سه‌ركه‌تنا دۆنالد ترامپی و كارتێكرن ل سه‌ر كوردان!
د.سۆزان ئامێدى
سه‌ركه‌فتنا ترامپی د هه‌لبژارتنێن سه‌رۆكاتیا ئه‌مریكا دا شرۆڤه‌كارێن سیاسی و سایكۆلۆژی حێبه‌تی كرن و وه‌كو پێشبینی و هیچ راپرسیه‌كێ نه‌هات، لێ ب راستی ئه‌ز ژ وان كه‌سێن كێم بووم كو من پێشبینیا سه‌ركه‌فتنا ترامپی كری!، چونكی ئه‌مریكا د دابینكرن و به‌رقراركرنا ئه‌من و ته‌ناهیێ دا بۆ ده‌ڤه‌رێن هه‌ڤڕكی ل سه‌ر شكه‌ستن خواریه، به‌لكو فاكته‌ره‌كێ هاریكار بوویه بۆ پتر خۆشكرنا ئاگرێ ئالۆزیان ل وان ده‌ڤه‌ران. زێده‌باری هه‌لویست و رێكه‌فتنێن وێ كو هه‌ڤپه‌یمانێن خوه ل رۆژهه‌لاتا ناڤین و ئورۆپا تۆره كرینه، له‌ورا من وه‌سا شرۆڤه دكر كو هه‌كه ئه‌مریكا بخوازیت ل خوه بزڤڕیت و سیاسه‌تا خوه بگهۆریت، پێدڤیه پارتا ده‌ستهه‌لاتدار بگهۆریت.
لێ ژبه‌ر داخویانیێن وی یێن نه‌دبلۆماسی سه‌ركه‌تنا ترامپی ئالۆزیه‌كا مه‌زن د سازیێن راگه‌هاندنێ دا خولقاند، وه‌كو قه‌ده‌غه‌كرنا موسلمانان كو بچنه ئه‌مریكا و تێكه‌ستكرنا وی ل سه‌ر دروستكرنا دیواره‌كی ل سه‌ر سنوورێ مه‌كسیك، لێ ئه‌ڤان گازندان نه دبلۆماسیا وی د هه‌لبژارتنان دا نه‌خار و زێده‌باری خوه‌نیشادانان وه‌كو نه‌رازیبوون ژ ئه‌نجامێن هه‌لبژارتنان پشتی هینگێ ژی چ كارتێكرن نابیت.
ب دیتنا من د قووناغا داهاتی دا چاره‌یێن سه‌ركه‌فتی بۆ ره‌وشا ئه‌منی و سیاسی ل رۆژهه‌لاتا ناڤین دێ بۆ ترامپی ب زه‌حمه‌ت بن، ب تایبه‌تی، ب تایبه‌تی پشتی وان كارڤه‌دانێن نه‌رێنی كو د ناڤ مه‌یدانا ئه‌مریكا دا دیار بووین پشتی سه‌ركه‌فتنا ترامپی، زێده‌باری كو سیاسه‌تا ئه‌مریكا به‌ری سازی و ده‌سته‌یان وه‌كو جڤاتا ئه‌وله‌كاریا نه‌ته‌وه‌یی و جڤاتا په‌یوه‌ندیێن ده‌رڤه و پنتاگۆن و هه‌والگیریێ و..هتد، یا دارێشتیه، تنێ دمینیت كاروبارێن ناڤخۆیی ژ بۆ ئارامكرنا تۆره‌بوونا خه‌لكی و هندی دشیان دا بیت دێ خوه ژ چالاكیێن ده‌رڤه دوور كه‌ن كو خزمه‌تا ئابوورێ ئه‌مریكا ناكه‌ت. لێ خۆگرتن ده‌رباره‌ی رێكه‌فتنا ئه‌تۆمیا ئیرانێ نه‌بیت وه‌كو نموونه، لێ دێ له‌ز د لێگه‌ریانا چاره‌سه‌ریێن مومكن دا ده‌رباره‌ی باده‌كێن هلاویستی یێن عیراقێ و سووریێ هێته‌كرن. ل هه‌مان ده‌می ترامپی داخویانیێن ئه‌رێنی ده‌رباره‌ی ملله‌تێ كورد ب گشتی و ب تایبه‌تی ده‌رباره‌ی پێشمه‌رگه‌ی هه‌نه، تشتێ دلخۆشكه‌ر ئه‌وه كو داخویانیێن ترامپی ده‌رباره‌ی كوردان نه بۆ هه‌وا هه‌لبژارتنان بووینه، چونكی كورد ب لوبیێ كارتێكه‌ر ل ئه‌مریكا ناهێنه هژمارتن، لێ ئه‌م كورد هیڤیدارین كو ئه‌و داخویانی و سۆز ببنه كه‌توار، نه‌مازه كو كورد یێن ژ سۆز و په‌یمانێن زۆر و كریارا كێم ب وان سۆزان ده‌رباره‌ی دۆزا خوه یا عادل و مرۆڤاتی بێ هیڤی بووین.
لێ ره‌نگه راوه‌ستیانا جودا جودا یا پارتێن كوردی ل هه‌ر چار پارچێن كوردستانێ (عیراق، توركیا، ئیران و سووریا) دگه‌ل هێزێن هه‌رێمی و نیڤده‌وله‌تی ترامپی پال بده‌ن كو ل گه‌ل هنده‌ك ئالیان هه‌ڤپه‌یمانیێ بكه‌ت و ل گه‌ل یێن دی نه! ئه‌و ژی دێ ل گۆر به‌رژه‌وه‌ندیێن ئه‌مریكا ل ده‌ڤه‌رێ مینیت، له‌ورا پێدڤیه كار ل سه‌ر ڤان خالێن ل خوارێ بهێته‌كرن:
1. رێكخستن و یه‌كبوونا رێزێن كوردی كو پرسه‌كا هه‌ری گرنگه.
2. ب كارئینانا رێزێن جودا جودا بۆ خزمه‌تا به‌رژه‌وه‌ندیێن نه‌ته‌وه‌یی، نه‌كو بۆ به‌ره‌وه‌ندیێن حزبه‌كێ ب تنێ.
3. پلاندانانا ستراتیژی یا نه‌ته‌وه‌یی، هه‌تا كو هه‌ر پارچه‌كێ تایبه‌تمه‌ندیا خوه ژی هه‌بیت، لێ ب هه‌ڤتێگه‌هشتن و رێكه‌فتنا ته‌ڤایا ئالیان.
ئه‌ڤ گۆتاره ل مالپه‌رێ ئه‌ڤرۆ نيوز،ل 14/11/2016ێ هاتيه به‌لاڤكرن.
تُتاح هذه الصورة أيضا في: کوردی
