برایێ ئاخرەتێ دباوەریا ئێزدیان دا
مەهدی حەسەن موراد
پشكا دووێ و داویێ
برایێ ئاخرەتێ ژی دڤێت چەند ساخلەتێن باش هەبن: 1_دڤێت شارەزایەكا باش د ئێزدیاتیێ دا هەبت، 2_دڤێت برایێ ئاخرەتێ د ڕێبەر و رێناس بن و ئاریشێن مللەتێ خۆ چارە بكن دڤێت خودان رەوشت بت چ شێخ بت یان پیر بت،3_دڤێت ب بەلاڤكرنا بیروباوەرێن ئێزدیاتیێ رابن، 4_ یە فەرە شێخ و پیر د ئامادەبن ژبۆ ب جه ئینانا رێورەسم و حەد و سەدێن ئایینی دناڤ ئێزدیان دە، 5_خودان باشترین رەوشت و تیتالێن جڤاكی بن،6_ چاخێ ئێزدیەك دكەفتە بەر مرنێ هەر زوو گازی شێخ و پیر و خوشك وبرایێ ئاخرەتێ دكن و ب ئەركێ خۆ رادبن ژبۆ رێورەسمێن ڤەشارتنا مری،7_فەرە برایێ ئاخرەتێ ژی هەر هەیامێ جارەكێ سەرەدانا برایێ خۆ بكت و چەند شیرەت و ڕاسپاردەیێن ئایینی و جڤاكی ئاراستەیی برایێ خۆ بكت.
دیسا چەند ئەرك و كار ل سەر هەر كەسێ ئێزدی هەنە بەرامبەر برایێ ئاخرەتێ:فەرە رێزەكا تایبەت ل برایێ خۆ یێ ئاخرەتێ بگرت، هەموو جەژنێن ئایینی بەری هەر كەسی سەرەدانا برایێ خۆ یێ ئاخرەتێ بكت و دیاریەكێ پێشكێشی وی بكت ب هەر رەنگەكی هەبت و دلنیاكەت برایێ خۆ یێ ئاخرەتێ كار و دانوستاندنا وی دناڤا جڤاكی دا یە باشە و پێگیریا ڕێورەسمێن ئێزدیاتیێ دكت و برایێ خۆ یێ ئاخرەتێ رازی بكت و دلخۆش بكت كو ئەو مرۆڤەكی باشە، ژلایەكی دنڤە فەرە رەسما برایێ خۆ یێ ئاخرەتێ بدەت كا چاوا رەسما شێخێ خۆ و پیرێ خۆ ددەت هۆسا یا برایێ ئاخرەتێ ژی بدەت ، ژبەركو وەكی مە بەری نهۆ گۆتی برایێ ئاخرەتێ ئێك ژ هەر پێنچ فەڕزێن حەقیقەتێ ل حەزرەتا پەدشایێ حازربت و دیدەڤانیێ (شەهدەیی)لسەر باشی و خرابیێن وی و كارو بارێن وی یێن دنیایێ دەت، ئەگەر مرۆڤەكی بێ رێز و تەرز بت ونەی پێگیر بت ب رێورەسمێن ئێزدیاتیێ دێ ڕاستیا وی ئاشكەرا كت ئەگەر یێ باش بت دێ ب بەهشتا بەرین شاد بت و ئەگەر یێ خراب بت دێ ب سزایێ خۆ گەهت.
رێورەسمێن دەست نیشان كرنا خووشك و برایێ ئاخرەتێ:ل هێڤارا داوەتێ پشتی دەست نیشانكرنا خوشك و برایی خۆ یێ ئاخرەتێ زاڤا و بووك وخوشك و برایێن ئاخرەتێ داخواز دكن مینا گرێبەستەكێ بڤی رەنگی ل هێڤارا داوەتێ یان سبەیكا داوەتێ دئێتە ب رێڤەبرن ب ڤان رێورەسما:هەر ئێك ژ بووك و زاڤا دیاریەكا تایبەت پێشكێشی خوشك و برایێن خۆ دكن و دچنە دەستێ وان و دبێژنێ خوشك و برایێن مە هەروەسا بووك و زاڤا ژی دیاریەكا تایبەت پێشكێشی خوشك و برایێن خۆ دكن ،پەرداغەكا ئاڤێ دئینن و بەرامبەری ئێك دسەكنن و برایێ ئاخرەتێ بەراتەكێ دناڤ ڤێ پەرداغا ئاڤێ دكت و دشێلن و هەر ئێك سێ جارا ڤێ پەرداغا ئاڤێ ب سەر ئێك ڤەدكن و دبنە خوشك و برایێن ئێك،ژبەركو بەرات ژ ئاخا لالشا پیرۆزە وب ئاڤا كانیا سپی یە ڤەسترایە و د باوەریا مە ئێزدیان دا هەچی كچ وكور دگەل ئێك دناڤ زمزمێ وكانیا سپی دگەل ئێك ئاڤا ڤان هەر دوو جیا ڤەخۆن دبن خوشك و برا ژ داب و نەریتێن مە پەریەكێ دناڤ ژۆرا بوك و زاڤا دا دادنێن فەرە خوشكا بوكێ و برایێ ئاخرەتێ ڤێ پەریێ گرێدەن،دەمێ پەریێ سواردكن ب هلهلاندن و دهۆل و زرنا و بوك و زاڤا دئێنە سەری خوشك و برایێن خۆ ل رۆژا داوەتێ هەموویێ برایێ ئاخرەتێ یێ دگەل زاڤای و خوشكا بوكێ یا ل نك بوكێ ل هێڤارا داوەتێ ئەگەر برا زاڤا ل گوندی بت زاڤای و هەمووهوگر و دۆستێن زاڤای دكەرمینت،دەمێ زاڤا دچتە ژۆرا خۆ و ب ئەركێ خۆ رادبت بووك مریشكەكا سۆركری دگەل هندەك چەرەزی ددەتە زاڤای و زاڤا ژی ددەتە برایێ خۆ یێ ئاخرەتێ و ئەو دچنە مالا زاڤا مێڤان كری و ڤێجا كەیف و شاهی گەرمتردبن،دیسا ئەركەكا لسەر برایێ ئاخرەتێ دگەل زاڤای بۆ رێڤەكرنێ دچنە مالا بابێ بووكێ و پێكڤە خوارنەكێ دخۆن،هەروەسا جۆرەكی دی یێ برایێ ئاخرەتێ یێ هەی ،ئەو ژی جارنا هەكە كچەكێ برایێ دای و باب نەبتن ژ خۆرا برایێ ئاخرەتێ دگرت، كوڕ ژی هەكە خوشكا ژ دای و باب نەبتن ژ خۆرا خووشكا ئاخرەتێ دگرت ئەڤە ژی بۆ داگرتنا وێ ڤالاتیێ یا ڤیانا خوشك و برایانە.
ژێدەر:پەرتۆكێن پەروەردا ئێزدیاتیێ
مامۆستایێ ئایینی پیر سەعید
تُتاح هذه الصورة أيضا في: کوردی
