ژ كەلەپۆرێ باب وكالا
ئلیاس نەعمو خەتاری
پشكا دووێ
ژیانا خۆش ئەو بوو یا بەرێ ئانكو یا ب سروشتی ڤە گرێدایی كا چاوانێ ئەڤێ خەلكێ هەنێ پێتڤیێن ژیانێ دابین دكرن وژیان برێڤە دبر،هەلبەت بۆ ڤێ چەندێ ب دەهان كەلوپەل دڤیان چی بۆ ناڤ مالێ یان ژی بۆ ژدەرڤەی مالێ.
ل ڤێدەرێ پشتی مە بەحسێ دروون و دەخلی وكێشانا وان بۆ ناڤ هوندرێ مالێ بۆ خوارنێ دهاتە بكار ئینان ودهاتە فرۆشتن وهلگرتن ونخامتن وپاراستن ژ هەرە زەرەرەكی بۆ چاندنێ دهاتە بكار ئینان دگۆتنێ دەخلێ تۆڤی،ل ڤێدەر دێ بەحسێ وێ چەندێ كا چاوا گەنم دهاتە ئامادەكرن ژبۆ قوتێ مالێ وچاوا دهاتە بكارئینان و خوارن ژێ دروستكرن،گەنم دكرنە ساڤار و دهاتنە چێكرن ل وەرزێ هاڤینێ ب تایبەت ل داویا وەرزێ هاڤینێ پشتی خەلكێ دەشتا خۆ ڤەحواندبا وچوو كار پشت خۆ ڤە نەهێلابان دێ هاتبانە ئەو گەنمێ هاتیە هەلگرتن بۆ قوتێ مالێ دێ ئینابان لبەر رۆژێ راخستبا داكو باش هشك ببا ودێ ئینابا دا بكن ساڤار، چێكرنا ساڤارا كارەكی پر خۆشبوو ژبەركو ل هەر گوندەكی ساڤار هاتبانە كەلاندن دگۆتنێ دەهنوك خەلكێت تاخی هەموویان پشكداری تێدا دكرن وئاگر هەلتكرن وپێكڤە بكارێ كەلاندنا وان تایبەت گەنج وزارۆك ل وان كۆمدبوون،ل داویێ پشتی ئاگرێ وان ڤەمراندبا بێهنەكێ دهێلان پاشی ب كەیف وخۆشی وپێكڤە كاركرن هاریكاریا هەڤال ومرۆڤ وجیناران دەهنوك ئانكو ساڤار دكێشان سەربانا و پاشی بەلاڤ دكرن وچەند رۆژەكا ئەو ل بەر رۆژێ دهێلان تاكو هشك دبان، پشتی هشكبوونێ كۆمدكرن ودكێشانە خوار ژسەر خانی ودكرنە دگونیادا و باش هەلدگرتن بۆ هێرانێ،دستار و جوهنی (دستار ): ژ دوو بەرین گەور و رەش دبانن ئێكی ل ئەردێ داتنێن ویێ دن نیڤەكا وی یە ڤەكریە لسەر بەرێ دن داتنێن دا دەهن وساڤارێ تێرا بەردەن دیسان جیێ دەستكێ دارێ لێ هەبوو ژبۆ زڤراندنا بەرێ دستاری یێ سەری لسەر بەرێ بنی داكو دەهن وساڤار بێنە هێران پێك دئێت، ل دەمێ بكارئینانا دستاری تایبەت ژلایێ ژنان ڤە بكێماسی دڤیا دووبانە ئیكێ دەهن یان ساڤار بەردابانێ یادن ژی دستار گێرابا ئانكو زڤراندبا گەلەك جاران ئەڤ كارە ب سترانێن فلكلۆرێ رەسەن یێ كوردی دهاتە كرن.
دیسان لبیرا مە هەموویایە دەنگێ هۆنەرمەندێ كورد خودانێ سۆزێ رەحمەتیێ تەحسین تەها دگۆت: دستارۆ دەهەنێ بهێرە بهێرە نە ئێك و دوونە هەزارن هەزارن . .،( جوهنی ):ژ دوو پارچە بەران پێك دهات بەرێ هەری مەزن نیڤەكا وی یە كوور بوو داكو دەخل ودان كربا تێدا ژبۆ قوتانێ ئەڤ بەرە هەتا نیڤا وی دكرنە دبن ئەردا داكو باش بشدیت وجیێ خۆ بگرت ئەڤە دگۆتنێ جوهنی یان جۆنی، پارچا دن دگۆتنێ دەستە جوهنی ئەوژی بەرەكی تایبەت بوو ژ جۆرێ بەعزی بەرا یان بەر مەعزیك لێ یێ مەزن بوو ژبۆ قوتانێ دكرنە دناڤ ڤالاهیا جوهنی دا،ڤێجا دەمێ ژنان جونی بكاردئینان لێ كۆمدبوون وهاریكاریا ئێك و دوو دكرن گەنمێ نماندی یان هەر تشتەكی دن با ب مستا دكرنە دناڤ جونی دا وب دەستا جۆنی دقوتان.
تُتاح هذه الصورة أيضا في: کوردی
