بەرهەمێن چەندین هۆنەرمەندێن شنگالێ نەهاتینە تۆماركرن و بەلاڤكرن
تۆرا لالش یا راگەهاندنێ/قاسم لەوەندی
شنگال ب هۆنەرێ خۆ یا دەولەمەندە وەك هۆنەرمەند و هۆزانڤانێن وێ دبێژن هەتا ئیرۆ پشتەڤانی وەك پێتڤی نەهاتیە كرن و گەلەك بەرهەم ژ ستران و هۆزان و هەلبەستان پێك دهاتن ل جیێ خۆ دا مان بۆ دوژمنی و نەهاتن تۆماركرن و بەلاڤكرن،دخوازن لقێ سەندیكا هۆنەرمەندان و ئێكەتیا نڤیسەرێن كورد بۆ هۆنەرمەند و نڤیسەرێن شنگال بێتە ڤەكرن.
هەلبەستڤان(خودێدا كرتو)دیاركر،هۆنەر تشتەكی گەلەك پیرۆزە و رەوشا وەلاتە شنگال ب هۆنەرێ خۆ یا دەولەمەندە،لێ ب مخابنی ڤە هەتا ئیرۆ پشتەڤانی وەك پێتڤی نەهاتیە كرن،گەلەك ستران و هۆزان و هەلبەست ل جیێ خۆ دا مان بۆ دوژمنی و نەهاتن تۆماركرن و بەلاڤكرن،نهۆ گەلەك پەرتۆك هەنە خودانێن وان نكارن چاپ بكن ژبەركو پشتەڤانی و هاریكاری بۆ وان نینە،داخوازا مە ژ جیێن بلند ئەوە لقێ سەندیكا هۆنەرمەندان و ئێكەتیا نڤیسەرێن كورد بۆ هۆنەرمەند و نڤیسەرێن شنگال بێتە ڤەكرن دا ئەڤ هۆنەرێ جوان وەكی خۆ بمینت.
ژبال خۆڤە هۆنەرمەند(كەمال پیر مچو)دبێژت:گەلەك بەهرەمەند ل ناڤ ئێزدیان دا هەنە و بەهرەیا وان گەلەك یا باشە لێ مخابن شەپەرزەنە و نكارن بینن زمان و دیار بكن،داخوازێ ژ هەموو بەهرەمەندا دكەین پشتەڤانێن هەڤدوو بن و جینۆسایدا(74)ێ ژ بیر نەكن و هەردەم لناڤ بەرهەمێن خۆ دا ل بیر بینن.
هەروەسا هەلبەستڤان(سفیان دلكانی)گۆت:هۆنەرێ ئێزدیا ل شنگال ل قۆناغەكا تەنگاڤ دا دەرباز دبت و بەر ب نەمانێ دچت ژبەرنەبوونا لقەكێ سەندیكا هۆنەرمەندێن كوردستانێ بۆ هۆنەرمەندێن شنگال ونەبوونا پشتەڤانیێ و بەلاڤكرنا كلیپان لسەر كەنالێن كوردی ب گشتی،مخابن راگەهاندنا كوردی گەلەك خەم سارە لسەر پشتەڤانیا هۆنەرمەندێن ئێزدیان و داخوازێ ژ هەر جیەكی بلند دكەم كو پشتەڤان و پالپشت بن ژبۆ هۆنەرێ شنگالێ ب گشتی و ئێزدیان ب تایبەتی.
تُتاح هذه الصورة أيضا في: کوردی
