شنگالا به‌رخوه‌دانێ پارچه نابیت!
فه‌همى بابێ رۆژانێ
سه‌ره‌راى ئالۆزیێن په‌یدابووین، وێرانكرنا شنگالێ ب ده‌ستێن تیرۆرستێن هۆڤ و خودێ نه‌ناس و كوشتن و دیلكرنا ب هه‌زارن بێگونه‌هان ژ زارۆ و ژن و كاله‌مێر و لاوان و ده‌ربه‌ده‌ربوونا ب سه‌دان هزاران و بۆراندنا ژیانه‌كا سه‌خت و دژوار دبن چادرێن بێ سه‌روبه‌ردا و ئه‌ڤه نه‌جارا ئێكێ یه كو ئێزدى ب تایبه‌ت و ملله‌تێ كورد ب شێوه‌كى گشتى تووشى قڕكرنێ و ئه‌نفالان و كیمیابارانان دبن، به‌لێ هه‌ر خۆراگر بووینه و به‌رخوه‌دان و شۆره‌ش هه‌لگیرساندنه و دوژمنێن وان چووینه د زبلخانا دیرۆكێ دا و ملله‌ت بسه‌ركه‌فتیه و ژ ئه‌نجامێ وان ئالۆزیان چه‌ندین لایه‌نێن هه‌لپه‌رست (انتهازى) خوه داینه پێش و دڤیان ملله‌تى ب سه‌ر دا ببه‌ت و بۆ به‌رژه‌وه‌ندیێن خوه بكاربینن، لێ ب دیتنا مه ملله‌ت هشیارتره ژ پیلانێن وان نه‌حه‌زان و باش دزانیت ب درێژیا دیرۆكێ كى پشته‌ڤانێ وانه وكى وان بكاردئینه بۆ پیلانێن خوه و هاتنا حه‌شدا شه‌عبی بۆ شنگالێ و رزگاركرنا چه‌ند ده‌ڤه‌ره‌كێن ئێزدیان و هه‌ولدان بۆ چێكرنا هیلالێ شیعى هه‌تا سووریا و لوبنانێ و ب نه‌خشه‌كێشانا ئیرانێ كو به‌رده‌وام كوردان ل سێداره دده‌ت و زیندان دكه‌ت و باوه‌رى ب مافى چ نه‌ته‌وه وكێمه ئایینان نینه، ژ بلى ده‌سهه‌لاتا ویلایه‌تا فه‌قیهى و ململانێن خوه و سوننه‌یان دكێشیته ل سه‌ر ئاخا كوردستانێ، ئه‌ڤه خه‌ونه‌كا خاڤه ئه‌و دبینت و ملله‌تێ ئێزدى ژ ڤێ چه‌ندێ هشیارتره، ژ بلى چه‌ند كه‌سه‌كان كو ژ به‌ر مووچه و به‌رژوه‌ندیێن خوه یێن تایبه‌ت چووینه د ناڤ وان دا و ئه‌و نوونه‌راتیا ئێزدیان ب چو ره‌نگان ناكه‌ن و هه‌تا دگه‌هنه راستیێ، ئه‌و ژى دێ ڤه‌گه‌رن ناڤ رێزێن ملله‌تێ خوه و بۆ كوردستانا دایك كو وه‌لاتێ مه یه و هه‌مى پیرۆزیێن مه بخوه‌ڤه دگریت و ئه‌م خه‌لكێ وێ یێ ره‌سه‌نین و ژ ئه‌نجامێ چه‌ندین فه‌رمانان، ئۆلا خه‌لكێ وێ هاتیه گوهۆرین و هه‌ر پارچه‌كا كوردستانێ چه‌ندین نیشانگه‌ه و ناڤێن خاس و بابچاكێن مه بخوه ڤه دگریت و ب دیتنا مه ئیزدى بێى كوردستانێ نكاره د رۆژهلاتا ناڤین دا بژیت و بلا كه‌س خوه نه‌خاپینه و ل پێ پۆل و پاره و به‌رژه‌وه‌ندیێن تایبه‌ت نه‌كه‌ڤیت. حه‌شدا شه‌عبی و عیراق بۆ مه نه‌مالن و نابنه پشته‌ڤانێن مه و ئه‌وان هنده‌ك ده‌ڤه‌رێن مه رزگاركرن مالا وان ئاڤا، دێ چنه جهێن خوه و شنگال كوردستانه و نابیت كه‌س پیلانێن خوه ب سه‌ردا بسه‌پینه و هه‌ڤكێشا سیاسى ل جیهانێ هاتیه گوهۆرین و كوردستان نه‌یا جارانه هه‌ڤال و پشته‌ڤان هه‌نه و به‌رژوه‌ندیێن زلهێزان د كوردستانێ دا ل گه‌ل دۆزا ره‌وایا ملله‌تێ مه هه‌ڤ دگرن، لێ مخابن هنده‌ك لایه‌نێن كوردى كه‌فتینه د ناڤ پیلانێن ئیرانێ دا كو دامه‌زرێنه‌را حه‌شدا شه‌عبى یه و برایێن مه یێن هه‌په‌گێ بلا بزانن وه‌كى گۆتنا كوردان (ریه دبنه بۆست و دوژمن نابن دۆست)، بلا پشتا خوه ب پیلانێن نه‌حه‌ز و دوژمنێن كوردان یێن دیرۆكى و هه‌نۆكه‌یى نه‌ئینن و ئه‌وان دگۆت: بلا هه‌مى ده‌ڤه‌رێن شنگالێ رزگارببن و ئه‌و دى خوه ژشنگالێ ڤه‌كێشن، ئه‌ڤه ئه‌و رۆژه ژى هات بلا خه‌باتا خوه ببن ده‌ڤه‌رێن خوه و بهێلن شنگالا بریندار بێته ئاڤاكرن و خه‌لكێ وێ یێن ئاواره بزڤرن سه‌ر مال و مولكێن خوه و داكو خه‌لكێ خێرخواز بێته شنگال و ئاڤا بكه‌ن دوور ژ ململانێ و پلانێن هه‌رێمایه‌تى ل سه‌ر دۆزا كوردان داكو نه‌بینه دارده‌ستێ نه‌یارێن خوه یێن دیرۆكى و ئازادبوونا باشۆرێ كوردستانێ و راگه‌هاندنا ده‌وله‌تا كوردى پشته‌ڤانیه بۆ هه‌مى پارچێن داگیركرى و وه‌كى جگه‌رخوینێ نه‌مر گۆتى: (هه‌كه ئه‌م كورد نه‌بن ئێك ئه‌مێ ژ ناڤ هه‌رن ئێك ب ئێك).
ئه‌ڤ گۆتار ل مالپه‌رێ ئه‌ڤرۆ نيوز،ل 12/7/2017ێ هاتيه به‌لاڤكرن.
تُتاح هذه الصورة أيضا في: کوردی
