پێكڤه بۆ كاركرنێ ل سه‌ر ریفراندومێ
هه‌يفا دوسكى
یا ئاشكه‌را یه كو كو مژارا ریفراندومێ و سه‌ربخوه‌یێ و راگه‌هاندنا ده‌وله‌تا كوردستانێ نیڤشكێ هه‌ر خرڤه‌بوون و كۆمبوونه‌كێ یه ژ بۆ بابه‌تێ ریفراندومێ ل هه‌ر جهـ و ده‌زگه‌هه‌كێ راگه‌هاندنێ یه، یێ دهێته ئازراندن و ئه‌م ل هیڤیا هندێ نه، وه‌ك پرۆژه بكه‌ڤیته د ناڤا ته‌خ و چینێن جڤاكی دا و كار ل سه‌ر بهێته‌كرن. وه‌كو گه‌له‌ك دانوستاندن و بگر و ڤه‌كێش ل سه‌ر هاتینه كرن و مه چ گومان نینه كو بۆ مژاره‌كا هۆسا و ب ڤی ره‌نگی ئه‌م پێدڤی هندێ ینه، ژ به‌ر كو ئه‌ڤه مژاره‌كا چاره‌نڤیسازه و نابیت مله‌ت یێ ژێ غافل بیت، به‌لكو دڤێت ئه‌ڤ دان و ستاندنه شورببیته د ناڤ هه‌می گه‌هێت جڤاكیدا و هه‌ر كه‌سه‌كێ ل ڤی وه‌لاتی دژیت بێ جوداهیا دینی و مله‌تینیێ، ماف هه‌بیت ره‌ئی و دیتنێن خوه ل سه‌ر بده‌ته و ئه‌و ره‌ئی و هزر ببنه به‌رێ بنیاتێ ڤی پڕۆژێ مه‌زن و پیرۆز ده‌ما ئه‌م به‌حسا ته‌خ و چینێن كومه‌لگه‌هی ژی دكه‌ین، مه‌به‌ستا مه زێده‌تر ئه‌م خه‌لكی ئاشنای ڤی بابه‌تی بكه‌ین، ریفراندومێ و گرنگیا ریفراندومێ بۆ كوردان، جوداهیا ریفراندومێ ل گه‌ل هه‌لبژارتنێن په‌رله‌مانی یان ئه‌نجوومه‌نێ پارێزگه‌هان، گرنگیا سه‌رخستنا ریفراندومێ د چ دایه، چ ئه‌رك دكه‌ڤیته سه‌ر ملێن مه ئه‌ڤێن ئه‌م خوه ب نڤیسه‌ر و رۆژنامه‌ڤان و چالاكڤان دزانین دپێگه‌هاندنا خه‌لكی دا ل سه‌ر ریفراندومێ، ئه‌م چاوان بالا رایا گشتی بۆ ریفراندومێ بكێشین، ژ به‌ر كو هنده‌ك بابه‌ت یێن هه‌ین، گرێدای چ حزب و یه‌نێن سیاسی و ئایدولۆجیه‌تان نینه، به‌لكو ب چاره‌نڤیسێ مله‌ه‌ته‌كی ڤه گرێدایه، بوویه گرنگه د ڤی هه‌ل و مه‌رجی دا، ئه‌م هه‌می شیانێن خوه بده‌ینه كاری كو گرنگیا ریفراندومێ و پشكداریا خه‌لكی تێدا رۆهن و زه‌لال بكه‌ین، ژ به‌ر كو ده‌رفه‌ت دێ ئێكجار بیت، هندێ ده‌نگێ مه بۆ رفراندومێ ب ئه‌رێ بن، دێ زێده‌تر باوه‌ریا خوه وه‌رگرین و دێ زێده‌تر شێین پێگه‌یێ خوه موكم و قایم بكه‌ین و دێ زێده‌تر شێین باوه‌ریا جڤاكێ نیڤده‌وله‌تی بۆ خوه په‌یدا كه‌ین، كو به‌لێ ئه‌م ملله‌ته‌كێ غه‌در لێكرینه و مه ئاخ و زمان و كه‌لتۆرێ خوه یێ هه‌ی، مه شیانێن رێڤه‌برنا خوه یێن هه‌ین، هینگێ ئه‌و دشێن رۆناهیا كه‌سك بۆ مه هلبكه‌ن، دساته وه‌خته‌كی دا، ئه‌م نوكه ل گه‌ل وه‌لاتێ عیراقێ وه‌ك كرێدار و خودان خانی نه و عیراق ڤێ مامه‌لێ ل گه‌ل مه دا دگه‌ت، دڤێت چ دی ئه‌م ژ لایێ ڤان وه‌لاتان ڤه نه‌هێینه سه‌ركوتكرن و هه‌ر رێ ژی بۆ ڤێ چه‌ندێ نه‌ده‌ین، ئه‌م ببینه خودان ئیراده و خودانێن بریارا خوه و خودان سه‌روه‌ریا خوه، ئه‌ڤه‌ێن هه‌نێ ژی دێ چاوا بده‌ست ڤه هێن، ئه‌كید ده‌ما پرۆژێ راپرسیێ سه‌رگرت، پشكداریا خه‌لكی یا زێده و هه‌ست ب به‌رپرساتیێ بیت. یا من دڤێت د ڤی ده‌رباره‌ی دا بێژم و بگه‌هینم، په‌یامه‌كه بۆ هه‌می ژنان، بۆ هه‌می چالاكڤانان، بۆ هه‌می نڤیسه‌ر و ره‌وژنامه‌نڤیس و هونه‌رمه‌ند و هه‌می ته‌خێن جڤاكی بێ جوداهی، ئه‌م پێكڤه كاری ل سه‌ر رایا گشتی بكه‌ین و چاڤ رونیه‌كێ بده‌ینه وان، ریفراندومێ بۆ وان زه‌لال بكه‌ین، ئه‌م وان د بابه‌تێ سه‌رخوه‌بوونێ و گرنگیا سه‌رخوه‌بوونێ دیار بكه‌ین، ئه‌ڤێ ژی دوور بێخین ژ هه‌می بابه‌تێن سیاسی و ئایدولوژی، به‌لكو وه‌ك پرۆژه‌یه‌كێ نه‌ته‌وه‌ی ل سه‌ر كار بكه‌ین، ژبه‌ر كو ده‌ستكه‌فتێن وێ بۆ ملله‌تی نه و ئه‌م پێدڤی نه ملله‌تی ژ قووناغاكا راوه‌ستیای و مه‌ند بۆ قووناغه‌كا دێ ڤه‌گوهێزین و هه‌ست ب خوه بكه‌ین كو ئه‌م ل سه‌ر ئاخا خوه‌ینه و وژدانا خوه به‌رامبه‌ری شه‌هیدێن خوه ئارام بكه‌ین، دڤێت ده‌ست بده‌ست ئه‌م كاربكه‌ین و چاڤێ مه هه‌میان ل سه‌ر خستنا ڤی پرۆژه‌ی بیت.
ئه‌ڤ گۆتار ل مالپه‌رێ ئه‌ڤرۆ نيوز،ل رێككه‌فتى 27/5/2017ێ هاتيه به‌لاڤكرن.
تُتاح هذه الصورة أيضا في: کوردی
