كورتە فلمەك لدۆر كۆمكوژیا شنگالێ ل ئوسترالیا دێ ئێتە نمایشكرن
تۆرا لالش یا راگەهاندنێ
كورتە فلمێ(كەزەب)بەرهەمێ تیپا گرعزێر یا هۆنەرێ شانۆیێ یە،ب هەلكەفتا بیرەوەریا چارێ یا كۆمكوژیا شنگالێ دێ ل باژێرێ ئارمیدال ل وەلاتێ ئوسترالیا ئێتە نمایشكرن.
بەرپرسێ تیپا گرعزێر یا هۆنەرێ شانۆیێ(سالم حسێن)بۆ رۆژناما دەنگێ لالش دیاركر،كورتە فلمێ (كەزەب) ژ دەرهێنانا دەرهێنەر دەخیل جانۆیە و ژ نڤیسین و ئەكتەریا وی بخۆیە، ب هەلكەفتا هاتنا بیرەوەریا دلتەزینا چارێ یا كۆمكوژیا شنگالێ ل رۆژا (3/8/2018)ێ ل باژێرێ ئارمیدال ل وەلاتێ ئوسترالیا ب ئامادەبوونا بەرپرسێن حكومی و رایەدار و كەسایەتی و جەماوەرێ وی باژێری دێ ئێتە نمایشكرن و ماوێ فلمی(9) خۆلەكن و چیرۆكا وی لسەر خێزانەكا شنگالێ یە چاوا كەفتە دەستێ داعش ل(3/8/2014)ێ ژبەر برایەكی وان یێ پەككەفتی بوو نكارین ببەنە سەر چیایێ شنگال و چاوا داعش دئێت و كچا وان بۆ دەولەتا ئیسلامی دبەن و هەروەسا ئەو خێزان بشەڤ درەڤت و نكارن دەرباز ببن و دبنە قوربانێن ڤێ كۆمكوژیێ.
هەروەسا گۆت:ئەڤ فلمە بەرهەمێ تیپێ یە ل سالا(2017)ل كۆمەلگەها شاریا و ل هەولێرێ هاتە نمایشكرن،ئەم داخوازێ ژ ئێزدیان دكەین ل هەر جیەكی بن و جیێن پەیوەندیدار ئاهەنگێن ماتەمینی بڤێ هەلكەفتێ بگێرن و كورتە فلمێن دكیۆمێنتی و سینەمایی نمایش بكن،دا چوو جاران ئەڤ رۆژ نەئێتە ژبیركرن.
تُتاح هذه الصورة أيضا في: کوردی
