بریارا ڤه‌گوهاستنا 450 خێزانين ئه‌رەب بۆ دەشتا نەینەوا هاته دان
نەینەوا-KDP.info-
وەزیری ناوخۆی عێراق، بڕیارى داوه ژمارەیەكی زۆر خێزانی عەرەب لە ناوچەكانی تری عێراقەوە بۆ دەشتی نەینەوا و ناوچە كوردنشینەكان بگوازێتەوە، نوێنەری كۆتای شەبەكیش دەڵێ: “ئەم هەنگاوەی بەغدا دەستپێكی بەعەرەبكردنێكی دیكەی ناوچەكەیە و كاركردنە بۆ گۆڕینی جیۆگرافیای سنوورەكەمان، بۆیە رێگا بە جێبەجێكردنی بڕیارەكە نادەین و دەبێت هەڵوەشێتەوە”.
سالم جومعە شەبەك، بۆ ماڵپەڕی فەرمیی پارتی دیموكراتی كوردستان، گوتی: “وەزارەتی ناوخۆی عێراق لەسەر داواكاریی پەرلەمانتارێكی عەرەب بە ناوی (عەبدولڕەحیم شەمەری)، بە نووسراوێكی فەرمی و تایبەت، بڕیاری داوە 450 خێزانی عەرەب كە خەڵكی ناوچەكانی تری عێراقن، بگوازێتەوە بۆ دەشتی نەینەوا، بە تایبەت بۆ شارۆچكەی باشیك و بە تەواوی مامەڵەی نیشتەجێبوونیان بۆ بكرێت، دیاریشە ئەوانەی دێن كەسانی خراپن و پێشتر پەیوەندییان بە داعشەوە هەبووە و ئامانجیان تێكدانە”.
نوێنەری كۆتای شەبەك ئاماژەیشی دا: “ئەم هەنگاوەی بەغدا، دەستپێكی بەعەرەبكردنێكی ترە بۆ ناوچەكەمان و كاركردنە بۆ گۆڕینی جیۆگرافیای سنوورەكەمان، ئەمەیش قەبووڵكراو نییە و لەگەڵ وەزیری ناوخۆیش قسەمان كردووە كە ئەو بڕیارە هەڵوەشێتەوە، سبەینێیش سەردانی وەزیری ناوخۆ دەكەین بۆ رێگریكردن لەو بڕیارە، ئەگەر بڕیارەكەیش هەڵنەوەشێتەوە، خۆپێشاندان و مانگرتن دەست پێدەكەین.”
وەك شەبەك گوتی، ئەگەر ئەو گواستنەوەیە سەر بگرێت، کە دیارە هێشتا خێزانی زیاتریش دەگوازنەوە ناوچەكەیان و ئامانجیانە كورد لەو ناوچەیە نەمێنێ، وایان لە ناوچەكە كردووە خەڵكی شەبەک دووبارە ئاوارەی هەرێمی كوردستان ببنەوە، کە رۆژانە نزیكەی 30 خێزان ئاوارە دەبن بە هۆی سیاسەتی خراپی حەشدی شەعبی و نەبوونی ئەمنییەت و كار و كاسبییەوە.
كوردانی شەبەك لە نزیكەی 60 گوندی سنووری دەشتی نەینەوا لە قەزای ناوەندیی مووسڵ و حەمدانییە و ناحیەی باشیك و بەرتلە لە رۆژهەڵاتی شاری مووسڵ نیشتەجێن و، بە هۆی كوردبوونیانەوە لە سەردەمی رژێمی بەعس و هاتنی تیرۆریستانی داعشیش، ئاوارە بوونە.
تُتاح هذه الصورة أيضا في: کوردی
