پانۆراما کوودەتایا تورکیا
سەبری سلێڤانەیی
(١)
ل باشوورێ کوردستانێ ب تایبەت ل دەڤەرا بەهدینان، هندەک کەس ژ کەیفان دە درەقسین، هندەک کەسێن دی ژ قەهران دە رۆندک دباراندن، کەسێن دی ژی بەشداری دورستکرنا قەیرانا پانزینێ بوون! ئەڤە ئەقلێ ڤەگوهازتی یە، واتە ئێک ژ / بۆ ئێکە دی ڤەدگوهیزت. لێ، کێم کەس کو هزرا خوە ب کار دهینن، بوویەر دخواندن بێ کو ئەحکامێن رەها بدن و ئەڤە ئەقلێ رەخنەیی / هێرمێنۆتیکی یە.
د شەڤا کوودەتایێ دە، من دگەل هندەک هەڤالان ل باکوور و باشوور ئاخڤت، هێڤیا مە هەموویان ئەو بوو کو بوویەر ب سلامەتی ل سەر مللەتێ مە ل باکوور دەرباز ببت.
مە گۆت هەگەر کوودەتایێ سەرگرت، هێڤیدارن سەردەمەک نوو دەست پێ بکت، ژ خوە هەگەر سەرنەگرت، دیسان هێڤیدارن ئاکپارتی و ئاردۆگان سیاسەتەکا نوو (ئاشتییانە و حەکیمانە) پەیرەو بکت و ب ئاوایەکێ ئەرێنی بۆ خزمەتا هەموو گەلێن تورکیایێ تەوزیف بکت.
(٢)
هەتا نها مە بوویەرا کوودەتایێ وەکو پێدڤی نەخواندییە، بەلکو ب تنێ مە هەستێن خوە دەرێخستن، ب ئاخڤتنەکا دی: مە هەولدا کەبتا خوە هندەکێ کێم بکن.
هەر کریار یان رەفتارەکێ، پێدڤی ب خواندن و هزرکرنێ هەیە دا مرۆڤ تێبگەهت، بەلێ کارێکتەرا عاتیفی کو ب کەبتێ مەحکوومکری یە، نکارت تەجاوزا هەستان بکت، هەر گاڤەکا دەرفەت بۆ درەخست ب توندی دەربرینێ ژ خوە دکت، هەول ددت ژ وێ کەبتێ خلاس ببت بێ کو هزرێ بۆ هەر ریاکسیۆنەکا هەبت، بکت.
مرۆڤ د سروشتێ خوە دە بوونەوەرەک هزری، نەکو عاتیفی یە، بەلێ یا ئەم دبینن بەهرا پتر بوونەوەرێن عاتیفی، نەکو هزری نە. عاتیفە غەریزێ دلڤینت ب تایبەت غەریزا برس و سامانگەریێ و دکارت خوەدانێ خوە (کەسەک سادە یان سەرۆکێ ئیکەتییا زانایێن ئیسلامی بت) بەر ب دیلبوون و رەسوابوونێ ببت، زاتێ وی د ناڤ زاتێ سەردەستی دە هوندا بکت، ناسنامەیا وی یا نەتەوەیی و مرۆڤایەتی ببوهژینت و ل دوماهیکێ فێر ببت، کو ببت دووڤلانکێ هەر هێزەکا سەردەست… ئەڤرۆ هێزەک و سوبا هێزەکا دی، کی بت خەم ناکت مادەم کو سەردەستە!
(٣)
ب هەر حال، پشتی هەولا کوودەتایێ و سەربارێ هەر سیناریۆیەکێ، ب هزرا من، تورکیا دوو هلبژارتن هەنە:
ئێک: ئاکپارتی دەست ب وەبەرهینانا کوودەتایێ بۆ بەرژەوەندا خوە بکت، ب ئاوایەکێ توند بەرسڤا لایەنێن بەرهنگار بدت، دەورێ دەستهەلاتا ئەسکەری کێمتر بکت، سیستەمێ سیاسی و دەستووری بگوهەرت، واتە درێژیێ ب سیاسەتا خوە یا نها بدت، تورکیایێ ژ رەوشەکا کامباخ بەر ب کامباختر ببت و ئەڤە نە د بەرژەوەندا ئاکپارتی، تورکیا و دەڤەرا رۆژهەلاتێ دە یە.
دوو: ئاکپارتی ل خوە موکر بهێت، مێتوودەکا نوو یا سەرەدەریێ پەیرەو بکت، دەست ب سازانەکا سیاسی و نیشتیمانی بکت، زمانێ دانوستاندنێ ل سەر حەسابا زمانێ گەف و توندیێ بهێز بکت و ئەڤە د بەرژەوەندا ئاکپارتی، تورکیا و دەڤەرا رۆژهەلاتێ دە یە.
تُتاح هذه الصورة أيضا في: کوردی
