نفشێ نۆكه بتر ژ سالێن بۆرى گرنگیێ ب جلوبه‌رگێن كه‌لتۆر و فلكلۆرى دده‌ن
جلوبه‌رگێن ئێزدیان یێن كه‌ڤنار ناسناما ئێزدیانه،له‌وا ب بریارا میرێ ئێزدیان هه‌ر ئافره‌ت و كچه‌كا سه‌ره‌دانا په‌رستگه‌ها پیرۆزا لالش دكت دڤێت پێگیریێ ب چه‌ند رێنمایان بكن،ئه‌و ژى جلوبه‌رگێن وان سپى بن و هێژایى پیرۆزیا لالش بن و ئه‌ڤ بریاره تا راده‌یه‌كێ باش هاتیه بجهئینان و خه‌لك د پێگیرن،هه‌روه‌سا نفشێ نۆكه بتر ژ سالێن بۆرى گرنگیێ دده‌نه كه‌لتۆر و فلكلۆرى و ره‌سه‌نایه‌تیا خۆ ب رێیا ڤان جلوبه‌رگان دپارێزن.
تۆرا لالش یا راگه‌هاندنێ / راپۆرت:رائد غانم
فه‌یسه‌ل عه‌لى،به‌رپرسێ گرۆپێ هیڤى یێ خۆبه‌خش ل كه‌مپا چه‌م مشكو،بۆ ده‌نگێ لالش خویاكر،جلوبه‌رگ ژبۆ ئێزدیان د گرنگن، به‌رى سالا 2014ێ ل شنگالێ خه‌لكى گه‌له‌ك گرنگى ب جل و به‌رگێن ره‌سه‌ن یێن ئێزدیان نه‌ددا بتریا وان جلوبه‌رگێن نۆرمال بكار دئینان و خه‌لكى شه‌رم دكر وان جلوبه‌رگان بكاربینن و ئه‌و كه‌سێن جلوبه‌رگێن ئێزدیان بكار دئینان رێژه‌یه‌كا گه‌له‌كا كێم بوون دناڤ خه‌لكێ شنگالێ دا،پشتى جینۆسایدا شنگالێ و هێرشا داعش ل سه‌ر ده‌ڤه‌را شنگالێ كو مه‌ره‌ما ئه‌وان تیرۆرستان ئه‌وبوو فلكلۆر و كه‌لتۆرێ ده‌ڤه‌را شنگالێ و ئێزدیان ژناڤ ببه‌ن و ئێزدیان بنبر بكن و ئێزدیاتى نه‌مینت ،له‌ورا گرۆپێ مه ئه‌و هزره كر كو جاره‌كا دى وان جلوبه‌رگێن ئێزدیان دناڤ خه‌لكێ دا زندى بكه‌ین و خه‌لكى ل سه‌ر ڤێ چه‌ندێ هشیار بكه‌ین و مه كاركر داكو رێژا بكارئینانا جلوبه‌رگێن سپى یێن ئێزدیان زێده بكه‌ین،د ئه‌نجام دا مه كارى رێژا ڤان جلوبه‌رگێن ره‌سه‌ن یێن كه‌لتۆرى و فلكلۆرى زێده بكه‌ین و سال بو سالێ حه‌ز ژێكه‌رێن ڤان جلوبه‌رگا دناڤ ئێزدیان دا زێده دبن و گرۆپێ مه جل و به‌رگ چێكرن و د هه‌موو بیره‌وه‌رى و هه‌لكه‌فتان دا بكار دئینین خه‌لك ژى مفایى ژێ وه‌ردگرن و به‌رده‌وامین ل سه‌ر ساخكرن و زێندیكرنا فلكلۆرێ ئێزدیان ل سه‌رانسه‌رى ده‌ڤه‌رێن ئێزدینشین،چنكو كراسێ سپى دناڤ ئێزدیان دا نیشانا ئێزدیاتى یا وى/ێ كه‌سى یه ئه‌ڤجا چ كچ بت یان كور بت،ئه‌م به‌رده‌وامین ل سه‌ر هشیاركرنا خه‌لكێ خۆ داكو فلكلۆرێ ره‌سه‌نێ ئێزدیان نه‌ئێته ونداكرن.
