كارتێكرنا رەوشا نهۆ ل ئاستێ رەوشەنبیری
جەمال كـــودی
دبت گەلەك جارا بەحس لڤی بابەتێ هاتبتە كرن،دەربارەی ئەگەرێن كێم خووندنێ وكارتێكرنا وێ یا نێگەتیف سەرپاشەڕۆژا جڤاكی ولاوازبوونا ئاستێ رەوشەنبیری وهزری وچەندین بۆچۆن وپێشنیاز هەبوون كا چاوە ئەم ژی خۆ ب هندەك رێیێن گونجای خۆ ژڤێ دیاردێ قورتال كەین،چنكو مە بەری نهۆ ژی ئەڤ دیاردە هەبوو بەلێ هەر چاوا بت تا رادەكی هێدی هێدی خووندەڤان ونڤیسەر پەیدادبوون وژمارەكا باش ژكەسانێن بەهرەمەند وخودان شیان بەرهەمێن ژهەژی بەلاڤدكرن ودبوونە بەلگە وپالدەر بۆ گەلەك بەرهەمێن دی دپاشەڕۆژێ دە ژبلی گەهاندنا مفای بۆخووندەڤانی ،بەلێ رەوشا نهۆ و قەیرانا ئابووری ونیگەرانییا دناڤ جڤاكی دە بوویە ئەگەرەك كو پتر دەست سستی بكەفتە بیاڤێ رەوشەنبیری وهزری وهۆنەری،چنكو هزرا خەلكێ بگشتی ئیرۆ بەرەف چەندین خالێن دی یێن گرێدایی ژیانا رۆژانە وچاڤەڕیێ هندەك گۆرانكاریایە.
هەروەسا وەكی دەزگەه وسازیێن تایبەتمەند ژی تا رادەیەكی هندەك پێڤە هاتبوونە گرێدان ب تایبەتی تەخا گەنج قوتابیا بۆ ئەنجام دانا بزاڤ وچالاكیێن جودا جودا،لێ پشتی چاڤدێری وپشتەڤانی كێم بووی ئەو بزاڤ وچالاكی ژی بەرەف كێمیێ ڤە چۆی وپێتڤی دەمەكی درێژن تا جارەك دن ئەڤ كەسانێن وەسا بكارن كار چالاكیێن گرێدایی چاند ئەدەبێ كوردی یێ رەسەن ئەنجام بدەن،ژبەركو نهۆ ئەو یێ دبارودۆخەكی هەستیار ودژوار دە ژهەموو دەمەكی ئیرۆ ئەم پێتڤی نە كو رەوشا نهۆ یا ئەم تێرە دەرباز دبین بێتە بەرچاڤ وەرگرتن ونەئێتە پشتگوه هاڤێتن،ژبەر هندەك ئەگەرێن دی یێن ئیرۆ دبنە هۆكارێن سەرەكی،گرنگە ئیرۆ ل گۆر شیان وئاستێ پێتڤی زەمینە بێتە خۆشكرن ژبۆ بەردەوامیدان و پتر بهێزكرنا ئەنجام دانا بزاڤێن رەوشەنبیری وهۆنەری.
زەنگینكرنا پەرتۆكخانا كوردی و پێشئێخستنا ئاستێ رەوشەنبیرییا كوردی ژئەركەكی هەری گرنگە ژبۆ پاشەرۆژا مە،چنكو هەموو بیاڤێن ژیانێ دپێتڤی نە ژبۆ ب رێڤەبرنا وەلاتی وب تایبەتی ئاڤاكرنا كەسایەتیا مرۆڤان،لەورا پێتڤیە لسەر جیێن پەیوەندیدار پێكۆل بێتە كرن میكانزمەك هەبت ژبۆ كاراكرن وئەكتیفكرنا سازی ودەزگەهێن رەوشەنبیری داكو كەلتۆر و چاند وهۆنەرێ مە چڤ بدەت وبەرەف سست بوون و نەمانێ ڤە نەچت.
تُتاح هذه الصورة أيضا في: کوردی
