ئه‌ڤ ساله 32كه‌س ل دهۆكێ دئاڤێ دا خه‌ندقينه
ئه‌ڤرۆ نیوز:
به‌رپرسێ راگه‌هاندنێ ل رێڤه‌به‌ریا به‌ره‌ڤانیا باژێری ل دهۆكێ راگه‌هاند كو ئه‌ڤ ساله 32 كه‌س د ئاڤێ دا خه‌ندقینه و 12 ژ وان ل ڤێ هه‌یڤێ بووینه كو چار ژی ژ وان كچ بووینه.
رائیدێ مافپه‌روه‌ر بێوار عه‌بدولعه‌زیز، به‌رپرسێ راگه‌هاندنێ ل رێڤه‌به‌ریا به‌ره‌ڤانیا باژێری ل دهۆكێ، د داخۆیانیه‌كێ دا بۆ ئه‌ڤرۆ نیوز گۆت: “ئه‌ڤ ساله 32 كه‌سان ژ ئه‌گه‌رێ خه‌ندقین د ئاڤێ دا گیانێ خوه ژ ده‌ست دایه”.
رائیدێ مافپه‌روه‌ر زێده‌تر گۆت: “د ڤێ هه‌یڤێ ب تنێ ژی دا، 12 كه‌سان گیانێ خوه ژ ده‌ست دایه و ژ وان ژی چار كچ بووینه كو دو ژ وان ژی خووشكێن ئێك بووینه”.
به‌رپرسێ راگه‌هاندنێ ل رێڤه‌به‌ریا به‌ره‌ڤانیا باژێری ل دهۆكێ دا زانین ژی كو گه‌له‌ك ژ ئه‌ڤ كه‌سێن گیانێ خوه ژ ده‌ست داین ئاواره‌نه، “ب تنێ ل كه‌مپا خانكێ پێنج كه‌سان گیانێ خوه ژ ده‌ست دایه ب ئه‌گه‌رێ خه‌ندقین د ئاڤێ دا”.
ئه‌گه‌رێ ڤێ چه‌ندێ ژی بۆ وێ ئێكێ ڤه‌گه‌راند كو ل ده‌ڤه‌رێن وان زێده‌تر ئاڤێن گرتی نه و ل دهۆكێ زێده‌تر رووبارن و هێزا مه‌له‌ڤانیكرنێ گه‌له‌ك زێده‌تره ژ یا د ئاڤێن گرتی دا هه‌ین.
ئه‌گه‌ره‌كێ دی یێ نقۆمبوونێ بۆ وێ چه‌ندێ ژی ڤه‌گه‌راند كو گه‌له‌ك جاران د ئاڤا رووباران دا شوكێن گرتنا ماسیان هاتینه دانان و خه‌لك دكه‌ڤیتێ و نه‌شێن ب دروستی مه‌له‌ڤانیا بكه‌ن و د خه‌ندقن، “هنده‌ك جهـ ژی د دروست نینن بۆ مه‌له‌ڤانیكرنێ و مه هێما ژی داناینه كو ل وان جهان زڤرۆك هه‌نه یان ژی گه‌له‌ك دكوورن و نه‌جهێ مه‌له‌ڤانیكرنێ نه”.
رائیدێ مافپه‌روه‌ر بێوار عه‌بدولعه‌زیز نه‌ڤه‌شارت ژی كو تیمێن وان یێن نقومڤانان ل گه‌ل جهێن سه‌ر رووباران هاتینه دانان به‌لێ ئه‌و نه‌شێن ل هه‌موو جهان ب درێژاهیا رووباران تیمێن خوه به‌لاڤ كه‌ن، ب تنێ ئه‌و جهـ نه‌بن یێن خه‌لك گه‌له‌ك قه‌ست دكه‌تێ ژ به‌ر درێژاهیا رووبه‌رێ رووباران و كێمیا كارمه‌ندێن وان.
تُتاح هذه الصورة أيضا في: کوردی
