چیرۆکا زارۆکەکی ژ فه‌رمانێ
خالد زورو
(ر . ف) زارۆکەکا ل ئێک ژ گوندێن چیایێ شنگالێ ژ دایک بوویە. ئەوێ زێدەتر ژ دیتنا دایک و بابێن خوە تشتەک ژ ئەڤێ دونیایێ نە دزانی، هەمبێزا دایکا وێ ب واتەیا هەموو دونیایێ ژ بۆ وێ دهات. هەردەما کو دایکاوێ بۆ دەمێ خۆلەکەکێ ژی ژ بەر چاڤێن وێ دوورکەتبا دگریا و بتنێ ب هەمبێزگرتنا دایکا خوە گریا وێ ب داوی دهات. ژ بۆ دایک و بابێن وێ ژی کەنیا وێ هەموو خۆشیێن دونیایێ بوون، کەنیا وێ هۆکارێ بەختەوەریا خێزانا وێ بوو.
بەلێ قەدەرێ رێک ب شادبوونا وان ب هەڤدوو نەدا، و بتنێ پشتی بۆرینا شەش هەیڤان ژ دایکبوونا وێ تیرۆرستێن داعش دەست ب سەر مالباتاوێ دا گرت، هەموو بوونە زێندانیێن زندانەکا تژی ژ کەرب و کین و دل رەقیێ ، ژ هەمبێزا دایکا خوە دوورکەت، و لگەل ئێک ژ نێزیکێن خوە کەڤتە د زندانا تیرۆرستان دا و ل دەڤەرێن جودا جواد یێن( أم الشبابيط، تلعفر، زندانا بادوش، و گەلەک ژ تاخ و مالێن باژێرێ موسلێ)هاتە زندانکرن.
ل وی دەمێ کو د زندانێ دابوو، دوور بوو ژ دلۆڤانی و هەمبێزا دایکا خوە، چاڤێن وێ زارۆکا ساڤا قەد زوها نەدبوون قیرینێن وێ چ جاران ب داوای نەدهاتن، بتنێ حەزرەتا وێ ئەو بوو کو جارەکا دی چاڤێن وێ ب دایکا وێ بکەڤن و د هەمبێزا وێ یا گەرم دا زکێ خوە یێ برسی تێربکە. لەوا د زندانێ دا چاڤێن وێ ب گەلەک ئافرەتان دکەفت و بەردەوام ل ناڤ وان ل دایکا خوە دگەریا لێ بێ مفا بوو، دووبارە دەست بگریانێ دکر و قیژی ڤەددان.
گریانا وێ یا بێ راوەستان لسەر هندێ بوو داکو دایکا وێ بهێت و وێ لبەر هەمبێزا خوەبگرێت وەکو بەرێ دەمێ کو دناڤ خێزانا خودابوو، بەلێ د زندانا ئەڤان هۆڤان دا چ دلۆڤانی تێدە نەبوو، چەند قیرین و هاوار ژی کربا یا بێ مفابوو، قیرینێن وێ وژدانێ ئەڤان بێ وژدانا نەدهەژاند.
ل دەسپێکێ ( ر )ێ دناڤبەرا ژیانا دوور ژ دایکا خوە و مرنێ دا مرن هەلبژارت، و ب هەر شێوەکی با رەتدکر کو هیچ شیرەکی دی ڤەخۆت ژ بلی شیرێ دایکا خوە، بەلێ پا یا بێ مفا بوو، وەسا دیاربوو کو ئەڤ قەدرا وێ بوو، کو د ژیێ شەش هەیڤی دا ژ هەمبێزا دایکا خوە دووربکەڤە و نەچار ببیت کو دوور شیر و دلۆڤانیا دایکێ مەزن ببیت، لەوا ژ پێخەمت داکو بژیت، ب شیرێ دەستکرد رازی بوو.
ژ لایەکی دیڤە مرۆڤ دکاریت پێشبینی یا چ ژ دایکەکا کو ب نەچاری ژ زارۆیا خوە یا شەش هەیڤی دوورکەڤتی بکەت؟ ئەوا کو ب نەچاری دەست ژ کەزبا خوە بەردای ، د ناڤ هزراندا و د خەیالا وێ دا چەندین پرسیار د مەژیێ وێ دا دورست دبوون:
– خوەزی من زانی با کو کچا من ژی هاتیە گرتن یان نە؟
– ئەرێ ئەزێ جارەکە دی وێ بینم یان نە؟
-پا گەلۆ نهۆ ل کیدەرێ یە؟ چاوا خەو ب چاڤێن وێ دکەڤیت و ئەو یا دوورە ژ هەمبێزا من ؟
– پا گەلۆ نها چ دخۆت و چاوا دژیت، ئەزا پشت راستم کو ب شەڤ و رۆژ ژ گریێ ناکەڤیت.
دوورکەڤتنا ژ دایکێ چەندا ب ئێش و ئازارە ژ بۆ زارۆیەکە شەش هەیڤی یا کو د ئەڤێ دونیایێ دا ژ بلی دایکا خوە کەسەکی ناسنەکەت. و نەچار ببیت دوور ژ هەمبێزا وێ بژیت و مەزن ببیت، یان ژی ژ بۆ دایکەکا کو ژ جەگەرا خوە دورکەفتی و تشتەکی ژێ نەزانیت؟ ترسا وێ ژ سنوورێن مرنێ دەرباز ببوو، ئیدی ژ مرنێ ، گرتنێ ، برسێ و نەخۆشیێ نەدترسیا، بەلکو هەموو ترسا وێ ئەو بوو کو جارەکا دی ب گرنژینا کچا خوە یا شەش هەیڤی شاد نەبێ، ترسا وێ ژ دوورکەڤتنا وێ یا ئەبدی بوو ژ کەزبا وێ. و هەموو هیڤیا وێ ئەو بوو کو بزانیت کا جەگەرا وێ د ژیانێ دا مایە یان نە؟
زندان ژ بۆ زندانیکرنا ئەوان کەسان هاتیە چێکرن یێن کو تاوانەکێ دکەن، ژ پێخەمەت وێ چەندێ کو سزایەک ب وان بهێتە دان کو ببیتە ئەگەرێ چاکبوونا وان و دوورکەڤتن ژ تاوانان، لێ ل ئەڤی وەلاتێ کو کەڤتیە د دەستێ تیرۆرستاندا، زندان تژی بوو زارۆیێن کو بتنێ گونەها وان ئەوبوو کو ژ دایک و بابەکێ ئێزدی هاتینە سەر دونیایێ ، بەلێ بتنێ چونکە ئێزدی بوون، و هیچ گونەهەکە دی نەکربوون… .
تێبینی: ئەڤ چیرۆکە ژ لایێ مامۆستا ” داود مراد خەتاری”ڤە ب زمانێ عەرەبی هاتیە نڤیسین.
تُتاح هذه الصورة أيضا في: کوردی
