دڤێت رێیا خۆ یا راستەقینە هەلبژێرن؟
خالد خدر 
ئێزدی نهۆ د قۆناغەكا زۆر نازك وهەستیار دا دبۆریت بتایبەتی كو هەڤدەم دگەل برێڤەچوونا ئۆپەراسیۆنا ئازادكرنا پارێزگەها نەینەوا و باژێرێ مووسل ژ بن كۆنترۆلا داعش ، تێتە زانین كو رێژا 90% یا ئێزدیان دكەڤینە سەرب پارێزگەها نەینەوا ڤە ، و دگەل ئازادكرنا پارێزگەها نەینەوا هەموو دەڤەرێن ئێزدیان دێ هێنە ئازادكرن ، هەتا نهۆ چارەنڤیسێ دەڤەرێن ئێزدیان نەیێ دیار ورۆنە ، بتایبەتی كو زۆربەیا ئێزدیان نهۆ ئاوارەنە و ژیانەكا سەخت و دژوار دبۆرینن ل ناڤ كەمپان دا.
ئەڤجا پسیارەك ؟ تێتە پێش كو ئێزدی دێ چاوا كاركەن وخۆ ئامادە كەن لسەر پاشەرۆژا خۆ پشتی ژناڤ چوونا داعش ، هەژی ئاماژە پێكرنێیە كو داعش زیانەكا گەلەك مەزن گەهاندیە دەڤەرێن ئێزدیان كو هەر كار وكریارەكا پیس وچەپەل و دوور ژ بەها و بنەمایێن مرۆڤایەتی ل دەرهەقێ ئێزدیان ئەنجام داینە ، سەرەرایی ڤان هەموو رەفتارێن وان داعش دەڤەرێن ئێزدیان وێرانكرن و خرابكرن و ژیانا مرۆڤان ل گۆر ڤی بارودۆخی زۆر ب زەحمەت كرینە و ب ئاسانی نكارن دووبارە بەردەوامیێ بدەنە ژیانا خۆ ل وان دەڤەرێن داعش داگیركرین لبن ڤی هەلومەرجی ، چنكو نە بتنێ ئاخ و ئەردێ ئێزیان هاتبوو داگیركرن و وێران كرن ، بەلكو كەسایەتییا مرۆڤێ ئێزدی هاتیە تێكدان و داگیركرن ژلایێ تیرۆرستێن داعش ڤە ، و كارتێكرنەكا هەرە مەزن ل دەروونێ ئێزدیان كری یە ،چنكو ئێزدی تووشی هێرشەكا كێم وێنە بوون ل مێژوویا هەڤچەرخ دا ، ب سەدێن سالان و بۆ چەندین بەرەبابێن دی كارتێكرنێن نەرینی و خرابێن هاتینە ئەنجام دان ل دژی جڤاكێ ئێزدیان نائێنە ژبیركرن و هنداكرن.
ژلایەكێ دی ڤە دەڤەرێن ئێزدیان نهۆ كەفتینە د سەقایەكی نالەبار ژبەر ناكۆكی و ململانەیێن سیاسی ، ب تایبەتی ل دەڤەرا شنگالێ كو هندەك لایەنێن سیاسی یێن ژ دەرڤەی سنۆرێ عێراقا فیدرال هاتین و ب شێوەیەكێ نە دروست خۆ سەپاندین ل شنگالێ ، ئەڤان لایەنێن هەنێ كاودانێن هاتینە سەرێ ئێزدیان بخۆ ب دەلیڤە دیتن بتایبەتی پشتی 3ی تەباخا سالا 2014 دەمێ داعش دەڤەرێن ئێزدیان داگیركرین ، كو دڤەرا شنگالێ هاتی ڤالاكرن ژ خەلكی و ئاوارە كرین ئەوان ئەو ڤالاتی بخۆ بكارئانی و خۆسەپاندن ل شنگالێ و شوون پیێن خۆ موكمكرن ل وێدەرێ ، جهێ داخێ یە كو كارینە هندەك ژ خەلكێن دەڤەرێ ب خۆڤە گرێبدەن و ب رێیا هندەك دروشمێن تەیسۆك و بێ رامان ، ها ئەڤ چەندا هەنێ ئانكو ململانەیێن سیاسی سەدەمەكا بهێزن وئەز دكارم بێژم سەرەكی یە كو دێ بیتە رێگر ژبۆ دووبارە زڤراندنا خەلكێ شنگالێ و دەڤەرێن دی و پاشی ژنوو ئاڤاكرنا دەڤەرێ و پاقژكرنا وێ ژ شینوار و بەرمایكێن داعش ، چنكو نە بتنێ ئەو هێز ولایەنێن سیاسی نە بەلكو ئەو خودانێن هێزێن چەكداری نە و ژمارەكا نەیا كێم یا هێزێن چەكدارێن جۆراوجۆر ل شنگالێ هەنە كو پتریا وان هێزان نە د فەرمی و باوەرپێكرینە ، لەورا پاشەرۆژا زڤرینا ئێزدیان بۆ دەڤەرێن خۆ زۆر دێ یا ب زەحمەت بت و گەلەك گرێ وئاستەنگ دێ كەڤنە د رێیا ڤێ پرۆسێسێ ،یەفەرە ئێزدی هەموو د هشیاربن لسەر هەر پێشهاتەكا بهێت و ب شێوەكێ جدی بیر ل پاشەرۆژا خۆ بكەن كو دێ ل نێزیك هەموو دەڤەرێن وان ئێنە ئازادكرن ودڤێت رێیا خۆ یا راستەقینە هەلبژێرن؟ ئەوژی زڤرینە بۆ باوەشا هەرێما كوردستانێ.
تُتاح هذه الصورة أيضا في: کوردی