ل سه‌ر هه‌مان بابه‌ت(لوقمان سلێمان)به‌رپرسێ نڤیسینگه‌ها لالش ل په‌رستگه‌ها لالش،بۆ ده‌نگێ لالش گۆت:ب بریارا میرێ ئێزدیان هه‌ر ئافره‌ت و كچه‌كا سه‌ره‌دانا په‌رستگه‌ها پیرۆزا لالش دكت دڤێت پێگیریێ ب چه‌ند رێنمایان بكن،ئه‌و ژى جلوبه‌رگێن وان سپى بن و ئه‌و جلوبه‌رگ هێژایى پیرۆزیا لالش بن و ئه‌ڤ بریاره تا راده‌یه‌كێ باش هاتیه بجهئینان و خه‌لك د پێگیرن،نه‌خاسمه پشتى میر و جڤاتا رۆحانى یا ئێزدیان بریار دایى تاووس بێته گێران دناڤ ئێزدیان دا و خه‌لكێ ئێزدى ب جلوبه‌رگێن ره‌سه‌ن یێن ئێزدیان پێشوازیا تاووسێ كرن،ئه‌ڤ چه‌نده ژى جیێ سه‌ربلندیێ بوو كو خه‌لك ڤان جلوبه‌رگان بكاربینت،هه‌روه‌سا ئه‌ڤ جلوبه‌رگێن سپى دناڤ ئێزدیان دا د كه‌ڤنارن و پیرۆزیا خۆ هه‌یه، ده‌ما خه‌لك سه‌ره‌دانا په‌رستگه‌ها پیرۆزا لالش دكن بتریا وان ب جلوبه‌رگێن سپى دئێنه لالشێ و ڤێ یه‌كێ ژى جوانیه‌كا دى دایه لالشا نوورانى و هه‌ر دچت خه‌لك بتر پێگیریێ ب ڤان رێنمایان دكت و جلوبه‌رگێن خۆ یێن ره‌سه‌ن بكاردئینت،نۆكه بتریا وان كه‌سێن ڤان جلوبه‌رگێن كه‌ڤنار بكاردئینن كچ و كورن و فلكلۆر و ره‌سه‌ناتیا ئێزدیان ساغ دكن و ده‌ما خه‌لكه‌كى نه‌ئێزدى وان كه‌سان دبینن ئێكسه‌ر دزانن ئه‌ڤ كه‌س ئێزدینه ئه‌و ژى ژبه‌ر جلوبه‌رگان.
دبه‌رده‌وامیا ئاخفتنا خۆ دا گۆت:جلوبه‌رگێن ئێزدیان یێن كه‌ڤنار ناسناما ئێزدیانه،ده‌ما ئێزدى ژ وه‌لاتێن ئه‌ورۆپا ژى سه‌ره‌دانا لالشا پیرۆز دكن ڤان جلوبه‌رگان بكاردئینن و ئه‌و ژى پابه‌ندى رێنمایێن میر و جڤاتا رۆحانى یا ئێزدیانه،هه‌روه‌سا دڤێ سالێ دا بتریا ئێزدیان یێن سه‌ره‌دانا لالشێ كرین جلوبه‌رگێن وان گه‌له‌ك جوانن،چنكو ئه‌و جلوبه‌رگێن سپى نه و ئه‌ڤ ساله بتر ژ هه‌موو سالان خه‌لكێ ئێزدى ڤان جلوبه‌رگان بكاردئینن ب تایبه‌تى ل لالشا نوورانى كو مه‌زنترین و پیرۆزترین جیێ ئایینى یێ ئێزدیایه.
ده‌رباره‌ى بكارئینانا جل و به‌رگێن ره‌سه‌ن و زندیكرنا وان دناڤ خه‌لكى دا،سه‌عید ته‌ته‌ر ئه‌ندامێ تیپا گرعزێر یا هۆنه‌رێ شانۆیێ ل شنگالێ،بۆ ده‌نگێ لالش دبێژت:ئه‌ڤه پێنگاڤه‌كا پیرۆزه،خه‌لكێ مه ل هه‌موو ده‌ڤه‌ران ڤان جلوبه‌رگان بكاردئینن و ئه‌ڤ یه‌كه ژى جیێ سه‌ربلندى و سه‌رفه‌رازیا ئێزدیایه،ژبه‌ركو نفشێ نۆكه كه‌لتۆر و فلكلۆر و ره‌سه‌نایه‌تیا خۆ ب رێیا ڤان جلوبه‌رگان دپارێزن،نه‌خاسمه ده‌ما هه‌لكه‌فتێن ئایینى و گێرانا رێوره‌سمان چ ل لالشێ یان ژى دناڤ گوند و كۆمه‌لگه‌هێن ئێزدیان دا هه‌ر ژ شنگال هه‌تا شێخان،داخواز دكه‌م گه‌نج و لاوێن ئێزدیان به‌رده‌وام بن ل سه‌ر پاراستنا كه‌لتۆر و فلكلۆرێ خۆ یێ ره‌سه‌ن نه‌خاسمه جلوبه‌رگان.
س.س
تُتاح هذه الصورة أيضا في: کوردی
