ئاوارە دخوازن كۆمەلگەهێن شنگال ژ پاشمایێن داعش بێنە پاقژكرن
تۆرا لالش یا راگەهاندنێ/لەیت حسێن
پشتی دەربازبوونا چار سالان لسەر كۆمكوژیا ئێزدیان ل شنگال،هێشتا پتریا خەلكێ شنگال ئاوارەنە دناڤ خیڤەت و كەمپان دا ژیانا خۆ دبۆرینن و درەوشەكا پەریشان دا دژین،دخوازن گوند و كۆمەلگەهێن وان ژ پاشمایێن داعش بێنە پاقژكرن و جارەكا دی ڤەگەرنە سەر مال و دەڤەرێن خۆ ڤە.
(ئەمین سەعید)ئاوارەكی شنگالێ یە خویاكر،ئەڤە چار سال لسەر كۆمكوژیا ئێزدیان ل شنگال بۆرین و رەوشا ئاواران ل ناڤ كەمپان دا یا خرابە و هەتا نهۆ دەزگەهەكی ناڤخۆیی ب دروستی لسەر كەیسا ئێزدیان كار نەكریە هەتا كۆمكوژی ب جینۆساید بێتە ناساندن،دخوازین گوند و كۆمەلگەهێن مە ژ بۆمبە و پاشمایێن داعش بێنە پاقژكرن چنكو بڤێ ئەگەرێ چەند كەسان گیانێ خۆ ژ دەست داینە.
ژلایەكی دی ڤە ئاوارە(مازن ئۆسمان)دیاركر،رەوشا ئاوارێن شنگال ل وەرزێن زڤستان و هاڤینێ دا نەیا باشە،دخوازین ژڤێ رەوشا نالەبار و ئاوارەبوونێ قورتالببن و گوندێن مە ل شنگال ژ بۆمبە و مینا بێنە پاقژكرن داكو جارەكا دی ڤەگەرنە سەر جی و وارێن خۆ ڤە.
چالاكڤانێ ئێزدی(مەیسەر موختار)گۆت:ئەم دخوازن ئەڤ كچ و ژنێن گرتیێن ئێزدی یێن هەتا نهۆ د دەستێ دا داعش ماین بێنە رزگاركرن،گازندا مە ئەوە جیهان لسەر كۆمكوژیا ئێزدیا بێ دەنگ بوویە و مافێ مرۆڤی پشتگوه هاڤێتینە و تنێ ل راگەهاندنێ دا دپەیڤن و كار بۆ ب جینۆساید ناساندنا كەیسا مە وەك پێتڤی نەهاتیە كرن،پشتی دەربازبوونا چار سالان لسەر كۆمكوژیێ را هەتا نهۆ پتریا خەلكێ شنگال ئاوارەنە و دناڤ خیڤەت و كەمپان دا ژیانا خۆ دبۆرینن و ژ ئەگەرێ سۆتنا خیڤەتان ژمارەكا كەسێن بێ گونەه بووینە قوربانی و گیانێ خۆ ژ دەست داینە،لەوا هیڤیا مە ئەوە هەر زوو ژڤێ رەوشا پەریشان قورتالببن.
تُتاح هذه الصورة أيضا في: کوردی
