت وئاریشە بۆ خەلكێ دەڤەرێ دروست كرینە وبوونە بەربەست ل هەمبەری دووبارە زڤراندنا خەلكێ و ژبەر ڤێ چەندێ هەتا نهۆ خەلك نەزڤرینە ڤە،پاشی هێرشا حەشدا شەعبی وكۆنترۆلكرنا دەڤەرێن كوردستانێ وشنگال ژی ئێك ژوان دەڤەران بوو هاتنا حەشدێ كێشە ئالۆزتركرن و ئەوژی ب هەمان شێوێ هەڤكیڤێن خۆیێن پەكەكێ بوونە رێگر ل هەمبەر زڤراندنا خەلكێ وحكومەتا عێراقێ هیچ چاڤدێریەك ل خەلكێ شنگالێ نەكرینە ونەبووینە هاریكار دئاڤاكرنا دەڤەرێ ودووبارە زڤراندنا خەلكێ داكو ژ ژیانا دژوارا كەمپان قوورتالبن.
تُتاح هذه الصورة أيضا في: کوردی
