تایبەتمەندەكێ دەروونی:شووكرنا كچێن سنێلە زێدەبوویە
تۆرا لالش یا راگەهاندنێ
تایبەتمەندێ دەروونی”ئەدهەم ئیسماعیل” ددیدارەكێ دە بۆ رۆژنامەیا دەنگێ لالش راگەهاند:”دیاردا شووكرنا كچێن سنێلە ل هەرێما كوردستانێ و عێراقێ زێدەبوویە،هەروەسا ل گۆری راپۆرتا یونسێڤ یا سالا 2003ێ تەكەز لسەر هندێ كر ئەو ئافرەتێن ل گوندا دژین پتر تووشی شووكرنا سنێلەیێ دبن،ئاشكەراكر ژی بەربەلاڤبوونا شووكرنا كچێن سنێلە ل دەڤەرێن گوندا دوو جارا هندی ئاستێ هەیی نە ل دەڤەرێن پێشكەفتی”.
سەبارەت شووكرنا كچان،تایبەتمەندێ دەروونی”ئەدهەم ئیسماعیل” گۆت:”شووكرنا كچێن سنێلە یێن نەگەهشتی ئەوە كو تەمەنێ وێ نەگەهشتیە تەمەنێ سنێلەیێ و قۆناغا سنێلەیێ دئێتە هژمارتن ئێك ژ قۆناغێت گەشەكرنێ یێن دەروونی ئەوە كو كاریگەر دبت ب قۆناغێت بۆری و كارتێكرنێ ل قۆناغێت داهاتی دكت،لەورا پێتڤی یە رۆژ ب رۆژ ئەڤ حالەت ب تایبەت بێنە چارەسەرەكرن ژبەركو ڤێ دیاردێ دێ كارڤەدانێن نیگەتیڤ هەبن ل پاشەرۆژەكا نێزیك و ئافرەت دئێتە هژمارتن نیڤا جڤاكی و پێتڤیە ئەو بێتە تێگەهاندن ب شێوەیەكێ دروست،چنكو پشتی شووكرنێ دێ بتە دەیك و ئەو نكارت زارۆیان خودان كت و ئەڤ دیاردا شووكرنێ زێدەبوویە”.
دەربارەی قۆناغێن سنێلەیێ ژی تایبەتمەندێ دەروونی دیاركر:”قۆناغا سنێلەیێ دابەش دبت بۆ سێ قۆناغا ئەو ژی سنێلە پێش وەخت كو بەردەوام دبت دناڤبەرا 12،13،14 سالیێ دا،قۆناغا دووێ بەردەوام دبت دناڤبەرا 15،16،17 سالیێ دا،قۆناغا سێیێ بەردەوام دبت دناڤبەرا 19،20،18سالیێ دا،شووكرنا پێش وەخت زۆرداریەكە ل ئافرەتێ دبت،چنكو تووشی هەلگرتنا بەرپرسیارەتیێ دبت ،ژبەركو ئەو نەیا شارەزایە ب رۆلێ ژنێ یان دەیكێ و نەیا بەرهەڤە بۆ هەلگرتنا ڤی رۆلی و ئەڤ كچێن سنێلە یێن زوو شوو دكن حەزا وان یا فێربوونێ یا نزمە ،یان ئەو دوور كەفتی نە ژ سەمیانێت خۆ یان تێ دكەڤن دهندەك چالاكیێت لادەر و بێ بەهردبن ژ زارۆكینا خۆ و پتریا دەما ئەو یێت ڤەدەرن ژ جڤاكی و ژ خێزان و هەڤالێن خۆ دگەل و بێ بەشبوونا وان ژ هندەك دەلیڤێن دەست نیشانكری بۆ فێربوونێ و كاركرنێ”.
ئیسماعیل ئەو چەندە ژی ئاشكەراكر:”وەزارەتا پلاندانانا عێراقێ ئاماژە ب هندێ كریە كو شووكرنا كچێن سنێلە ئەو دۆزەكە ڤەبریە دگەل گەشەكرنا ئافرەتێ ب ئەگەرێ ڤەبرینا پێش وەخت ژ فێربوونێ و نەبوونا دەلیڤا كاری یان ژیانا ب هەژاریێ،بەلێ سەبارەت دەیكێت گەنج ئەوێن تەمەن بچووك دوو گیان دبن بۆ جارا ئێكێ ب رێژەكا مەزن تووشی مەترسیا مرنێ دبن و ل عێراقێ رێژا 5.5% ژ شووكریا بەری تەمەنێ 15 سالی و 23.4% ژ شووكرنا بەری تەمەنێ 18 سالیێ ن، هەروەسا د پۆزەتیڤن ژبەر شووكرنا پێش وەخت و دخووندنا خۆدا گەهشتە هندێ كو ئەگەرێن شووكرنا پێش وەخت ئەو ژی هندەك جارا حەزا ئافرەتێ یە بۆ قورتالبوون ژ زالبوونا بابێن وان و تووندیا وی و هەبوونا فاكتەرێ غیرەتێ دناڤبەرا ئافرەتان دا ب خۆ دە،وەك ئەگەرێن جڤاكی و قورتالبوونا ژ هەژاریێ وەك ئەگەرێن ئابووری و رێژا نەخوێندەواریێ ئەوە كو دئێت و بلندبوونا رێژا ئافرەتێن ئەوێن كاردكن وەك خودانا مالێ بتنێ ، ل گۆری راپۆرتا یونسێڤ یا سالا 2003ێ تەكەز لسەر هندێ كر ئەو ئافرەتێن ل گوندا دژین،پتر تووشی شووكرنا سنێلەیێ دبن”.
ل دۆر بەربەلاڤبوونا ڤێ دیاردێ ل هەرێما كوردستانێ و عێراقێ،ناڤهاتی گۆت:”بەربەلاڤبوونا شووكرنا سنێلەیان ل دەڤەرێن گوندا دوو جارا هندی ئاستێ هەیی نە ل دەڤەرێن پێشكەفتی و بەردەوامبوونا دیاردا شووكرنا كچێن سنێلە ب شێوەیەكێ مەزن دبتە ئەگەرێ چێبوونا گەلەك ئاریشەیێن سنێلەیا و تووشی گەلەك دەردەسەریێت دەروونی و لەشی دكت”.
تُتاح هذه الصورة أيضا في: کوردی
