مافێ مەیە ببینە خودان كەنالەكێ ئاسمانی
خالد خدر
راگەهاندن بوویە ژ گرنگترین پێتڤیێن رۆژانە وب هەمی ئالاڤێن خۆڤە كو تەكنەلووژیایێ پێشكەفتنەكا مەزن بخۆڤە گرتییە و راگەهاندنێ ژی دناڤا ڤێ پێشكەفتنێ دا گەشەكرییە ودەولەی سەرێ ڤێ پێشكەفتنێ ،ئیرۆ جیهان بوویە وەك گوندەكی یان بالاخانەكێ وئیرۆ ژ ئالاڤێن راگەهاندنێ یێن گرنگ و بەربەلاڤ ژلایێ پتری و جۆری ڤە كەنالێن ئەسمانی نە و ڤان كەنالێن ئەسمانی هەمی سنوور بەزاندی نە.
وهەر پارتەكێ یان گرۆپەكێ سیاسی ل دنیایێ كەنالەكی ئەسمانی هەیە،بەلكو هەر كۆمپانییەكێ یان هندەك جهان دەولەمەند بوونە خودانێن كەنالێن ئەسمانی ئەڤە ژی تشتەكی سروشتی یە و دهەمان دەم دا خالەكا ئەرێنی یە دوارێ پێشكەفتن و وەرارێ دا ، دڤی دەربارەی ئەم ئێزدی ژی وەك پێكهاتەكا خودی تایبەتمەندی ژلایێ ئایینی ڤە مافێ مەیە ببینە خودانێ كەنالەكێ ئەسمانی ژبۆ دیاركرنا رێورەسمێن مەیێن ئایینی و كەلتۆری و جڤاكی ب رێیا ڤی كەنالی، ئەو بوو بەریا چەندسالا كەنالەكی ئەسمانی بناڤێ ئێزدیا هاتە بەخشكرن ل دەرڤەی وەلاتی لبن ناڤێ (چرا تیڤی ) ، بەریا ئەڤ كەنالێ ناڤهاتی بێتە ڤەكرن و هێشتا مە نە بیهستبوو كەنالەكی ئەسمانی دێ ئێتە بەخشكرن بۆ ئێزدیا ،ئەگەر ژبیرا من نەچووبە ل هاڤینا سالا 2012 ێ بوو برادەرەك ژ ئێزدیێن ئەلمانیا هاتبوو كوردستانێ ب سەرەدان ودچارچووڤێ سەرەدانا خۆدا وی بەرێزی سەرەدانا دەڤەرا مەیا هەوێریا كر و ب رێیا هندەك برادەران ڤیا سەرەدانا نڤیسینگەها لالش بكت ل دێرەبوونێ ، وهەڤالێن دەستەكا رێڤەبەر یا نڤیسینگەها ناڤبری ئەز داخوازكرم بۆ دیدارا وی كەسەیەتیا ئێزدی هەر چەندە ئەز نە ئەندام بووم ل دەستەكا نڤیسینگەهێ دا بەلێ ب سۆپاسی ڤە هەڤالێن نڤیسینگەهێ رێزەكا تایبەت ددەنە من ، هەرحال مە ئەو بەرێزە دیت و مە گەنگەشە دگەلدا كر.
دچارچووڤێ دیدارامە دا وی مزگینییا ڤەكرنا كەنالەكی ئەسمانی تایبەت ب ئێزدیان ڤە دامە ، ئەم ژئالیێ خۆڤە گەلەك دلخۆش بووین كو جارا ئێكێ یە ل دیرۆكێ دا كەنالەكی تەلەفزیۆنی نەك ئەسمانی ژی بۆ ئێزدیان دێ ئێتە ڤەكرن و ئەم گەلەك كەلەجانی بووین و تێرا دنیایەكێ كەیف خۆش بووین ،پشتی مێڤانێ مە پەیڤا خۆ ب داوی ئینایی و مزگینییا خۆ گەهاندی مە دچارچووڤێ گەنگەشێ دا من پرسیارەك ؟ئاراستەی وی بەرێزی كر و پرسیارا من ژی ئەو بوو گەلۆ ئەو كەنالێ ئەسمانی یی بێ لایەنە ؟ل دەستپێكێ تێنەگەهشت ژ پرسیارێ من دیسا دووبارەكرەڤە من گۆتێ یێ بێ ئالی یە ژنۆ تێگەهشت وبەرسڤا من ب كەنی ڤە دا وگۆت هەر ئالییەكی هاریكارییا ڤی كەنالی بكە ئەمێ ژێ وەرگرن چ پەدەكە بە یان یەنەكە بە یان ژی پەكەكە بە بەلێ كەنال یێ ئێزدیایە وخۆسەرە ، من ژی گۆت دەباشە ئەز ب هیڤی مە ئەڤ چەندە راست بە هنگێ گۆمان ژمنرا چێبوو كو نەیی بێ لایەنە ولەوما من ئەو پرسیارە ژوی جوامێری كر ،چاوابە ئەز قاییل نەبووم ب بەرسڤا وی ،هەتاكو كەنال هاتە بەخشكرن وهەر ل رۆژیێن ئێكێ راستییا وی دیار كو ئەو نەیی بێ لایەنە و بهیچ رەنگەكی نەیێ ئێزدیایە كو سیاسەتا پارتەكا دیار بەخش دكت ، ژبلی وان كەسێن تێدا كاردكن كو گۆمان تێدا نینە ئەو ئێزدی نە و بەخشكرنا سترانێن فلكلۆریێن شنگالێ و دیاركرنا هندەك دیمەنێن دەڤەرێن ئێزدیان یادی هەمی ڕاگەهاندنا لایەنەكی دیاركری یە ئەوژی پەكەكە یە ، هیڤی وكەلەجانی وخەونێن مە یێن مەدیتین بۆ هەبوونا كەنالەكێ ئێزدیا ژناڤچوون.
تُتاح هذه الصورة أيضا في: کوردی
