ئێزدی وحەشدا شەعبی و ئیران !!!
خالد خدر
ل ڤان رۆژێن بۆری دەنگوباسێ ئازادكرنا دەڤەرێن ئێزدیان یێن ماین لبن دەستێن هۆڤێن داعش ل ئالییێ باشوورێ چیایێ شنگالێ ، وەك كۆمەلگەهێن ( گرعزێر و سیبا شێخدرێ و گرزەرك وهتد …،) و گوندێ كۆچۆ ژی دناڤ واندا بوو ئەو گوندێ ب هەزارا ژ خەلكێ وی هاتی كوشتن و تووشی قركرنێ بوویی و ژن وزارۆك هاتینە رەڤاندن و سەبیكرن ژلایێ چەكدارێن تیرۆرستێن داعش ڤە ل تەباخا سالا2014 ێ ، نێزیكی سێ سالان بوو ئەو دەڤەرێن ئێزدیان هاتبوونە داگیركرن ژ ئالییێ دڕندەیێن داعشێ ڤە.
تشتێ سەرنج راكێش و جهێ سەرسورمانێ كو ئەو دەڤەرێن هەنێ ژئالییێ حەشدا شەعبی ڤە هاتینە ئازادكرن و ب مخابنیڤە هژمارەكا كێم یا ئێزدیان دناڤ حەشدا شەعبی دا بوون وگەهشتینە وان ل دەمێ ئازادكرنا وان دەڤەران ، ئیرۆ ئەڤ چەندە ئانكو گەهشتنا وان بۆ ناڤ رێزێن حەشدا شەعبی بوویە بابەتێ جادا ئێزدی وكوردستانێ كو هەر كەسەك یان ئالییەك بخۆ شرۆڤەكێ ددەتە وی بابەتی ، و نائێتە ڤەشارتن كو ڤێ چەندێ ئانكو هاتنا حەشدا شەعبی بۆ دەڤەرێن ئێزدیان ل باشوورێ چیایێ شنگالێ و ئەو ئێزدیێن گەهشتینە وان ، ئێزدی دلگران كرینە ب شێوەیەكێ تایبەت و كوردستانێ ب شێوەیەكێ گشتی ، بەلێ ل دووڤ بۆچوونا من و پتریا چاڤدێر و شرۆڤەكار ژی دكۆكن لسەر ڤێ چەندێ كو هاتنا حەشدا شەعبی بۆ دەڤەرێن ئێزدیان دوو مەرەمێن سەرەكی پێ هەنە :- یا ئێكێ كو وان دڤێت جارەكا دی ئێزدیان ژ باوەشا كوردستانا دایك ڤەقەتینن و وان بكاربینن ژبۆ جێبەجێكرنا مەرەمێن خۆ یێن تایبەت ، ویا دووێ ئەوە كو هاتنا حەشدا شەعبی بۆ ڤێ دەڤەرێ و سنوورێ عێراقێ دگەل سووریا كۆنترۆل بكت و رێ بۆ ئیرانێ خۆشكەتن داكو ئیران ب ئازادانە هاتن وچوونێ بكت وپرۆژە و مەرەمێن خۆ ب ئاسانی و ساناهی جێبەجَی بكت ، و دەستهەلاتا خۆ بهێزتر لێبكەتن ل عێراق وسووریا و لوبنانێ و گۆرەپانە بۆ وێ بەرفرەهتر لێبهێت ،و رێژەكا زۆرتر یا چەكدارێن شیعەیان بهنێرتە سووریا بۆ شەری دگەل گرۆپێن سوننی و شەرێ درێژتر و فراوانتر لێبكەت ل سووریا ، و دیسا بڤێ چەندێ ئیران دێ شەرێ تیرۆرێ و داعش گیرۆكت ،هەروەسا دێ جارەكا دی سوننە بەرگرییێ كەن ل دژی وان ،و ژنوو هندەك رێكخراو وگرۆپێن دی یێن چەكدار چێكەن لبن هندەك ناڤێن دی مینا داعش و قاعیدە كا چاوا ل بەریا نۆكە ئەو چێكربوون.
هەر ژ سەدەما ڤی پرۆژێ ئیرانێ هەڤپەیمانیا ل دژی داعش دێ بارێ وێ گرانتر لێهێت ، و شەر وناكۆكی دێ ژ نوو سەرهلدەنەڤە ل عێراق و سووریا ، و ژخۆ دەڤەر هاتیە وێرانكرن و كاڤلكرن كو خۆ لبەر پتر دەردەسەریێ ناگرت ، و ئالییێ پتر زەرەرمەند ژڤێ هەمییێ هەر ئێزدی بخۆنە كو ل ماوێ بۆری دا ب هەزاران هاتینە كوشتن و رەڤاندن وژن و زارۆك هاتینە فرۆتن و دەڤەرا وان هاتیە خرابكرن وكاڤلكرن و ژێرخانەیا وان هاتیە ژناڤبرن ، و ب سەدێن هەزارا نۆكە ئاوارەنە ل ناڤ كەمپان دا كو درەوشەكا پەریشان دا دژین ونۆ دەڤەرێن وان دابەشكرینە و د نیمچە داگیركرینە هندەك لبن دەستێ گرۆپێن پەكەكێ دانە و هندەكا دی حەشدا شەعبی تێدایە، ئانكو چارەنڤیسێ ئێزدیان زۆر یێ ئالۆزە و نەیێ رۆنە و هیچ گەشبینییەك نەیا دیارە.
تُتاح هذه الصورة أيضا في: کوردی
