ده‌میرتاش د خه‌نده‌كا شه‌ری دا خه‌ندقی؟!
كۆڤان حسێن
دبیت پتری (800) سالان بیت تورك ده‌وله‌ت و دبیت د ڤان سالان دا هیچ وه‌خته‌كێ ده‌وله‌ته‌كا بێ شه‌ر و خوین رشتن نه‌بوویه، ئانكو تورك و ئالوزی و شه‌ر هه‌ڤال جێمكێن ئێكن، بۆ توركا شه‌ر گه‌له‌ك ژ ئاشتی و (التزاماتێن) ئاشتیێ خوشتره، بۆ توركا شه‌ره‌كێ بێ هه‌ڤسه‌نگی دگه‌ل بزاڤه‌كا پارتی زانی ل هنده‌ك چیایێن ئاسێ زۆر خوشتره ژ ئاشتیه‌كا بهێز و ل كولانێن پایته‌ختی، ئاشكراتر بێژم پارتیا كریكارێن كوردستانێ و (پاشكوێن خوه) باشترین خزمه‌تێ بۆ توركیا دكه‌ن وه‌ختێ توركیا دكێشن شه‌ره‌كێ بێ هه‌ڤسه‌نگی دا، ده‌مێ دووماهیكێ ب ئاشتیه‌كا سار دئینن هینگێ ژنوو هیڤیێن توركیا گه‌ش دبن. توركیا كلتوره‌كێ شه‌رانگیزی یێ درێژ ژ به‌لقانا تا قه‌وقاسیا تا حجاز و یه‌مه‌نێ و ژ ئیرانێ تا یونانێ ب درێژیا میژوویێ یی هه‌ی، تورك هه‌لگرێن چ ئایدۆلۆژیه‌كا سیاسی بن بسپۆرن د شه‌رێن بچووك و نیمچه ناوچه‌گه‌ری دا.
(په‌كه‌كێ) تا نوكه به‌رنامه‌كێ ئاشكرا و داخوازیه‌كا لۆژیكی و نینه. هنده‌ك بنه‌ما بۆ خوه ل چیایێن كوردستانێ خولقاندی نه ل هیچ فه‌رهنگه‌كا سیاسی ناچن. ئاشكرا بوو هه‌رچاڤدێره‌كێ سیاسی ئه‌سته‌مه بزانیت نوكه (په‌كه‌كێ)چ دڤێت؟! سیاسه‌تا (خه‌نده‌كا) پشتی نه‌مانا پرۆسا ئاشتیێ راستی بریاره‌كا سه‌یر و پری ئه‌نجامێن كاره‌ساتی بوو. ڤه‌گوهاستنا شه‌ری بۆ كولانێن باژێرێن كوردێن باكور راستی رویێ دی یێ درنده‌یا توركیا بوون، ئاشتی ب هه‌می كێماسیێن خوه‌ڤی د خزمه‌تا كوردستانێ و گه‌لێ كورد دابوو ل باكورێ كوردستانێ، لێ بێ به‌رنامه و ستراتیژیه‌كا ئاشكرا هه‌می به‌رهه‌مێ ئاشتیێ بن گور بوون. ئه‌ردوغان و پارتیا خوه هینگێ دێ بۆ ئاشتیێ زڤرن وه‌ختێ لاوازی ناسناما ئالیێ كوردی بیت، دیاره ژی دێ د ڤێ تاكتیكێ دا سه‌ركه‌ڤیت، باشترین نموونه ژی ژ(82) په‌رله‌مانتارا بوونه(40) پشتی خه‌باتا خه‌نده‌كا؟! باجا ئاشتیێ بۆ ئه‌ردوغانی و حزبا وی گه‌له‌كا مه‌زن بوو، لێ په‌كه‌كێ نه هێلا؟! سه‌ر ئه‌نجام هه‌می سمبولێن سیاسی یێن باكور بوونه ئێخسیرێن بریارێن سه‌ر مه‌ستانه یێَََََََََََََن بالێ هشكباوه‌ریا په‌كه‌كێ، ده‌میرتاش و هه‌ڤالێن خوه د ناڤبه‌را ژیانا په‌رلمانی و په‌رده‌پوشكرنا شه‌رێ خه‌نده‌كا دا خه‌ندقین؟! سیاسه‌تا خولقاندنا ئاریشا وه‌ك ره‌ڤین ژ چاره‌سه‌ریێ ئه‌ردوغان تێدا (سه‌یدایه) پرسا نه‌ته‌وه‌كا بێ ناسنامه نه‌ته‌وه‌كا بن ده‌ست نوكه بوویه ئازادكرنا فلانی و عه‌لانی؟! كوردێن باكور پێدڤی یه پشتی پتری (30) سالا ڤێ پرسیارێ ژ په‌كه‌كێ و پاشكوێن وێ بكه‌ن. ئه‌رێ كا به‌رهه‌م؟! خوینێ، كا به‌رنامێ وه یێ به‌رئاقل، كا نه‌خشا ئاخا هین خه‌باتێ بۆ دكه‌ن؟.
تُتاح هذه الصورة أيضا في: کوردی
