زیانەكا مەزن گەهشتە جڤاكێ ئێزدیان
خالد خدر 
ئەڤە پتر ژ سالەكێ یە باژارێ شنگالێ هاتیە ئازاد كرن لبن كۆنترۆلا تیرۆرستێن داعش و لسەر دەستێ پێشمەرگێن قارەمان ،و هێشتا پتریا گوند وكۆمەلگەهێن ئالیێ باشوورێ دەڤەرا شنگالێ لبن كۆنترۆلا دڕندەیێن داعش دانە ،سەرەرایی كو ئەڤە پتر ژ دووسالایە ،ئالیێ باكۆر ژ شنگالێ ب تەمامی هاتیە ئازاد كرن، بەلێ هەتا نهۆ خەلكێ شنگالێ یێ ئاوارە نە زڤرینە ڤە سەر جه و وارێن خۆ ل دەڤەرا شنگالێ.
خەلكێ مە یێ شنگالێ هێشتا دنالن ژ ئێش وئازارێن خۆ و ژ سەدەما وێ فەرمانا مەزن یا هاتی سەرێ وان ، كو ب هەزاران ژن و كچ و زارۆك هاتنە رەڤاندن ژ ئالیێ چەكدارێن رێخستییا تیرۆرستیا داعش ڤە ، و ب مخابنیڤە هێشتا ب هەزارا ئەو ژن و كچ نەزڤرینە ڤە و ماینە لبن دەستێ وان هۆڤان ، و خەلكێ مەیێ ئێزدی دڤێت و گەلەك یی بلەزە بۆ زڤرینا شنگالێ ، بەلێ ب ڤان مەرجا و ڤی دەستوداری ئەو نكارن نهۆ بزڤرن ، و ژبەر چەندین سەدەمان و هۆكاران ، یا هەرە سەرەكی ژبەركو هەتا نهۆ رووبەرەكی مەزن ژ ئاخا شنگالێ مایە لبن كۆنترۆلا داعش ب تایبەتی ئالیێ باشوور وەك مە لسەری دای دیار كرن ، و ژبەر هەبوونا ژمارەكا نەیا كێم ژ هێزین سیاسی یێن جۆراوجۆر وب تایبەتی یێن چەكدار ولبن ناڤێت جودا جودا ، كو خەلكێ شنگالێ هەست ب نەئارامی و نەئێمناهیێ دكەت ژ هەبوونا وان هێز وئالیان ل دەڤەرا شنگالێ ،وژبەر نەبوونا ئەولەهیێ وترسا دووبارە بوونا فەرمانا، و ژبەر نەبوونا مەرج وخزمەتگۆزاریێن ژیانێ ل دەڤەرێ ژ ئەنجامێ شەری و وێرانكرنێ ژ ئالیێ داعش ڤە ، و ژبەر نەمانا باوەریێ ژ دراوسێ و هەڤتوخوبێن خۆ ژ هۆزێن ئەرەبی و سوننەیێن توركمانێن تلەعفەرێ ، كو ئەو ئەنجامدەر و گونەهبارێن سەرەكی بوون ژ وێ مەرگەساتا هاتیە سەرێ ئێزدیان ل دەڤەرا شنگالێ ، هەروەسا ژبەر گەلەك سەدەم و هۆكارێن دی ، ژ ئەنجام و ڤەرێژا وێ مەرگەساتا ئێزدی تووش بووین ، زیانەكا گەلەك مەزن گەهشتە جڤاكێ ئێزدیان ، ژبلی كوشتن و رەڤاندنا ژن وكچ و زارۆكێن ئێزدیان ، نهۆ ب سەدێن هەزارا ئاوارەبووینە كو ژیانەكا ب ئازار و دژوار دبۆرینن دناڤا كەمپان و خانیێن نیڤەجۆر ڤە ، و ب هەزاران كۆچبەر بووینە وەلاتێن ئەورپی كو گەلەك ژ وان ژی هەتا نهۆ دناڤا كەمپێن ئاواران دا ژیانەكا بێ سەروبەر دەرباز دكەن.
و وەك مە دای خویا كرن كو دەڤەرا شنگالێ بوویە گۆرەپانەك بۆ هەڤركیێن هندەك هێز وگرۆپێن سیاسی و چەكدار ، كو پتریا وان ژ دەرڤەی سنۆرێ هەرێما كوردستانێ و عیراقا فیدرال هاتینە ، سەرەرایی كو ئەو لبن ناڤ و ئارم و ئالایێن جۆراجۆر كار دكەن و سیاسەتا ددەنە مەشاندن ، بەلێ ئارمانج و نیازێن وان ئێكن و لسەر ئێك ئایدۆلۆژیێ نە و ئەجندایێن وان د خویانە كا چنە و بۆ چنە ؟ ، تشتێ سەرنج راكێش وجهێ سەرسۆرمانێ ! كو ژمارەكا كێم یا ئێزدیان كەفتینە دناڤ ڤان گرۆپ وهێزان دا ، هەر چەندە ئەو نە گەلەكن بەلێ ئەوێن دی وان بخۆ دكەنە بەهانە و پالدەر داكو مەرم ونیازێن خۆ پێ ئەنجام بدەن و ئەڤ چەندە ب هیچ رەنگەكی خزمەتا دۆزا ئێزدیان ناكەت بەلكو دێ پتر زیانێ گەهینیتێ.
تُتاح هذه الصورة أيضا في: کوردی
